കേരള വിരുദ്ധത എന്ന മാധ്യമ അജണ്ട

സുദീപ്തോ സെന്നിന്‍റെ കേരള സ്റ്റോറീസ് എന്ന സിനിമ ഒരു പരീക്ഷണമായിരുന്നു. രാജ്യം ഭരിക്കുന്ന രാഷ്ട്രീയത്തിന് വലിയ പാദമുദ്രകൾ നൽകാൻ അനുവദിക്കാത്ത രാജ്യത്തിന്റെ തെക്കേ മൂലയിലുള്ള ഒരു സംസ്ഥാനത്തിനെതിരെയുള്ള പ്രൊപഗാൻഡ. നിർമ്മാതാക്കളുടെ പിന്തുണക്കാരൊഴികെ മറ്റാരെയും വലുതായി ആകർഷിക്കാൻ കഴിഞ്ഞില്ലെങ്കിലും മികച്ച സംവിധായകനുള്ള ദേശീയ ചലച്ചിത്ര പുരസ്‌കാരം വരെ നൽകി ആ പരീക്ഷണത്തിന് കേന്ദ്ര സർക്കാർ പിന്തുണയും ഉടമസ്ഥതയും പ്രഖ്യാപിച്ചു.

കേരള സ്റ്റോറിയിലെ നുണകൾ പല വട്ടം പല മാധ്യമങ്ങൾ പൊളിച്ചതാണ്. അതുകൊണ്ട് ഇവിടെ വീണ്ടും ആ സാഹസികതയ്ക്ക് മുതിരുന്നില്ല. പക്ഷേ എത്രയോ കാലമായി കേരളത്തെ കുറിച്ചുള്ള അടിസ്ഥാനരഹിതമായ പ്രചരണങ്ങൾ രാജ്യത്ത് നടക്കുന്നുണ്ട്. അത് ഒരു വഴിക്ക് നടക്കട്ടെ. പക്ഷേ അതിനെയെല്ലാം കണ്ണടച്ച് പിന്തുണക്കുന്ന നിലയില്‍ കേരളത്തിലെ മാധ്യമങ്ങള്‍ പ്രസിദ്ധീകരിക്കുന്ന വാർത്തകളുടെ സ്രോതസെന്താണ്? എന്താണ് ആ മാധ്യമങ്ങളുടെ അജണ്ട? പെട്ടെന്ന് തന്നെ പൊളിയുന്ന ഇത്തരം കള്ളങ്ങൾ എന്തിനാണ് പ്രചരിപ്പിക്കുന്നത്? കേരളത്തിന്‍റെ ഏറ്റവും വലിയ വരുമാനം മദ്യവിൽപ്പനയും ലോട്ടറി കച്ചവടവുമാണ് എന്നൊരു പ്രചരണം കുറേ കാലമായി സാമൂഹ്യമാധ്യമങ്ങള്‍ വഴി നടക്കുന്നുണ്ട്. ഇതേ സംഗതി ചിലപ്പോൾ മുഖ്യധാരാ മാധ്യമങ്ങളിലും വരാറുണ്ട്. ഈ വാദം കേരളത്തിലെ മുൻ ഗവർണറായ ആരിഫ് മുഹമ്മദ് ഖാനും കുറച്ച് കാലം മുമ്പ് ഉന്നയിച്ചിരുന്നു. യാതൊരു ചോദ്യങ്ങളുമില്ലാതെ ഗവർണറുടെ ഈ അടിസ്ഥാനരഹിതമായ ആരോപണം കേരളത്തിലെ മാധ്യമങ്ങൾ ഏറ്റുപിടിച്ചു. ഗുജറാത്ത്, ബിഹാർ, ജമ്മുകശ്മീർ, ചില വടക്ക് കിഴക്കൻ സംസ്ഥാനങ്ങൾ എന്നിവ ഒഴികെയുള്ള ഇന്ത്യയിലെ മിക്കവാറും സംസ്ഥാനങ്ങളിൽ മദ്യവിൽപ്പന പൊതു ഖജനാവിലേയ്ക്ക് നികുതി എത്തിക്കുന്നുണ്ട്. പക്ഷേ മദ്യത്തിൽ നിന്നുള്ള വരുമാനത്തിന്‍റെ കാര്യത്തിൽ ആദ്യത്തെ പത്ത് സംസ്ഥാനങ്ങളുടെ പട്ടികയില്‍ പോലും കേരളം ഇടം പിടിച്ചിട്ടില്ല. കാരണം കേരളത്തിന്‍റെ മൊത്തം റവന്യു വരുമാനമല്ല മറിച്ച്, തനത് റവന്യു വരുമാനത്തിന്‍റെ എത്ര ശതമാനം വരും മദ്യത്തിൽ നിന്നുള്ള വരുമാനം എന്നതാണ് കണക്കാക്കേണ്ടത്. കേരളത്തിന്‍റെ മൊത്തം റവന്യു വരുമാനത്തിൽ 35 ശതമാനത്തോളം കേന്ദ്രത്തിൽ നിന്നുള്ള നികുതി വിഹിതവും ഗ്രാന്‍റുമാണ്. അത് കണക്കിലെടുക്കാതെ കേരളത്തിന്‍റെ തനതു വരുമാനമെടുത്താൽ മദ്യവരുമാനം കേരളത്തിന്‍റെ റവന്യു വരുമാനത്തിന്‍റെ 30 ശതമാനത്തിലേറെ വരുമെന്നാണ് അവർ ചൂണ്ടിക്കാണിക്കുന്നത്. കേന്ദ്ര നികുതി വിഹിതം കേന്ദ്ര സർക്കാരിന്റെ ഔദാര്യമാണെന്ന സംഘിവാദത്തിന്‍റെ ഒരു ആവർത്തനമാണ് മേൽപ്പറഞ്ഞ വിമർശനം. കേന്ദ്ര വിഹിതം സംസ്ഥാനത്തിന് അവകാശപ്പെട്ടതാണ്. അത് ഒഴിവാക്കിക്കൊണ്ട് മദ്യത്തിൽ നിന്നുള്ള വരുമാനത്തെ പർവ്വതീകരിച്ചു കാണിക്കുന്നതിൽ അർത്ഥമില്ല. ഇനി നാളെ പെട്രോൾ ജി.എസ്.ടിയിലേക്ക് നീങ്ങുമ്പോൾ കേരളത്തിന്റെ തനതുവരുമാനത്തിൽ സിംഹപങ്കും മദ്യ വരുമാനമായിത്തീരും. അങ്ങനെയൊരു നിഗമനത്തിൽ എത്തുന്നതിന് എന്തു സാംഗത്യമാണുള്ളത്? മദ്യത്തിൽ നിന്നുള്ള വരുമാനം ഒരു പ്രധാന ഇനമായിരിക്കുന്നത് കേരളത്തിന്റെയോ മറ്റേതെങ്കിലും സംസ്ഥാനത്തിന്റെയോ കുഴപ്പമല്ല. ഇന്ത്യൻ ഭരണഘടന അങ്ങനെയാണു വ്യവസ്ഥ ചെയ്തിട്ടുള്ളത്. അതുകൊണ്ട് കേന്ദ്രവിഹിതം അടക്കമുള്ള സംസ്ഥാന റവന്യു വരുമാനത്തിന്റെ ശതമാനമായി മദ്യ വരുമാനത്തിന്റെ പ്രാധാന്യത്തെ വിലയിരുത്തുന്നതാണു ശരി.”- മുൻ ധനമന്ത്രി ഡോ. തോമസ് ഐസക് വിദശീകരിക്കുന്നു.

എക്‌സൈസ് വരുമാനത്തിന്റെ കാര്യത്തിൽ മറ്റെല്ലാ തെന്നിന്ത്യൻ സംസ്ഥാനങ്ങളും കേരളത്തിനേക്കാൾ മുകളിലാണ് എന്നോർക്കണം. 2020-21 വർഷത്തെ കണക്കിൽ, തമിഴ്‌നാടിന്റെ എക്‌സൈസ് വരുമാനം 30,000-35000 കോടിയാണ്. കേരളത്തിന്റേതിനേക്കാളും രണ്ടരയിരട്ടി കൂടുതലാണിത്. തമിഴ്‌നാടിന്റെ മൊത്തം റവന്യു വരുമാനത്തിന്റെ 16-17 ശതമാനം വരുമിത്. ഈ പ്രചരണത്തിന് വലിയ പിന്തുണ നൽകിയത് മനോരമയാണ്. മനോരമയുടെ ഓൺലൈൻ വിഭാഗം ഇത് സംബന്ധിച്ച് അക്കാലത്ത് നൽകിയ വാർത്തയോട് ഐസക്ക് പ്രതികരിച്ചത് ഇങ്ങനെയാണ്. ” 2015 -16 മുതലുള്ള വർഷങ്ങൾ എടുത്താൽ മദ്യത്തിൽ നിന്ന് കേരള ഖജനാവിലേക്കു ലഭിക്കുന്നത് 11,000 – 12,000 കോടി രൂപയാണ്. 2021- 22-ൽ അത് 14,500 കോടി രൂപയായി ഉയർന്നിട്ടുണ്ട്. കേരളത്തിന്റെ മൊത്തം റവന്യു വരുമാനത്തിന്റെ എത്ര ശതമാനം വരുമിത്? 13-14 ശതമാനം ആയിരുന്നു. കഴിഞ്ഞ വർഷം മദ്യ വരുമാനം വളർന്നെങ്കിലും മൊത്തം റവന്യു വരുമാനത്തിലെ വിഹിതം 12 ശതമാനമായി താഴ്ന്നു. ഇത് എങ്ങനെ മുഖ്യവരുമാന സ്രോതസാകും? ഈയൊരു പ്രസ്താവന യാഥാർത്ഥ്യം മറച്ചുവയ്ക്കാനുള്ള കണക്കുകൊണ്ടുള്ള കസർത്താണെന്നാണ് മനോരമയുടെ വാദം. കേരളത്തിന്റെയാകട്ടെ റവന്യൂവിഹിതത്തിന്റെ 14 ശതമാനത്തിലേറെ എക്‌സൈസ് വരുമാനം വന്നിട്ടില്ല. മറ്റ് തെന്നിന്ത്യൻ സംസ്ഥാനങ്ങളിൽ കേരളത്തിനേക്കാൾ നാലിരട്ടിയാണ് എക്‌സൈസ് വരുമാനം. എന്നിട്ടും കേരളമാണ് മദ്യവരുമാനത്തിലും ഉപഭോഗത്തിലും കൂടുതൽ എന്ന് നിരന്തരം പ്രചാരണം നടക്കുന്നു.

ലോട്ടറിയിൽ നിന്നുള്ള വരുമാനം കേരളത്തിന്റെ മൊത്തം റവന്യു വരുമാനത്തിന്റെ എത്ര തുച്ഛമായ ശതമാനം മാത്രമാണ്. ലോട്ടറിയുടെ നല്ലകാലത്ത് രണ്ടു ശതമാനത്തോളമാണുണ്ടായിരുന്നത്. ഇപ്പോൾ കണക്കാക്കാൻ പോലുമില്ലെന്നാണ് ധനകാര്യ വിദഗ്ദ്ധർ പറയുന്നത്. ലോട്ടറി സംബന്ധിച്ച് ഇത്രമാത്രം തെറ്റിദ്ധാരണ ഉണ്ടാകുന്നതിന് ഒരു കാരണം ലോട്ടറിയിൽ നിന്നുള്ള മൊത്തം (ഗ്രോസ്) വരുമാനം ഏതാണ്ട് 10,000 കോടി രൂപയോളം വരുമായിരുന്നു എന്നതാണ്. ഇതിൽ നിന്ന് നികുതി കിഴിച്ച് ബാക്കി സംഖ്യയുടെ 60 ശതമാനം സമ്മാനത്തിനായി ചെലവാകും. വിൽപ്പനക്കാർക്കുള്ള കമ്മീഷൻ, ഏജന്റുമാർക്കുള്ള ശതമാന വിഹിതം എന്നിവ 31.5 ശതമാനം വരും. മറ്റു ചെലവുകൾ 5.5 ശതമാനം കഴിഞ്ഞാൽ മിച്ചം മൂന്ന് ശതമാനം മാത്രമാണ് എന്നാണ് സർക്കാർ കണക്കുകൾ വ്യക്തമാക്കുന്നത്. ജി.എസ്.ടി വിഹിതംകൂടി കണക്കാക്കിയാൽപ്പോലും മൊത്തം റവന്യു വരുമാനത്തിന്റെ ഒരു ശതമാനമേ ലോട്ടറി വരുമാനം വരൂ. ഈ വസ്തുതകൾ പല തവണ സർക്കാർ തലത്തിലും ധനമന്ത്രാലയം വഴിയും സാമ്പത്തിക വിദഗ്ദ്ധർ വഴിയും കേരളത്തിന്റെ പൊതുസമൂഹത്തിന്റെ മുന്നിലെത്തിയിട്ടും കേരളത്തിന്റെ മുഖ്യവരുമാനം ലോട്ടറിയും മദ്യവുമാണ് എന്ന ചർച്ച കേരളത്തിലെ മുഖ്യധാരാ മാധ്യമങ്ങൾ മുന്നോട്ട് കൊണ്ടുപോകുന്നു.

‘ആശാവർക്കർമാർക്ക് ശമ്പളം നൽകാത്തത് സംസ്ഥാന സർക്കാരിന്റെ കഴിവില്ലായ്മയുടെ തെളിവ്. ആരോഗ്യമന്ത്രാലയം കേരളത്തിന് നൽകിയത് 938.8 കോടി’ -എന്ന് പറഞ്ഞ് മാതൃഭൂമി കുറച്ച് നാൾ മുമ്പ് ഒരു വാർത്ത നൽകി. മറ്റ് മാധ്യമങ്ങളും അതേറ്റ് പിടിച്ചു. പി.ഐ.ബി റിലീസ് എന്ന പേരിൽ നൽകിയ ആ രേഖ പി.ഐ.ബിയുടെ വെബ് സൈറ്റിലോ വാർത്ത ഏജൻസികളിലോ ഉണ്ടായിരുന്നില്ല. മലയാള മാധ്യമങ്ങളല്ലാതെ മറ്റൊരു മാധ്യമങ്ങളും ഇക്കാര്യം അറിഞ്ഞിരുന്നുമില്ല. കുറച്ച് കാലം മാധ്യമ പ്രവർത്തനം നടത്തിയിട്ടുള്ള ആർക്കും മനസിലാകാവുന്ന കാര്യമാണ് അത് പി.ഐ.ബിയുടെ പത്രകുറിപ്പല്ല എന്ന കാര്യം. അത് യൂണിയൻ സർക്കാർ ഭരിക്കുന്ന പാർട്ടിയുടെ പി.ആർ.ഏജൻസികൾ തയ്യാറാക്കിയ കുറിപ്പാണ്. മോദി സർക്കാർ എന്നോ പിണറായി സർക്കാർ എന്നോ ഒരു പി.ഐ.ബി. കുറിപ്പിലും പറയില്ലെന്നും സുവ്യക്തമാണ്. പക്ഷേ, അത് അന്വേഷിക്കാൻ പോലും ആർക്കും താത്പര്യമില്ലാതെയാണ് ആ റിപ്പോർട്ട് വന്നത്.

മറ്റൊരു ഉദാഹരണമാണ് രാജ്യത്ത് സുരക്ഷിതമായി യാത്ര ചെയ്യാൻ പറ്റുന്ന നഗരങ്ങളിൽ കേരളമേയില്ല എന്ന് പറഞ്ഞ് മലയാള മനോരമ നടത്തിയ പ്രചരണം. ദി നാഷണൽ ആന്വൽ റിപ്പോർട്ട് ആൻഡ് ഇൻഡെക്‌സ് ഓൺ വുമെൺ സേഫ്റ്റി (നാരി) എന്ന റിപ്പോർട്ടിന്റെ അടിസ്ഥാനത്തിലാണ് ഈ വാർത്ത. എന്നാൽ ആ റിപ്പോർട്ടിൽ പൊതു മാനദണ്ഡങ്ങളിൽ ഉൾപ്പെടുത്തിയിട്ടുള്ള കേരളത്തിൽ നിന്നുള്ള നഗരം തിരുവനന്തപുരം മാത്രമാണ്. സുരക്ഷിതമായ യാത്ര തിരുവനന്തപുരത്ത് പരിശോധിച്ചിട്ടില്ല. ദേശീയ അനുപാതത്തേക്കാൾ മെച്ചപ്പെട്ട സുരക്ഷയാണ് തിരുവനന്തപുരത്ത് രേഖപ്പെടുത്തിയിട്ടുള്ളത്. സർവ്വേയിൽ പങ്കെടുത്തവരിൽ 66 ശതമാനം സ്ത്രീകളും ‘വളരെ മെച്ചപ്പെട്ടത്’ എന്ന നിലയിലാണ് ഈ നഗരത്തിലെ സുരക്ഷയെ കുറിച്ച് പ്രതികരിച്ചിട്ടുള്ളതജ്. മൂന്ന് ശതമാനം സ്ത്രീകൾ മാത്രമാണ് സർവ്വേയ്ക്ക് മുമ്പുള്ള ഒരു വർഷക്കാലയളവിൽ ഏതെങ്കിലും തരത്തിലുള്ള ശല്യങ്ങളോ ആക്രമണങ്ങളോ ബുദ്ധിമുട്ടുകളോ നഗരത്തിൽ ഉണ്ടായതായി പറയുന്നത്. അത് ദേശീയ ശരാശരിയേക്കാൾ വളരെ കുറവാണെന്നും റിപ്പോർട്ട് പറയുന്നു. ആത്യന്തികമായി തിരുവനന്തപുരം സ്ത്രീ സുരക്ഷയിൽ സുസ്ഥിര അടിത്തര ഒരുക്കുന്നുവെന്നും അധികൃതരോട് ന്യായമായ വിശ്വാസം സത്രീ സമൂഹത്തിന് ഉണ്ട് എന്നും സപ്പോർട്ട് മെക്കാനിസങ്ങൾ പ്രവർത്തിക്കുന്നുണ്ട് എന്നുമാണ് വിലയിരുത്തൽ. അതോടൊപ്പം തീർച്ചയായും ഇനിയും മെച്ചപ്പെടാനുണ്ട് എന്നും റിപ്പോർട്ട് ചൂണ്ടിക്കാണിക്കുന്നു. പക്ഷേ മനോരമ റിപ്പോർട്ട് ചൂണ്ടിക്കാണിക്കുന്നത് പോലെ കേരളത്തിലെ പൊതുസുരക്ഷയ്‌ക്കെതിരെ ഉള്ള ഒന്നും ഈ റിപ്പോർട്ടിലില്ല. കേരളത്തിന്റെ മുഖ്യ വരുമാനങ്ങളിലൊന്ന് വിനോദസഞ്ചാരമാണെന്നിരിക്കെ, കേരളം സുരക്ഷിതമല്ല എന്ന് കേരളത്തിലെ തന്നെ ഏറ്റവും വലിയ മാധ്യമങ്ങളിലൊന്ന് റിപ്പോർട്ടുകൾ വളച്ചൊടിച്ച് വാർത്തകൾ സൃഷ്ടിക്കുന്നത് എന്തിനായിരിക്കും? ഇത് മഞ്ഞുമലയുടെ ഒരു തുമ്പ് മാത്രമാണ്. കേരളത്തിന്റെ കടത്തെ കുറിച്ച്, കേരളത്തിന്റെ ക്രമസമാധാനത്തെ കുറിച്ച് എത്രയോ വാർത്തകൾ നമുക്ക് അനുദിനം ഇത്തരം മാധ്യമങ്ങളിൽ കാണാൻ കഴിയും. കേരളത്തിനെതിരായുള്ള ഒരു ആഖ്യാനം ചമക്കാൻ, പുതിയ കേരള സ്റ്റോറികൾ സൃഷ്ടിക്കാൻ യൂണിയൻ സർക്കാരിനെ നിയന്ത്രിക്കുന്ന ഹിന്ദുത്വ ശക്തികൾക്ക് അവസരം സൃഷ്ടിക്കാനുള്ള ബോധപൂർവ്വമായ ശ്രമമായി ഇതിനെ കാണാം.

കേരളത്തിലെ ഉന്നതവിദ്യാഭ്യാസ രംഗത്തെ കുറിച്ചും കേരളത്തിലെ പൊതുജനാരോഗ്യത്തെ കുറിച്ചും കഴിഞ്ഞ വർഷങ്ങളിൽ മാധ്യമങ്ങൾ സൃഷ്ടിച്ച വാർത്തകളിൽ ഒന്ന് പോലും ഗൗരവമായതോ സത്വര നടപടികൾക്ക് പ്രേരിപ്പിക്കുന്നതോ തെറ്റുതിരുത്തലുകൾക്ക് കാരണമായതോ ആയിരുന്നില്ല എന്നത് ലജ്ജാകരമാണ്. അതത് ദിവസങ്ങളിൽ ഭ്രമാത്മകമായ അന്തരീക്ഷം സൃഷ്ടിച്ച് കാണികളെ ടെലിവിഷൻ സ്‌ക്രീനുകളിലേക്കോ വെബ്‌സൈറ്റുകളിലേയ്‌ക്കോ യൂട്യൂബിലേയ്ക്കോ ആനയിക്കുക എന്നതിനപ്പുറം ഇതിലൊരു പ്രസക്തിയും ഇല്ലായിരുന്നു. ഇതേ സ്വഭാവത്തിലുള്ളതല്ലെങ്കിലും ഈ ദിവസങ്ങളിൽ കേരളത്തിലെ പ്രധാന വാർത്തയായിരിക്കുന്ന, കേരള സർവ്വകലാശാലയിലെ തിരുവനന്തപുരം കാമ്പസിൽ സംസ്‌കൃതം വകുപ്പ് മേധാവി, ദളിത് ഗവേഷക വിദ്യാർത്ഥിക്ക് നേരെ നടത്തിയ ജാതി അധിക്ഷേപം കേരളത്തിലെ മുഖ്യധാരാ മാധ്യമങ്ങൾ ആദ്യം എങ്ങനെയാണ് വാർത്തയായി നൽകിയത് എന്നത് ചരിത്രത്തിൽ ഓർത്തുവയ്ക്കപ്പെടേണ്ടതാണ്. ‘സംസ്‌കൃതം അറിയാത്ത വിദ്യാർത്ഥിക്ക് സംസ്‌കൃതത്തിൽ പി.എച്ച്.ഡി നൽകണമെന്ന് ശുപാർശ, കാര്യവട്ടം കാമ്പസിലെ എസ്.എഫ്.ഐ നേതാവിനെതിരെ പരാതി നൽകി’ എന്നായിരുന്നു ഏഷ്യാനെറ്റിന്റെ വാർത്ത. ‘സംസ്‌കൃതം എഴുതാനോ വായിക്കാനോ അറിയില്ല, എസ്.എഫ്.ഐ നേതാവിന് പി.എച്ച്.ഡി ശുപാർശ’ എന്നായിരുന്നു മനോരമ നൽകിയ വാർത്ത. ഇതേ മട്ടിലായിരുന്നു മാതൃഭൂമിയുടേയും കൗമുദിയുടേയും വാർത്ത. പി.എച്ച്.ഡി വരെ എത്തിയ ഗവേഷകന് സംസ്‌കൃതം വായിക്കാനും എഴുതാനും അറിയില്ലെന്ന് ഈ ലേഖകർ ഉറപ്പിച്ച് പറഞ്ഞു. ധാർമ്മിക രോഷം അണപൊട്ടി ഒഴുകുന്നതായിരുന്നു വാർത്തകൾ. ദളിത് സമൂഹത്തിലെ ഒരാൾ സംസ്‌കൃതത്തിൽ പി.എച്ച്.ഡി പൂർത്തിയാക്കുമ്പോൾ അണപൊട്ടി ഒഴുകിയ സവർണ ജാത്യാഹങ്കാരത്തിന്റെ വെറിപൂണ്ട നുണക്കഥയായിരുന്നു വിപിൻ വിജയ് എന്ന വിദ്യാർത്ഥിക്ക് നേരെയുണ്ടായ ഈ നുണവാർത്ത പ്രചരണങ്ങളെന്ന് ഇന്ന് നമുക്കറിയാം. സംസ്‌കൃതം വിഭാഗം മേധാവി വിജയകുമാരി എന്ന സ്ത്രീ ചാനലുകളുടെ മുന്നിൽ തന്നെ വന്നിരുന്ന് അത് തുറന്ന് പറയാതെ സ്ഥിരീകരിച്ചു. ജാതി അധിക്ഷേപം നടത്തിയോ എന്ന ചോദ്യത്തിന് ഇല്ല എന്ന മറുപടി പോലും അവർക്കില്ലായിരുന്നു.

കേരളത്തിലെ മാധ്യമ മേഖല നേരിടുന്ന ഏറ്റവും വലിയ വെല്ലുവിളികളിലൊന്ന് മുൻവിധികളും വസ്തുതാന്വേഷണത്തിനുള്ള താത്പര്യക്കുറവുമാണ്. ദളിത് സമൂഹത്തിനോ മുസ്ലീം സമൂഹത്തിനോ ഇടതു പക്ഷത്തിനോ എതിരെയുള്ള ഏത് വാർത്തകളേയും തൊണ്ടതൊടാതെ വിഴുങ്ങുന്ന, അതിന്റെ വസ്തുതകൾ അന്വേഷിക്കാൻ മെനക്കെടാതെ പ്രസിദ്ധീകരിക്കുന്ന/സംപ്രേക്ഷണം ചെയ്യുന്ന മാധ്യമങ്ങളുടെ ഈ ശീലം അനുദിനം വർദ്ധിച്ച് വരികയാണ് എന്നതാണ് ഇക്കാലത്തിന്റെ ഏറ്റവും ദുഖകരമായ യാഥാർത്ഥ്യം.