കാലാവസ്ഥാ പ്രവചനത്തിന്‍റെ മുതലാളിത്ത രാഷ്ട്രീയം

അതിതീവ്രമഴ, കടുത്ത വേനൽ തുടങ്ങി പ്രവചനാതീതമായ കാലാവസ്ഥയാണ് കേരളത്തിൽ ഇപ്പോഴുള്ളത്. ഉരുൾപൊട്ടൽ, കടലേറ്റം, മേഘവിസ്‌ഫോടനം മൂലമുള്ള കനത്ത മഴ തുടങ്ങിയ പ്രകൃതി ദുരന്തങ്ങളും കേരളത്തിൽ തുടർക്കഥയാവുകയാണ്. ആ സാഹചര്യത്തിൽ, ദുരന്തനിവാരണത്തിന്‍റെ ശാസ്ത്രീയതയെയും രാഷ്ട്രീയത്തെയും കുറിച്ച് സംസ്ഥാന ദുരന്ത നിവാരണ അതോറിറ്റി മെമ്പർ സെക്രട്ടറി ഡോ. ശേഖർ എൽ കുര്യാക്കോസ് സംസാരിക്കുന്നു. 

കേരളത്തിലെ കാലാവസ്ഥാ ചർച്ചകളിൽ, എല്ലായ്പ്പോഴും അതിതീവ്ര മഴ മാത്രമാണ് ഉൾപ്പെടാറുള്ളത്. ആകെ ലഭിക്കുന്ന മഴയിൽ കാര്യമായ വ്യത്യാസമുണ്ടായിട്ടില്ല എങ്കിലും കേരളത്തിലെ അതിതീവ്രമായ മഴദിനങ്ങളുടെ എണ്ണത്തിൽ കഴിഞ്ഞ ഏതാനും വർഷങ്ങളായി വർദ്ധനവുണ്ടായിട്ടുണ്ട് എന്നുകാണാം. സാധാരണത്തേക്കാൾ 13 ദിവസങ്ങൾ നേരത്തെതന്നെ ഈ വർഷം(2025) മൺസൂൺ എത്തിയിരുന്നു. ആദ്യമായിട്ടല്ല ഇത് സംഭവിക്കുന്നതെങ്കിൽ പോലും, ആദ്യത്തെ നാല് ദിവസങ്ങൾക്കുള്ളിൽ തന്നെ 500 മില്ലിമീറ്ററിലധികം മഴയാണ് ലഭ്യമായത്. അപ്പോഴും കേരളത്തിൽ റിപ്പോർട്ട് ചെയ്യപ്പെടുന്ന അതിതീവ്രമായ ചൂടിനെക്കുറിച്ചു വേണ്ടവിധം ചർച്ചകളുണ്ടാകാറില്ല. 2021 മുതൽ തന്നെ കേരളത്തിൽ അതി തീവ്രമായ ചൂട് രേഖപ്പെടുത്തുന്നുണ്ട്. ചരിത്രത്തിലാദ്യമായി, 2023ൽ കേരളത്തിൽ ഉഷ്ണതരംഗ മുന്നറിയിപ്പ് പുറപ്പെടുവിച്ചിരുന്നു.

2012ലെ വരൾച്ച മുതലാണ് ഇത്തരം തീവ്രമായ കാലാവസ്ഥാ വ്യതിയാനങ്ങള്‍ ശ്രദ്ധയിൽപ്പെട്ടു തുടങ്ങുന്നത്. 2012-13 കാലയളവിൽ, അന്നുവരെ കാണാത്തത്ര തീവ്രതയിലുള്ള വരൾച്ചയാണ് കേരളത്തിലുണ്ടായത്. ആ സമയത്ത് കൊല്ലം ശാസ്താംകോട്ട കായലിൽ പമ്പിങ്ങിനുള്ള വെള്ളം തികയാതെ വന്നിട്ടുണ്ട്. അതേ തുടർന്ന് കല്ലടയാറ്റിൽ നിന്ന് ഡാം തുറന്ന് വിട്ട് വെള്ളം ശാസ്താംകോട്ട കായലിൽ എത്തിക്കുക എന്ന നിർദേശമുണ്ടായി. 2016ൽ അതേ തീവ്രതയിലൊരു വരൾച്ച വന്നപ്പോൾ ആ നിർദേശം നടപ്പിലാക്കുകയും ചെയ്തു. തിരുവനന്തപുരത്തുള്ള അരുവിക്കര ഡാമും ഇത്തരത്തിൽ ഏറെ പഴക്കമുള്ളതാണ്. ഈ ഡാമിൽ ഒരിക്കൽ വെള്ളമില്ലാത്ത അവസ്ഥ വന്നപ്പോൾ നെയ്യാർ ഡാമിൽ നിന്ന് പൈപ്പിട്ട്, കനാലുകളും പമ്പുകളും വഴിയാണ് നഗരത്തിലേക്ക് വെള്ളമെത്തിച്ചത്.​​ ഇത്തരം സാഹചര്യങ്ങൾ ഉൾക്കൊണ്ടുകൊണ്ട്, അവയെ അതിജീവിക്കാനുള്ള ശേഷിയാണ് നാം ആർജജിച്ചെടുക്കേണ്ടത്. 

 കാലാവസ്ഥാ പ്രവചനങ്ങളിലെ പാകപ്പിഴകൾ 

കാലാവസ്ഥ പ്രവചനത്തിനായുള്ള മോഡലുകളിലെല്ലാം ചില കണക്കുകൾ സംയോജിപ്പിക്കപ്പെട്ടിട്ടുണ്ട്. ഭൂമിയിൽ നമുക്ക് അറിയാത്ത ഒരുപാട് പ്രതിഭാസങ്ങളുണ്ടല്ലോ. ഇവയെ എല്ലാം ചേർത്ത് നാം ‘എപ്സിലോൺ’ എന്നാണ് വിളിക്കുന്നത്. നമുക്കറിയാത്ത പ്രതിഭാസങ്ങള്‍ മൂലം സംഭവിച്ചേക്കാവുന്ന മാറ്റങ്ങളും അനിശ്ചിതത്വവും, അറിയാമെന്ന് നാം ധരിക്കുന്ന പല കാര്യങ്ങളെ വരെ പല രീതിയിലും ബാധിക്കാം. സ്ഥലകാലങ്ങള്‍ ഒരേ രീതിയിൽ പ്രവചിക്കാൻ സഹായിക്കുന്ന സംവിധാനങ്ങൾ ഇപ്പോഴുമില്ല. അത് ഗണിതശാസ്ത്രപരമായി ലോകം മുഴുവന്‍ നില നിൽക്കുന്ന ഒരു പരിമിതിയാണ്. ഇവ പരിഹരിക്കാനുള്ള ശ്രമം നടന്നുവരികയാണ്.

2018ൽ പെയ്ത മഴയെക്കാൾ എത്രയോ മടങ്ങ് അധികം മഴയാണ് 2019ൽ പെയ്തത്. അത് പൊതു സമൂഹത്തിന്റെ ശ്രദ്ധയിൽ വന്നിട്ടില്ല. കാരണം അന്ന് പെയ്ത മഴയിൽ കൂടുതലും വടക്കൻ കേരളത്തിലായിരുന്നു. മധ്യ കേരളത്തിലേത് പോലെ ജനവാസം ഇല്ലാത്തതിനാൽ അവിടെ പെയ്ത മഴ അധികം ആളുകൾ അറിഞ്ഞിട്ടില്ല. കവളപ്പാറ, പുത്തുമല തുടങ്ങിയ സ്ഥലങ്ങളിലെല്ലാം ഉരുൾ പൊട്ടി വലിയ നാശനഷ്ടങ്ങൾ ഉണ്ടാവുകയും ഒരുപാട് പേർ മരിക്കുകയും ചെയ്തിട്ടുണ്ട്. 

കാലാവസ്ഥാ പ്രവചനത്തിന്റെ രാഷ്ട്രീയം 

പ്രവചനങ്ങൾ നടത്തുന്നത് പല തട്ടിലാണ്. മൂന്നു മണിക്കൂറിനുള്ളിലുള്ള പ്രവചനത്തെ നമ്മൾ ‘നൗകാസ്റ്റ്’എന്ന് വിളിക്കുന്നു. അടുത്ത 24 മണിക്കൂറിൽ, അല്ലെങ്കിൽ അടുത്ത 5 ദിവസം എന്ത് സംഭവിക്കുമെന്ന പ്രവചനത്തെയാണ് ‘ഫോർകാസ്റ്റ്’ എന്ന് പറയുന്നത്. ഇവയോരോന്നും വ്യത്യസ്‍തമായ രീതികളിലാണ് നടത്തുന്നത്. അതിന് പുറമെ നമ്മൾ നടത്തുന്ന സൂക്ഷ്മമായ പ്രവചനങ്ങളുമുണ്ട്. കേരളത്തിലെ ഓരോ ഇഞ്ച് ഭൂമിയിലും ഈ സൂക്ഷ്മത പുലര്‍ത്തുന്നതിന്  നമുക്ക് പരിമിതിയുണ്ട്.    

 ഇന്ത്യയിലെ ഏറ്റവും വലിയ നിരീക്ഷണ ശൃംഖലയുള്ളത് കേന്ദ്ര കാലാവസ്ഥ വകുപ്പിനാണ്. കാലാവസ്ഥാ നിരീക്ഷണകേന്ദ്രങ്ങൾ, മഴ മാപിനികൾ, റഡാറുകൾ, ഉപഗ്രഹങ്ങള്‍, കപ്പലുകളിൽ നിന്നുള്ള വിവരങ്ങൾ, ഇതെല്ലമാണ് സ്രോതസ്സുകൾ. ഇതെല്ലാം സംയോജിപ്പിച്ചു സമഗ്രമായ ഒരു ഔട്ട്പുട്ട് തയ്യാറാക്കുന്ന സംവിധാനമെന്ന നിലയിൽ, ഭാരത് ഫോർകാസ്റ്റ് സിസ്റ്റം കൊണ്ട് വന്നു. 6 കിലോമീറ്റർ റെസല്യൂഷനിലാണ് ഇതിൽ പ്രവചനം സാധ്യമാവുക. ഈ 6×6 കിലോമീറ്ററിന്റെ ഗ്രിഡ് എടുത്ത് തിരുവനന്തപുരം നഗരത്തിന് മുകളിൽ വച്ചാൽ പൊന്മുടിയും നഗരത്തിന്റെ ചില ഭാഗങ്ങളും ചിലപ്പോൾ ഒരേ ഗ്രിഡിൽ വരും. ഇത് നമ്മുടെ സാങ്കേതിക പരിമിതിയാണ്.

എന്നാൽ ഐബിഎം എന്ന സ്വകാര്യ കമ്പനിയെ നോക്കൂ. 15 ഏക്കറോളം വരുന്ന ഭൂമിയിൽ ബഹുനിലക്കെട്ടിടങ്ങളിലായാണ് ഇവരുടെ സെർവറുകൾ സ്ഥിതി ചെയ്യുന്നത്. ഐഎംഡി, വിമാനങ്ങൾ, നമ്മുടെ സ്മാർട്ട് ഫോണുകൾ തുടങ്ങിയവയിൽ നിന്നാണ് അവർ ഡാറ്റ എടുക്കുന്നത്.  ശേഖരിച്ച വിവരങ്ങൾ വച്ച് ഒരു കിലോമീറ്ററിൽ ഔട്ട്പുട്ട് തരാനുള്ള മോഡലുകൾ പ്രവർത്തിപ്പിക്കാനുള്ള കാര്യശേഷി ആ സ്വകാര്യ കമ്പനിക്കുണ്ട്. ആ കാര്യശേഷിയിലേക്ക് എത്തണമെങ്കിൽ അത്രയും ചിലവുണ്ട്. പൊതുപ്പണം ചെലവഴിച്ചാണ് കേന്ദ്ര കാലാവസ്ഥ വകുപ്പ് ഇത് ചെയ്യുന്നത്. ഒരു മുതലാളിത്ത രാജ്യത്തിൽ ഒരു സ്വകാര്യ കമ്പനി ചെയ്യുന്ന കാര്യത്തെ ഒരിക്കലും ഒരു പൊതുമേഖലാ സ്ഥാപനത്തിന്റെ പ്രവർത്തനങ്ങളുമായി താരതമ്യം ചെയ്യാൻ കഴിയില്ല. കാലാവസ്ഥ പ്രവചനത്തിന് രാഷ്ട്രീയമുണ്ടോ എന്ന ചോദ്യത്തിന്റെ ഉത്തരവും ഇത് തന്നെയാണ്; അത് മുതലാളിത്തത്തിന്റെ രാഷ്ട്രീയമാണ്. അവരുടെ കൈവശമുള്ള ഡാറ്റ കൂടി പണം കൊടുത്തു വാങ്ങാനുള്ള ശേഷി കേരളത്തിനുണ്ടോ എന്ന് പരിശോധിക്കേണ്ടതുണ്ട്. കേരളത്തിലത് ഒരു വർഷത്തോളം പരീക്ഷിച്ചു നോക്കിയിരുന്നു. എന്നാൽ, സാമ്പത്തിക ഭാരം മൂലം തുടരാൻ കഴിയാതെ വരികയായിരുന്നു.

കേന്ദ്ര കാലാവസ്ഥ വകുപ്പ് റെഡ് അലർട്ട് തന്നാൽ, അതിൽ വേണ്ട നടപടികൾ സ്വീകരിച്ചുമുന്നോട്ട് പോകേണ്ട ചുമതല സംസ്ഥാന സർക്കാരിനുണ്ട്. കേന്ദ്ര മുന്നറിയിപ്പുകളുടെ അഭാവത്തിൽ, മുന്നറിയിപ്പുകളുടെ പൂർണ്ണ ചുമതല  സർക്കാരിനുതന്നെ. അവയിൽ ഏതെങ്കിലും പിഴവ് സംഭവിക്കുകയോ ഏതെങ്കിലും രീതിയിൽ നാശനഷ്ടങ്ങളുണ്ടാവുകയോ ചെയ്താൽ സംസ്ഥാന സർക്കാർ തന്നെയാണ് ഉത്തരവാദിത്തം ഏറ്റെടുക്കേണ്ടി വരിക. മത്സ്യതൊഴിലാളികളുടെ കാര്യത്തിൽ പലപ്പോഴും ഇത് മുൻകൂട്ടി കണക്കാക്കി പ്രവർത്തിക്കേണ്ടി വരാറുണ്ട്. അതി തീവ്ര കാലാവസ്ഥയുടെ സാഹചര്യത്തിൽ തീരം അടക്കേണ്ടി വരുമ്പോൾ സംസ്ഥാന ദുരന്ത നിവാരണ അതോറിറ്റിയുടെ ഫണ്ടിൽ നിന്ന് തൊഴിലാളികൾക്ക് നഷ്ടപരിഹാരം നൽകേണ്ട സാഹചര്യങ്ങൾ ഉണ്ടായിട്ടുണ്ട്. എന്നാൽ ഈ വിഷയത്തിലെ വിദഗ്ദ്ധർക്ക് ഈ രീതിയോട് എതിർപ്പ് നിലനിൽക്കുന്നുണ്ട്. 

സാങ്കേതിക സൗകര്യങ്ങളുടെ അപര്യാപ്തത 

 കേന്ദ്ര കാലാവസ്ഥാ വകുപ്പിന്റെ കാലാവസ്ഥാ നിരീക്ഷണ കേന്ദ്രങ്ങൾ ഏറ്റവുമധികം സ്ഥിതി ചെയുന്നത് കേരളത്തിലാണ്. ‘ബ്യൂറോ ഓഫ് ഇന്ത്യൻ സ്റ്റാൻഡേർഡ്‌സി’ന്റെ കണക്ക് പ്രകാരം, ഏകദേശം 256 കാലാവസ്ഥ നിരീക്ഷണ കേന്ദ്രങ്ങളാണ് കേരളത്തിൽ വേണ്ടത്. നിലവിലുള്ള 136 നിരീക്ഷണ കേന്ദ്രങ്ങളും മഴ മാപിനികളും കൂടുതലും സ്ഥിതി ചെയ്യുന്നത് ഇടനാട്ടിലും സമനിലങ്ങളിലുമാണ്. എന്നാൽ, മഴ മേഖലകൾ മുഴുവനും കാടുകളിൽ ആണെന്നതുകൊണ്ട് അവിടെയും നിരീക്ഷണകേന്ദ്രങ്ങൾ വേണം. വനങ്ങളിൽ ഇത്തരം സംവിധാനങ്ങൾ സ്ഥാപിക്കുന്നതിൽ ഒരുപാട് പരിമിതികളുണ്ട്. അവിടെ, ഡാറ്റ സ്ട്രീമിങ്ങിന്റെ സാദ്ധ്യതകൾ കുറവാണ്. കൂടാതെ വന്യജീവി ശല്യങ്ങളും നേരിട്ടേക്കാം. ഇതെല്ലാം നമ്മുടെ നിയന്ത്രണത്തിനപ്പുറമുള്ള പരിമിതികളാണ്.

കേരളത്തിൽ ശരാശരി മൂന്നു റഡാറുകൾ വേണമെന്ന ആവശ്യം, 2011 മുതൽ നാം യൂണിയൻ സർക്കാരിനോട് ഉന്നയിക്കുന്നതാണ്. എറണാകുളത്ത് ഏകദേശം 200 കിലോമീറ്റർ റേഞ്ച് ഉള്ള സീ ബാങ്ക് റഡാറുണ്ട്. ഇപ്പോൾ വയനാട്ടിൽ ഒരു എക്സ്-ബാൻഡ് റഡാർ അനുവദിക്കപ്പെട്ടു. മൂന്നാമത്തെ റഡാർ തിരുവനന്തപുരത്താണ് ആവശ്യം. നിലവിലുള്ള ഐഎസ്ആർഓയുടെ റഡാർ അടിയന്തിര സാഹചര്യങ്ങളിൽ മാത്രമാണ് പ്രവർത്തിപ്പിക്കാറുള്ളത്. മംഗലാപുരത്തുള്ള സീ ബാങ്ക് റഡാർ നമുക്കും ഉപയോഗപ്പെടുന്ന തരത്തിലുള്ളതാണ്. 

എന്നാൽ, നിരീക്ഷണ സംവിധാനങ്ങളോ സാങ്കേതികമികവോ ഉള്ളത് കൊണ്ട് മാത്രം പ്രശ്നം പരിഹരിക്കപ്പെടില്ല. ഇത്തരം മുന്നറിയിപ്പുകൾക്കനുസരിച്ച് പ്രവർത്തിക്കാൻ ആളുകൾ കൂടി തയ്യാറാവേണ്ടതുണ്ട്. 

 കേരളത്തിലുള്ളൊരു സവിശേഷമായ പദ്ധതിയാണ്  ‘Susceptibility Relocation’. ദുരന്ത സാധ്യതയുള്ള സ്ഥലങ്ങളിൽ നിന്ന് ആളുകളെ മാറ്റി പാർപ്പിക്കാനായി സാമ്പത്തിക സഹായം നൽകുന്ന പദ്ധതിയാണിത്. 10 ലക്ഷം രൂപയാണ് അനുവദിക്കുക. തുക സ്വീകരിച്ചു കൊണ്ട് ഏകദേശം 4500 കുടുംബങ്ങൾ മലയോര മേഖലയിൽ നിന്ന് മാറി പോയിട്ടുണ്ട്. പക്ഷെ അവർ താമസിച്ചിരുന്ന പഴയ സ്ഥലം അവരുടെ ഉടമസ്ഥതയിൽ നില നിർത്തുകയും ചെയ്യും. അവിടെ അവർക്ക് കൃഷി ചെയ്യാമെന്ന ഉദ്ദേശത്തോടെയാണ് ഇങ്ങനെയൊരു നടപടിയുണ്ടായത്. എന്നാൽ ചിലർ അവിടെ സോളാർ പാനലുകൾ സ്ഥാപിച്ച് ഹോം സ്റ്റേ നടത്തി. അനുവദിക്കപ്പെട്ട പുതിയ വീട് വാടകക്ക് കൊടുത്ത് പഴയ സ്ഥലത്തു തന്നെ താമസം തുടരുകയും തുടർന്ന് ഉരുൾ പൊട്ടൽ പോലുള്ള ദുരന്തങ്ങളിൽ മരിച്ചവരുമുണ്ട്. ദുരന്ത നിവാരണത്തിനായി സർക്കാർ ചെയ്യുന്ന പ്രവർത്തനങ്ങളെയെല്ലാം പരാജയപ്പെടുത്തുന്ന തരത്തിലുള്ള മാനസികനില ഉള്ളയാളുകളുണ്ടെന്നാണ് ഇത്തരം സംഭവങ്ങൾ കാണിക്കുന്നത്.

കേരള സമൂഹത്തിന്‍റെ  പോരാട്ടവീര്യം

കേരളത്തിലും ഒഡിഷയിലും മാത്രമാണ് പഞ്ചായത്തുകൾക്ക് സ്വന്തമായി ഡിസാസ്റ്റർ മാനേജ്‌മന്റ് പ്ലാൻ ഉള്ളത്. ദുരന്തത്തിന്‍റെ ആഘാതം കുറക്കുന്നതിൽ ‘കമ്മ്യൂണിറ്റി റെസിലിയൻസ്’ വഹിച്ച വലിയ പങ്കിന്‍റെ മികച്ച ഉദാഹരണം മീനച്ചിൽ നദീതടത്തിലാണ്. മീനച്ചിൽ നദീ – മഴ നിരീക്ഷണ ശൃംഖല എന്ന കർഷക സംഘടനയാണ് ഇതിന് നേതൃത്വം നൽകിയത്. കൂട്ടായ്മയുടെ പ്രവർത്തനങ്ങൾ നല്ല രീതിയിൽ വികസിക്കുന്നുവെന്നു കണ്ടപ്പോൾ കാലാവസ്ഥ – പരിസ്ഥിതി വകുപ്പുകൾ അവർക്ക് സഹായങ്ങൾ നൽകാൻ തുടങ്ങി. സഹായങ്ങൾ ഇല്ലെങ്കിലും അവർക്ക് സ്വതന്ത്രമായി നിലനിൽക്കാനുള്ള ശേഷിയുണ്ടായിരുന്നു. കാരണം, ഔദ്യോഗിക സംവിധാനങ്ങൾക്ക് അതിൽ വലിയ പങ്കൊന്നും ഉണ്ടായിരുന്നില്ല എന്നതുതന്നെ. ഒരു പൗര സമൂഹ ഗ്രൂപ്പ് സജീവമായപ്പോൾ, ശാസ്ത്രഞ്ജരുടേത് ഉൾപ്പെടെ ശക്തമായ ഒരു പിന്തുണ അവർക്കു ലഭിച്ചു. 2019 ലും 2021ലും സർക്കാർ സംവിധാനങ്ങൾ വരെ ഇവരെ ഫലപ്രദമായി ഉപയോഗിച്ചു. വയനാട്ടിലും സമാനമായ ഒരു സംവിധാനം ഇപ്പോൾ പ്രവർത്തിച്ചു വരുന്നുണ്ട്. ഹ്യൂം സൊസൈറ്റി (HEUM Society) എന്ന സംഘടന അവിടുത്തെ ജില്ലാ ദുരന്ത നിവാരണ അതോറിറ്റിയുമായി ചേർന്ന് ഒരു പോർട്ടലുണ്ടാക്കി അവിടുത്തെ എസ്റ്റേറ്റുകളിലെല്ലാമുള്ള മഴ മാപിനികളിൽ നിന്നുള്ള വിവരങ്ങൾ എടുത്ത് 10 കിലോമീറ്ററിന്റെ ഗ്രിഡ് ഉണ്ടാക്കി. അതിൽ മഴ ഒരു നിശ്ചിത അളവിൽ കൂടിയാൽ മുന്നറിയിപ്പ് കൊടുക്കുന്ന സംവിധാനമുണ്ടാക്കി.

2024 ലെ വയനാട് ദുരന്തം പരിശിധിക്കുമ്പോൾ, ഉരുൾ പൊട്ടി വന്ന വെള്ളം, സാധാരണ സഞ്ചരിക്കേണ്ട പുഴയുടെ വഴിയിൽ നിന്ന് മാറി ജനവാസമുള്ള ചൂരൽമല റോഡിലേക്ക് കയറി. ഏറ്റവും കൂടുതൽ മരണമുണ്ടായത് അവിടെയാണ്. ഈയൊരു സാധ്യത, ഇന്ന് ലോകത്തുനിലനിൽക്കുന്ന ഒരു മോഡലിനും പ്രവചിക്കാനാകില്ല, അതിനുള്ള സാങ്കേതിക വിദ്യയും നിലവിലില്ല. വെള്ളം വഴി മാറി സഞ്ചരിച്ചത് അവിടെ മൂന്ന് ഉരുളണകള്‍  (വലിയ ഉരുൾപൊട്ടൽ കാരണം, ഒരു നദിയുടെയോ അരുവികളുടെയോ ഒഴുക്ക് തടസ്സപ്പെടുകയും, തൽഫലമായി നദിയുടെ പ്രകൃതിദത്തമായ ഒഴുക്ക് നിലച്ച് ഒരു തടാകം പോലെ (Reservoir) രൂപപ്പെടുകയും ചെയ്യുന്ന പ്രതിഭാസം) ഉണ്ടായത് കൊണ്ടാണ്. വളരെ അപകടകരമായ പ്രതിഭാസമാണിത്. അപകടം നടന്നു 14 ദിവസത്തിനുള്ളിൽ തന്നെ, ഇതിനെക്കുറിച്ച് സംസ്ഥാന ദുരന്ത നിവാരണ അതോറിറ്റി ഉൾപ്പടെയുള്ള 6 സ്ഥാപനങ്ങൾ വിശദമായ പഠനം നടത്തി ഒരു അന്താരാഷ്ട്ര ജേർണലിൽ പ്രസിദ്ധീകരിച്ചിരുന്നു. മൊഹാലിയിലെ ഗവേഷണ സ്ഥാപനമായ ഐസറിലെ യൂനസ് അലി എന്ന മലയാളി ശാസ്ത്രജ്ഞന്‍റെ  നേതൃത്വത്തിലാണ് ആ പഠനം നടത്തിയത്. കേരളത്തിൽ അനധികൃത ക്വാറികൾ കൂടുതലായതുകൊണ്ടാണ് പ്രകൃതി ദുരന്തങ്ങൾ സംഭവിക്കുന്നത് എന്ന പൊതു ബോധം തെറ്റാണ് എന്ന് പറയേണ്ടി വരും. ചില സാഹചര്യങ്ങളിൽ ചിലയിടത്തെ ക്വാറികൾ, ഉരുൾ പൊട്ടൽ ഉണ്ടാക്കാനിടയുണ്ട്. അത്തരത്തിൽ അടച്ചു പൂട്ടിയ ക്വാറികൾ കേരളത്തിലുണ്ട്.

 മറ്റൊരു വലിയ ഉദാഹരണം കോഴിക്കോട്ടെ വിലങ്ങാടാണ്. പഞ്ചായത്തിന് സ്വന്തമായുള്ള ദുരന്ത നിവാരണ പദ്ധതിയുടെ സഹായത്തോടെയാണ് അവിടെയുള്ള ആളുകൾ ഉരുൾപൊട്ടൽ ദുരന്തത്തെ അതിജീവിക്കുന്നത്. ദുരന്ത നിവാരണത്തിൽ പൊതു സമൂഹത്തിന് അവബോധമുണ്ടായതുകൊണ്ട് മാത്രമാണ് ഈ മാറ്റം സാധ്യമായത്. ഈ അവബോധമുണ്ടാക്കുന്നതിൽ കേരളത്തിലെ തദ്ദേശ സ്വയം ഭരണ സ്ഥാപനങ്ങൾ വലിയ പങ്കു വഹിച്ചിട്ടുണ്ട്. 

(ഒബിസിയുടെ വിഡിയോ സംവാദ പരമ്പരയിൽ പങ്കുവച്ച അഭിപ്രായങ്ങൾ)