യുദ്ധമുറിവുകളുടെ ദേശചരിത്രം

“നമ്മൾ ജീവിക്കുന്ന കാലത്തെ അടയാളപ്പെടുത്തുന്ന ബയോളജിക്കൽ ആർക്കൈവ് ആണ് യുദ്ധമുറിവുകൾ.” ഡോക്ടർ ഗസൻ അബുസിത്ത ഇത് പറഞ്ഞപ്പോൾ ഞാൻ സ്തംബ്ധയായി. ആ ഒരു നിമിഷത്തെ നേരിടാൻ 28 വർഷത്തെ എൻ്റെ മാധ്യമ പ്രവർത്തന പരിചയം പോരാതെ വന്നു. 

ഡോക്ടർ ഗസൻ അബു സിത്തയെ നമ്മളറിയും. യുദ്ധം തുടങ്ങിയ ആദ്യ നാളുകളിൽ ഗസയിൽ എന്താണ് നടക്കുന്നതെന്ന് ലോകം അറിഞ്ഞിരുന്നത് ഡോക്ടറുടെ സോഷ്യൽ മീഡിയ പോസ്റ്റുകളിലൂടെയായിരുന്നു. കൂമ്പാരമായി കിടക്കുന്ന മൃതദേഹങ്ങൾക്ക് നടുവിൽ ഒരു പോഡിയത്തിന് പിറകിൽ നിന്ന് മാധ്യമങ്ങളെ അഭിസംബോധന ചെയ്യുന്ന ഡോക്ടറുടെ ദൃശ്യങ്ങൾ ലോക ത്തെ മുഴുവൻ വിറങ്ങലിപ്പിക്കാൻ പോന്നതായിരുന്നു. പ്ലാസ്റ്റിക് –  പുനർനിർമ്മാണ സർജറിയിൽ വിദഗ്ധനായ ബ്രിട്ടീഷ് പലസ്തീനിയൻ  ഡോക്ടർ ഗസൻ അബു സിത്ത കുറേ വർഷങ്ങളായി ഗസയുടെ മുറിവുകളിൽ മരുന്നു വെക്കുകയാണ്. ഒക്ടോബർ 7 ന് ശേഷം തുടങ്ങിയ കൂട്ടക്കൊലകളുടെ നിർണായകമായ പല വിവരങ്ങളും ഡോക്ടർ പുറത്തു വിട്ടിരുന്നു. വേദനാസംഹാരി ഒന്നും ഉപയോഗിക്കാതെ പച്ചമാംസത്തിൽ സർജറി ചെയ്യേണ്ടി വരുന്ന ദുരവസ്ഥയെ കുറിച്ച് അദ്ദേഹം പറഞ്ഞത് ലോകത്തെ ഞെട്ടിച്ചിരുന്നു.

ഔട്ട് ലുക്കിന് വേണ്ടി ഒരു ലേഖനം തയ്യാറാക്കുന്നതിനാണ് ഡോക്ടർ ഗസൻ അടക്കം പലസ്തീനിലെ യുദ്ധഭൂമിയിൽ പ്രവർത്തിക്കുന്ന ഏതാനും ഡോക്ടർമാരുമായി സംസാരിച്ചത്. വ്യത്യസ്തവും സങ്കീർണവും കഠിനവുമായ യുദ്ധാനുഭവങ്ങളാണ് ഓരോരുത്തരും പങ്ക് വെച്ചത്. അതേ സമയം എല്ലാവരും ഏകകണ്ഠമായി പറഞ്ഞ ഒരു കാര്യം ഗസയിൽ നടക്കുന്നത് ഒരു സാധാരണ യുദ്ധമല്ല, മറിച്ച് ഒരു ജനതയെ തുടച്ചു നീക്കുക എന്ന ലക്ഷ്യത്തോടെയുള്ള വംശഹത്യയാണെന്നായിരുന്നു. 

ഒരു പ്രത്യേക ഭൂപ്രദേശത്ത് നിന്ന് ഒരു ജനതയെ തുടച്ചുനീക്കാനുള്ള ശ്രമമാണ് ഇപ്പോൾ നടക്കുന്നതെന്ന് ഡോക്ടർ ഗസ്സൻ പറയുന്നു. മനുഷ്യരെ കൊന്നൊടുക്കുക എന്നതിനേക്കാൾ വരും തല മുറക്ക് അവിടെ ജീവിക്കാനേ കഴിയില്ലെന്ന് ഉറപ്പാക്കാനുള്ള ശ്രമത്തിനാണ് നമ്മൾ സാക്ഷ്യം വഹിക്കുന്നത്. കുടിവെള്ള സ്രോതസ്സുകൾ, മാലിന്യ സംസ്കരണ സംവിധാനങ്ങൾ , ആശുപത്രികൾ തുടങ്ങിയവയാണ് ആദ്യം തകർക്കപ്പെടുക. ഭൗതിക പരിസ്ഥിതിയുടെ സർവ്വനാശമാണ് ലക്ഷ്യമിടുന്നത്. 

“അടിസ്ഥാന സൗകര്യങ്ങളുടെ നാശം മാത്രമല്ല,  ചരിത്രപരമായി പ്രാധാന്യമുള്ള ആയിരക്കണക്കിന് സ്ഥലങ്ങളുടെ നാശം, ശ്മശാനങ്ങളുടെ നാശം- അങ്ങനെയിപ്പോള്‍ ആ ഭൂപ്രദേശത്ത് അവരെ പിടിച്ചുനിര്‍ത്താന്‍ അവര്‍ക്ക് ഭൂതകാലമില്ല. അതാണ് യുദ്ധവും വംശഹത്യയും തമ്മിലുള്ള ആദ്യത്തെ വ്യത്യാസം. പണ്ട് നടന്ന എല്ലാ യുദ്ധങ്ങളും ഇപ്പോള്‍ ഗാസയില്‍ നടക്കുന്ന യുദ്ധവും തമ്മിലുള്ള വ്യത്യാസം അതാണ്. “ ഡോക്ടർ ഗസൻ പറയുന്നു.

ഒരിക്കലും യുദ്ധം കണ്ടിട്ടില്ലാത്ത ഒരു ജനതയെ യുദ്ധത്തിൻ്റെ ഭീകരത പറഞ്ഞു മനസ്സിലാക്കൽ പ്രയാസമാണ്. അതിർത്തിയിൽ ഓരോ തവണ സംഘർഷുണ്ടാകുമ്പോഴും യുദ്ധത്തിന് വേണ്ടിയുള്ള മുറവിളികൾ ഉയരുന്നതും ഇതു കൊണ്ടാണ്. യുദ്ധം ഒരു വീഡിയോ ഗെയിമല്ല . പരിണാമപരമായി നോക്കിയാൽ യുദ്ധത്തിന് തുടക്കമോ ഒടുക്കമോ ഇല്ല, മറിച്ച് തുടർച്ച മാത്രമേ ഉള്ളൂ എന്ന് കാണാനാവും .

ഒരു യുദ്ധമുറിവ് എന്നാൽ അത് കാലത്തെ അടയാളപ്പെടുത്തുന്ന ഒരു ‘ ബയോളജിക്കൽ ആർക്കൈവ്’ ആണ്. ഒരു സൂം കോളിൽ ഡോ സിത്ത ഇത് പറയുമ്പോൾ അത് പൂർണാർത്ഥത്തിൽ ഗ്രഹിക്കാൻ പോലുമാകാതെ തരിച്ചിരിക്കാനേ സാധിച്ചുള്ളൂ . 

“ ആരാണ് അത് ചെയ്തത്, ആരുമായാണ് യുദ്ധം ചെയ്യുന്നത് അങ്ങനെ യുദ്ധത്തിന്റെ എല്ലാ കഥകളും മുറിവുകളിലുണ്ട്, ആ മുറിവുകള്‍ ജീവിതകാലം മുഴുവന്‍ രോഗിയുടെ കൂടെയുണ്ടാകും. 80 കളുടെ ആദ്യ പകുതിയില്‍ ഇറാഖ്- ഇറാന്‍ യുദ്ധത്തില്‍ ഇറാഖി, ഇറാനിയന്‍ സൈനികര്‍ക്ക് ഏറ്റ മുറിവുകള്‍ ഇന്നും സൈനികരില്‍ അവശേഷിക്കുന്നു. സദ്ദാം ഇല്ലാതായിട്ടും ഖൊമേനിയും റീഗനും മരിച്ചിട്ടും ആ യുദ്ധത്തില്‍ പങ്കെടുത്തവര്‍ പലരും മരിച്ചിട്ടും , മുറിവുകളുടെ ആഖ്യാനം അതേപടി നിലനില്‍ക്കുന്നു.

ചിലപ്പോള്‍ ആ ആഖ്യാനം നിലവിലെ രാഷ്ട്രീയ വ്യവഹാരത്തിന്റെ രാഷ്ട്രീയ പ്രത്യയശാസ്ത്രത്തിനോ രാഷ്ട്രീയ പദ്ധതിക്കോ വിരുദ്ധമായി മാറുന്നു. ഇറാഖും ഇറാനും സഖ്യകക്ഷികളായി മാറിയെങ്കിലും യുദ്ധ മുറിവുകളുടെ ആഖ്യാനത്തില്‍ അത് മാറ്റമുണ്ടാക്കുന്നില്ല. മുറിവുകള്‍ക്ക് ഹേതുവായ യുദ്ധത്തിന് കാരണമായ രാഷ്ട്രീയ പദ്ധതികളെക്കാള്‍ ആഖ്യാനങ്ങള്‍ നിലനില്‍ക്കുന്നു, അവ അതേപടി നിലനില്‍ക്കുന്നു.

ദക്ഷിണ വിയറ്റ്നാമിലെ പട്ടാളക്കാര്‍, ദക്ഷിണ വിയറ്റ്നാമീസ് സൈന്യവുമായി യുദ്ധം ചെയ്ത, വിയറ്റ്നാമില്‍ തങ്ങിയ, വിയറ്റ്നാമിലെ സൈനികരുടെ മുറിവുകള്‍, അവര്‍ അമേരിക്കക്കാരുമായി യുദ്ധം ചെയ്തതിന്റെ തുടര്‍ച്ചയായ ഓര്‍മ്മപ്പെടുത്തലാണ്. വിയറ്റ്നാം യുദ്ധത്തില്‍ ആഭ്യന്തരയുദ്ധത്തിന്റെ ഒരു ഘടകവും ഉണ്ടായിരുന്നു. പവര്‍ ഡൈനാമിക്സ് മാറുമ്പോള്‍ ഭരണത്തിലെ ഉന്നതര്‍ ഒന്നുകില്‍ ആ ആഖ്യാനങ്ങളെ ആഘോഷിക്കുകയോ അവഗണിക്കുകയോ ചെയ്യുന്നു. ഒരു മുറിവിന്റെ ആഖ്യാനം ചിലപ്പോള്‍ രാഷ്ട്രീയ പദ്ധതിക്ക് നാണക്കേടായി മാറുന്നു. അതുകൊണ്ടാണ് മുറിവുണ്ടാക്കിയ യുദ്ധത്തിന് ആ മുറിവ് ഒരു ജൈവ ചരിത്രരേഖയായി നിലനില്‍ക്കുമെന്ന് ഞാന്‍ പറയുന്നത്ഡോ.” സിത്ത പറയുന്നു. 

യുദ്ധത്തിൽ മുറിവേൽക്കുന്ന മനുഷ്യർ വാർധക്യത്തിലേക്കെത്തുന്ന പ്രക്രിയ പോലും അങ്ങനെ അല്ലാത്ത മനുഷ്യരുടേതിൽ  നിന്നും വ്യത്യസ്തമാണ്. വിമുക്തഭടന്മാരുടെ മെഡിക്കൽ രേഖകൾ പരിശോധിച്ചാൽ ഇക്കാര്യം വ്യക്തമാകും .  യുദ്ധം ബാധിച്ച പ്രദേശങ്ങളിൽ പ്രമേഹം, സാംക്രമികേതര രോഗങ്ങൾ തുടങ്ങിയവയുടെ സാധ്യത വളരെ കൂടുതലാണ്. യുദ്ധത്തിൽ പരിക്കേൽക്കുന്ന കുട്ടികൾക്ക് ഒന്നിലധികം ശസ്ത്രക്രിയകൾ ആവശ്യമായി വരുന്നത് കൊണ്ട് അവരുടെ വളർച്ചാ ഘട്ടത്തിൽ നിരവധി പ്രശ്നങ്ങൾ നേരിടേണ്ടി വരുന്നു. 

ശാസ്ത്രത്തിൻ്റേയും സാങ്കേതിക വിദ്യയുടേയും വളർച്ച യുദ്ധത്തിൻ്റെ സംഹാരശേഷി കൂട്ടാൻ ഉപയോഗിക്കപ്പെടുന്നു. വെളുത്ത ഫോസ് ഫറേറ്റ് പോലുള്ള മാരക രാസ പദാർത്ഥങ്ങൾ ഗസയിൽ ഉപയോഗിച്ചിട്ടുണ്ട്. തെർമൽ ബാരിക് ബോംബുകളാണ് മറ്റൊന്ന്. അവ വലിയ പൊട്ടിത്തെറി ഒന്നും ഉണ്ടാക്കില്ല . പക്ഷേ ആഴത്തിലുള്ള മാരകമായ മുറിവുകളും പൊള്ളലുമുണ്ടാക്കും. ക്വാഡ് കോപ്റ്ററുകളാണ് മറ്റൊന്ന്. സ്നൈപ്പറുള്ള ചെറിയ ഡ്രോണുകളാണ് ക്വാഡ് കോപ്റ്ററുകൾ. ഈ ക്വാഡ് കോപ്റ്റർ ഡ്രോണുകൾ സ്കൂളുകളേയും ആശുപത്രി കെട്ടിടങ്ങളേയുമാണ് ലക്ഷ്യം വെക്കുക . ഇത്തരം നവീന ആയുധങ്ങൾ കൊണ്ട് കൊല്ലപ്പെടുന്ന മനുഷ്യരുടെ ശരീരം തിരിച്ചറിയാൻ ആവാത്ത വിധം ചിതറിപ്പോയിരിക്കും. ഡോ ഗസ്സൻ അബു സിത്ത വിശദീകരിക്കുന്നു. 

യുദ്ധ മുറിവുകൾ ചികിത്സിക്കാൻ ഉതകും വിധം ആരോഗ്യ മേഖലയിൽ പുതിയ ഗവേഷണങ്ങൾ നടക്കുന്നില്ല. ഇതൊരു പ്രത്യേക പഠനശാഖ തന്നെയാണ്. യുദ്ധക്കെടുതികളുടെ നീണ്ട ചരിത്രമുള്ള രാജ്യങ്ങൾ പോലും ഈ മേഖലയിൽ കാര്യമായ ഗവേഷണ പ്രവർത്തനങ്ങൾ നടത്തുന്നില്ല. ഡോ ഗസ്സൻ്റെ ഈ നിരീക്ഷണം ശരിവെക്കുകയാണ് ട്രോമാ കെയർ സ്പെഷലിസ്റ്റായ ഡോ പോൾ റാൻസം . യുകെ സ്വദേശിയായ ഡോക്ടർ റാൻസം വർഷങ്ങളായി യുദ്ധ ബാധിത രാജ്യങ്ങളിലാണ് പ്രവർത്തിക്കുന്നത്. യുദ്ധമുഖത്ത് സൂപ്പർ സ്പെഷലിസ്റ്റുകളായ പാശ്ചാത്യ ഡോക്ടർമാരേക്കാൾ കാര്യശേഷി ഉള്ളത് അങ്ങനെയല്ലാത്ത ഇന്ത്യൻ ഡോക്ടർമാർക്കാണെന്ന് ഡോക്ടർ പോൾ റാൻസം പറയുന്നു. പലതരം ദുരന്ത സാഹചര്യങ്ങളിൽ നിന്നുള്ള മനുഷ്യരെ അത്യാധുനിക സാങ്കേതിക വിദ്യകളുടെ സഹായമൊന്നുമില്ലാതെ ചികിത്സിച്ച് പരിചയുള്ള ഡോക്ടർമാർക്കാണ് പലപ്പോഴും യുദ്ധരംഗത്ത് ഫലപ്രദമായി പ്രവർത്തിക്കാൻ കഴിയുക . ആഫ്രിക്കൻ രാജ്യങ്ങളിൽ നിന്നും ഇന്ത്യയിൽ നിന്നുമുള്ള ഡോക്ടർമാർക്ക് അത് കൊണ്ട് തന്നെ യുദ്ധരംഗത്ത് വലിയ സേവനം നിർവ്വഹിക്കാൻ കഴിയും . ഹസാർഡസ് ഏരിയ ലൈഫ് സപ്പോർട്ട് ഓർഗനൈസേഷൻ(HALO ) എന്ന സംഘടനയുടെ മെഡിക്കൽ ടീമിനെ നയിക്കുന്നത് ഡോക്ടർ പോൾ ആണ്. സംഘർഷ മേഖലകളിൽ ചെന്ന് കുഴിബോംബുകളും മറ്റ് സ്ഫോടക വസ്തുക്കളും കണ്ടെടുത്ത് നിർവ്വീര്യമാക്കുന്ന പ്രവർത്തനമാണ് HALO എന്ന സംഘടന നടത്തുന്നത്. “ആയിരക്കണക്കിന് മെറ്റൽ ചീളുകളുള്ള തരം ബോംബുകളാണ് ഗസയിൽ പ്രയോഗിക്കപ്പെടുന്നത്. ശരീരത്തിലെമ്പാടും ഇവ തറച്ചു കയറും. ഇത്തരം മുറിവുകൾ ചികിത്സിക്കുക എന്നത് വലിയ വെല്ലുവിളിയാണ്.” ഡോക്ടർ പോൾ പറയുന്നു. ഗസയിലേത് പോലെ ക്രൂരവും ഹൃദയ ഭേദകവുമായ മുറിവുകൾ ജീവിതത്തിലിതുവരെ കണ്ടിട്ടില്ലെന്ന് ഡോക്ടർ പറയുന്നു. 

“നിങ്ങൾക്ക് മുന്നിൽ മൂന്ന് മാർഗ്ഗങ്ങളാണ് ഉള്ളത് . ഒന്നുകിൽ കൊല്ലപ്പെടുക, അല്ലെങ്കിൽ തുറുങ്കിലടക്കപ്പെടുക, അതുമല്ലെങ്കിൽ സൂരക്ഷിത സ്ഥാനത്തേക്ക് ഒഴിപ്പിക്കപ്പെടുക. നിങ്ങൾ ഇതിലേത് തെരഞ്ഞെടുക്കും?” ഗസയിലെ ഖാൻ യൂനുസ് ആശുപത്രിയിലെ പ്ലാസ്റ്റിക് സർജൻ ഡോ. അഹ്മ്മദ് മൊഖ്റാബി ചോദിക്കുന്നു. ഖാൻ യൂനുസ് ആശുപത്രിയിലെ ബോംബാക്രമണത്തിന് തൊട്ടുമുൻപ് ഒഴിപ്പിക്കപ്പെട്ട നിരവധി പേരിൽ ഒരാളാണ് ഡോക്ടർ മൊഖ്റാബി. ഹിരോഷിമയിലോ നാഗസാക്കിയിലോ കണ്ടതിനേക്കാൾ എത്രയോ മടങ്ങ് ക്രൂരവും ഹൃദയഭേദകവുമാണ് ഇപ്പോൾ ഗസയിൽ നടക്കുന്ന കാര്യങ്ങളെന്ന് ഡോക്ടർ മൊഖ്റാബി പറയുന്നു. “ ലോകത്തിൻ്റെ ശ്രദ്ധ മുഴുവൻ ഗസയിലേക്ക് വന്നത് 2023 ഒക്ടോബർ 7 ന് ശേഷമാണ്. എന്നാൽ കഴിഞ്ഞ 20 വർഷമായി ഞങ്ങൾ ഉപരോധം നേരിടുകയാണ്. 2006 ൽ ഹമാസ് പാർലിമെൻ്റ് തെരഞ്ഞെടുപ്പ് ജയിച്ചപ്പോൾ മുതൽ ഇതാണവസ്ഥ . ലോകത്തിലെ ഏറ്റവും വലുതും പുരാതനവുമായ തുറന്ന ജയിൽ ഏതാണെന്ന് ചോദിച്ചാൽ അതിന് ഒരുത്തരമേയുള്ളൂ. അത് ഗസയാണ്. മരിക്കുക അല്ലാതെ മറ്റൊരു മാർഗ്ഗവും ജനങ്ങളുടെ മുന്നിലില്ല.” വീഡിയോ കോളിൽ തൊണ്ടയിടറി ഡോ. മൊഖ്റാബി സംസാരിക്കുമ്പോൾ തുടർന്ന് ചോദിക്കാൻ ഒരു ചോദ്യം പോലുമില്ലാതെ കേട്ടിരിക്കേണ്ടി വന്നു. 

“ ഞങ്ങളിൽ ഇനി എത്ര പേർ മരിച്ചാലാണ് ഈ യുദ്ധത്തിന് ഒരു അറുതി ആവുക” എന്ന് ചോദിച്ച് പൊട്ടിക്കരയുന്ന ഡോ മൊഖ്റാബിയുടെ വീഡിയോ ലോകം മുഴുവൻ കണ്ടിരുന്നു. 2023 ഡിസംബർ 6 നാണ് ഖാൻ യൂസുഫ് ആശുപത്രിയിൽ നിന്നുള്ള വീഡിയോ ഇൻസ്റ്റഗ്രാമിലൂടെ ലോകം കണ്ടത്. 

എല്ലാവരും ഏക സ്വരത്തിൽ പറയുന്ന ഒരു കാര്യം, ഗസയിൽ നടക്കുന്നത് വംശഹത്യയല്ലാതെ മറ്റൊന്നുമല്ല എന്നാണ്. ഇതുവരെ (ജനുവരി 2025) രണ്ട് ലക്ഷത്തിലേറേ പേർ കൊല്ലപ്പെട്ടു. മൊത്തം ജനസംഖ്യയുടെ 20 ശതമാനം. ആശുപത്രികളേയും സ്കൂളുകളേയും ലക്ഷ്യം വെക്കുന്ന ബോംബുകളും മിസൈലുകളും – ഭക്ഷണവും മരുന്നു മടക്കമുള്ള ജീവൽ സഹായങ്ങൾ അതിർത്തിയിൽ തടയപ്പെടുന്നു. ഇതല്ലെങ്കിൽ മറ്റെന്താണ് വംശഹത്യ ? ഡോക്ടർ അഹമ്മദ് മൊഖ്റാബി ചോദിക്കുന്നു. 

എന്താണ് യുദ്ധം എന്നറിയാത്ത മനുഷ്യരോട് മലയാളിയായ ഡോക്ടർ സന്തോഷ് കുമാർ വിശദീകരിക്കുന്നത് ഇങ്ങനെയാണ്. “ നിങ്ങൾക്ക് ടോയ്ലറ്റിൽ പോകാൻ തോന്നുമ്പോൾ നിങ്ങൾക്ക് മുന്നിൽ 250 പേരുടെ ക്യൂ ഉണ്ടെങ്കിൽ നിങ്ങൾ എന്ത് ചെയ്യും? അങ്ങനെ ഒരവസ്ഥ ആലോചിക്കാൻ കഴിയുന്നുണ്ടോ? രണ്ടോ മൂന്നോ ദിവസം ഭക്ഷണം കഴിക്കാതെ ഭക്ഷണത്തിനായി ക്യൂ നിന്ന് ഒടുവിൽ ഭക്ഷണം കിട്ടാതെ വരുന്ന അവസ്ഥ അനുഭവിച്ചിട്ടുണ്ടോ? യുദ്ധക്കെടുതി എന്നത് അതൊരിക്കലും അനുഭവിച്ചിട്ടില്ലാത്ത മനുഷ്യരുടെ ഭാവനയിൽ ഒതുങ്ങുന്നതല്ല. അനുഭവിച്ചാൽ മാത്രം മനസ്സിലാകുന്ന മഹാനരകമാണ് യുദ്ധം .  രാജ്യസ്നേഹത്തിൻ്റെ പ്രകടനമായി യുദ്ധാഭിമുഖ്യം കൊണ്ടു നടക്കുന്നവർക്ക് ഒരിക്കലും മനസ്സിലാകാത്ത ഒന്നാണത്.”