കേരളത്തില്‍ പര്‍ദ്ദ ധരിക്കാത്ത സ്ത്രീകളെ ബസ്സില്‍ നിന്ന് ഇറക്കിവിടുന്നുണ്ടോ ? കാസര്‍ഗോട്ട് അന്നെന്താണ് നടന്നത് ?
പര്‍ദ്ദധാരിയായ ഒരു സ്ത്രീ ബസ്സില്‍ വച്ച് മറ്റൊരു സ്ത്രീയുമായി തര്‍ക്കത്തിലേര്‍പ്പെടുന്ന ഒരു വീഡിയോ ഈയിടെ സമൂഹമാധ്യമങ്ങളിൽ വൈറൽ ആയിരുന്നു. കേരളത്തിലെ ഒരു മുസ്‌ളീം സ്ത്രീ, ഹിന്ദുസ്ത്രീകളെ പര്‍ദ്ദ ധരിക്കാന്‍ നിര്‍ബന്ധിച്ചതിന്‍റെ പേരിലുണ്ടായ തര്‍ക്കം എന്ന നിലയ്ക്കാണ് ഈ വീഡിയോ പ്രചരിപ്പിക്കപ്പെട്ടിരുന്നത്. യഥാര്‍ത്ഥത്തില്‍ കാസര്‍ഗോഡ് ജില്ലയിലുണ്ടായ ഈ സംഭവം, ഒരു സ്റ്റോപ്പില്‍ ബസ്സ് നിര്‍ത്താതെ വന്നതിനെ തുടര്‍ന്ന് യാത്രക്കാര്‍ തമ്മിലുണ്ടായ ഒരു തര്‍ക്കമായിരുന്നു.
അതായത്, മുസ്‌ളീം സ്ത്രീ ഹിന്ദുക്കളുമായി തര്‍ക്കത്തിലേര്‍പ്പെട്ടുവെന്ന പ്രചാരണം വസ്തുതാവിരുദ്ധമാണ്.
“Wear a burqa if you want to board”. That’s what hindu women were told in kerala. Secularism in India is a toll gate with selective entry. എന്ന കുറിപ്പോടെ ഒക്ടോബർ 12 നാണ് എക്സ് അക്കൗണ്ടിൽ ഈ വീഡിയോ പ്രചരിച്ചുതുടങ്ങിയത്. പോസ്റ്റ് 10000 ലധികം പ്രേക്ഷകരെ ആകര്‍ഷിക്കുകയും ചെയ്തിരുന്നു.
ഒക്ടോബർ 13 ന്, മറ്റൊരു സോഷ്യൽ മീഡിയ അക്കൗണ്ട് വഴിയും ഇതേ വീഡിയോ പ്രചരിച്ചു. ഇത് 4,49,000 ആളുകൾ കാണുകയും 10000 പേർ ലൈക്ക് ചെയ്യുകയും ചെയ്തു. ഏകദേശം 3400 പേരാണ് വീഡിയോ റീപോസ്റ്റ് ചെയ്തത്. ഫേസ്ബുക്കിലും ഇൻസ്റ്റാഗ്രാമിലും ഈ വീഡിയോ ഒരു പോലെ പ്രചരിച്ചിരുന്നു.
വസ്തുതയെന്ത്?
വൈറലായ വീഡിയോയില്‍, സാരി ധരിച്ച ഒരു സ്ത്രീ പര്‍ദ്ദ ധാരികളായ മറ്റു ചിലരോട് തര്‍ക്കിക്കുന്നതു പോലെയുള്ള ദൃശ്യങ്ങളാണുള്ളത്. എന്നാല്‍ അതിലെവിടെയും വേഷവിധാനത്തെ പറ്റി പരാമര്‍ശമില്ല.
വീഡിയോ റിവേഴ്‌സ് ഇമേജ് സെർച്ചിലൂടെ പരിശോധിച്ചപ്പോൾ, ഇതേ വീഡിയോ 2023 ലും സമാന അടിക്കുറിപ്പോടുകൂടി തന്നെ പ്രചരിച്ചിരുന്നുവെന്നു മനസിലാക്കാൻ കഴിഞ്ഞു. കൂടാതെ, 2023 ഒക്ടോബർ 28ന് ഏഷ്യാനെറ്റ് ന്യൂസ് സംപ്രേഷണം ചെയ്ത റിപ്പോർട്ടിലും ഈ വൈറൽ വീഡിയോ ഉൾപ്പെടുത്തിയിട്ടുണ്ട്. വർഗീയത പ്രചരിപ്പിക്കുന്ന കുറിപ്പുകളോടെയുള്ള വീഡിയോ എന്നാണ് ഏഷ്യാനെറ്റ് ന്യൂസ് റിപ്പോർട്ട് ചെയ്തിരുന്നത്.
കാസർഗോഡ് കുമ്പളയിലെ ഭാസ്കർ നഗറിലുള്ള ഖാൻസാ വുമൺസ് കോളേജ് ഫോർ അഡ്വാൻസ്ഡ് സ്റ്റഡീസിലെ വിദ്യാര്‍ത്ഥികള്‍ ബസ് ജീവനക്കാരോട് പ്രതിഷേധിക്കുന്ന ദൃശ്യങ്ങളാണ് ഇതെന്നാണ് റിപ്പോര്‍ട്ടില്‍ പറയുന്നത്. റിപ്പോർട്ടർ ലൈവ് പോലുള്ള മറ്റു മാധ്യമങ്ങളും ഈ വാർത്ത റിപ്പോർട്ട് ചെയ്തിരുന്നു. കോളേജ് സ്റ്റോപ്പില്‍ ബസ്സ് നിര്‍ത്താതെ പോകുന്നത് പതിവായതോടെയാണ് വിദ്യാര്‍ത്ഥികള്‍ പ്രതിഷേധവുമായി രംഗത്തിറങ്ങിയതെന്നാണ് ഈ വാര്‍ത്തകളില്‍ നിന്ന് മനസ്സിലാവുന്നത്. എങ്കിലും, 2023 മുതലേ തന്നെ ഈ വീഡിയോ വർഗീയ കുറിപ്പോടുകൂടി തന്നെ സമൂഹ മാധ്യമങ്ങൾ വഴി പ്രചരിക്കുന്നുണ്ട്.
അതായത്, ബുര്‍ഖ ധരിക്കാതെ ബസ്സില്‍ കയറിയ ഹിന്ദു സ്ത്രീയെ മുസ്ലിം സ്ത്രീകള്‍ ചോദ്യം ചെയ്യുന്നതോ അതേച്ചൊല്ലിയുണ്ടായ തര്‍ക്കമോ അല്ല ഈ വൈറല്‍ വിഡിയോവിലുള്ളതെന്ന് ഞങ്ങളുടെ വിശകലനത്തില്‍ വ്യക്തമായി. കോളേജ് വിദ്യാര്‍ത്ഥികള്‍ ബസ്സ് ജീവനക്കാര്‍ക്കെതിരെ നടത്തിയ പ്രതിഷേധത്തെ മറ്റൊരു യാത്രക്കാരി ചോദ്യം ചെയ്യുന്നതാണ് വീഡിയോയില്‍ കാണുന്നത്.
