ഡിജിറ്റൽ കമ്മ്യൂണിക്കേഷൻ & സോഷ്യൽ മീഡിയ: കെഎസ്ഇബിയെ ജനങ്ങളിലെത്തിക്കാൻ ‘സ്മാർട്ട് സോഷ്യൽ’
പുതിയ തലമുറ ആശയങ്ങളും അഭിപ്രായങ്ങളും തുറന്നുപറയുന്നതും വിവരങ്ങൾ അറിയുന്നതും വിമർശനങ്ങൾ പങ്കുവയ്ക്കുന്നതുമെല്ലാം നവ മാധ്യമങ്ങളിലൂടെയാണല്ലോ. പരമ്പരാഗത മാധ്യമങ്ങളുടെ ഉപയോഗം വളരെ കുറഞ്ഞ പുതിയ തലമുറയോട് അപ്പോൾ എങ്ങനെയാണ് സംവദിക്കാനാവുക? കെഎസ്ഇബി പോലുള്ള പൊതുമേഖലാ സ്ഥാപനങ്ങളുടെ പ്രവർത്തനങ്ങൾ അതുകൊണ്ടുതന്നെയാണ് പുതിയ തലമുറ വേണ്ടവിധത്തിൽ തിരിച്ചറിയാതെ പോകുന്നത്.” കെഎസ്ഇബി ഓഫീസർമാർക്കായി, ഡിജിറ്റൽ കമ്മ്യൂണിക്കേഷൻ & സോഷ്യൽ മീഡിയ എന്ന വിഷയത്തിൽ ഒബിസി സംഘടിപ്പിച്ച ഏകദിന ശില്പശാലയിൽ ഉയർന്ന ആശങ്കയാണിത്.
എങ്ങനെയാണ് ആശയവിനിമയത്തിനായി നവ മാധ്യമങ്ങളെ ഫലപ്രദമായി പ്രയോജനപ്പെടുത്തുക? ഇപ്പോഴും ജനങ്ങൾക്ക് പരിചിതമല്ലാത്ത കെഎസ്ഇബിയുടെ പ്രവർത്തനങ്ങളും അപ്‌ഡേറ്റുകളും എങ്ങനെ ജനങ്ങളിലേക്ക് എത്തിക്കാം, കെ എസ് ഇ ബിയെ കുറിച്ച് നിരന്തരം പ്രചരിക്കുന്ന വ്യാജവാർത്തകളെ എങ്ങനെ പ്രതിരോധിക്കാം, തുടങ്ങിയ സംശയങ്ങൾ ശില്പശാലയിൽ പങ്കെടുത്ത കേരളത്തിലെ വിവിധ ജില്ലകളിൽ നിന്നുള്ള മിക്ക ഓഫീസർമാർക്കുണ്ടായിരുന്നു. അവരുടെ എല്ലാ ചോദ്യങ്ങൾക്കുമുള്ള ഉത്തരമായിരുന്നു ഒബിസിയുടെ വർക്ക്ഷോപ്പ്.
സാമൂഹ്യ മാധ്യമങ്ങളിലൂടെ എങ്ങനെ കൂടുതൽ കാര്യക്ഷമമായി ഡിജിറ്റൽ ആശയവിനിമയം നടത്താം എന്ന വിഷയത്തിൽ, കമ്മ്യൂണിക്കേഷൻ സ്ട്രാറ്റജിസ്റ്റും,ബ്രിഡ്ജിങ് ഡോട്ട് സൊല്യൂഷൻസിന്റെ സി.ഇ.ഓയുമായ പി ജി പ്രബോധ്, മാധ്യമ പ്രവർത്തകൻ ഷഫീക് താമരശ്ശേരി, മുതിർന്ന മാധ്യമപ്രവർത്തകയും ഒബിസിയുടെ ഫൗണ്ടറുമായ ഷാഹിന കെ കെ, ഓപ്പൺ സോഴ്സ് ഇന്റലിജൻസ് റിസേർച്ചറും ഫാക്ട് ചെക്കറുമായ എ സുജിത് എന്നിവർ വിവിധ സെഷനുകളിൽ ക്ലാസ് നയിച്ചു. സോഷ്യൽ മീഡിയ എൻഗേജ്മെന്റ്, കോൺടെന്റ് പ്ലാനിംഗ് ആൻഡ് ടൂൾസ്, ഫാക്റ്റ് ചെക്കിംഗ് & വെരിഫിക്കേഷൻ, ഡിജിറ്റൽ സേഫ്റ്റി എന്നീ മോഡ്യൂളുകളിൽ ചിട്ടപ്പെടുത്തിയ സെഷനുകൾ രസകരവും വിജ്ഞാനപ്രദവുമായ പഠനാനുഭവമായി.
നവമാധ്യമങ്ങളിൽ കൂടുതൽ ഇടപെടലുകൾ നടക്കുന്ന ഫേസ്ബുക്കിൽ, പോസ്റ്റുകൾക്ക് മികച്ച റീച്ചും സജീവതയും ഉറപ്പാക്കാൻ, പേജ് എങ്ങനെ കൈകാര്യം ചെയ്യണം എന്നതിനെക്കുറിച്ച് ഒബിസി മാർഗ്ഗനിർദ്ദേശങ്ങൾ നൽകി. കെഎസ്ഇബിയുടെ യൂട്യൂബ്, എക്സ്, ഇൻസ്റ്റാഗ്രാം അക്കൗണ്ടുകളുടെ നിലവിലെ പ്രവർത്തനങ്ങൾ പഠിച്ച്, അതെങ്ങനെ കൂടുതൽ സംവേദനാത്മകമാക്കാം എന്നും ഒബിസി വിലയിരുത്തി.
ഗെയിമിങ് ആക്റ്റിവിറ്റികളിൽ കൂടിയുള്ള ഡിജിറ്റൽ പഠനം കൂടുതൽ ആസ്വാദ്യകരമായി. ഫാക്ട് ചെക്കിങ്ങിന് ഉപയോഗിക്കേണ്ട ടൂളുകളെ കുറിച്ചും കാൻവാ, ബർഫി പോലുള്ള ഡിസൈനിങ്, എഡിറ്റിങ് ആപ്പുകളുടെ പ്രവർത്തന രീതികളെക്കുറിച്ചും ലളിതമായ പാഠങ്ങൾ നൽകിയ ശില്പശാല, ഏറ്റവും നവ്യമായ ഒരു അനുഭവമായെന്ന് ശില്പശാലയിൽ പങ്കെടുത്തവർ രേഖപ്പെടുത്തി.
