ഇന്ത്യൻ സൈന്യത്തില്‍ കാവിവൽക്കരണം? കേണല്‍ സോഫിയ ഖുറേഷി അങ്ങനെ പറഞ്ഞോ? വസ്തുത പരിശോധിക്കാം
ഇന്ത്യയിലെ മുതിർന്ന സൈനിക ഓഫീസറായ കേണല്‍ സോഫിയ ഖുറേഷിയുടെ ഒരു വൈറൽ വീഡിയോ ഇപ്പോൾ ചില എക്സ് അക്കൗണ്ടുകൾ വഴി പ്രചരിക്കുന്നുണ്ട്. ഇന്ത്യൻ കര – നാവിക – വ്യോമ സേനകൾ സംയുക്തമായി നടത്തുന്ന ‘ത്രിശൂൽ’ എന്ന സൈനിക അഭ്യാസം ബീഹാർ തെരഞ്ഞെടുപ്പിനെ മുന്നിൽക്കണ്ടുകൊണ്ടു നടത്തിയ തന്ത്രമാണ് എന്ന് ഓഫീസർ വീഡിയോയിൽ പറയുന്നതായാണ് കാണുന്നത്. പക്ഷെ പരിശോധനയിൽ വീഡിയോ എ ഐ നിർമ്മിതമാണെന്നു കണ്ടെത്തി. ഇന്ത്യൻ ആർമി കാവി വൽക്കരിക്കപ്പെട്ടതിന്റെ ഭാഗമായാണ് ത്രിശൂൽ എന്ന സൈനികാഭ്യാസം നടന്നതെന്ന് സോഫിയ ഖുറേഷി പറയുന്ന 42 സെക്കന്റ് ദൈർഘ്യമുള്ള വീഡിയോ നവംബർ മൂന്നിനാണ് എക്സ് അക്കൗണ്ട് വഴി പ്രചരിപ്പിക്കപ്പെട്ടത്. എൻ ഡി എ സഖ്യത്തിന്റെ ആവശ്യ പ്രകാരമായിരുന്നു ത്രിശൂൽ അഭ്യാസമെന്നും ബീഹാറിലെ തെരഞ്ഞെടുപ്പ് വിജയമായിരുന്നു ലക്ഷ്യമെന്നും വീഡിയോയിൽ സോഫിയ പറയുന്നതായി കാണുന്നുണ്ട്.
മറ്റുള്ള എക്സ്, ഫേസ്ബുക്ക് അക്കൗണ്ടുകൾ വഴിയും വീഡിയോ പ്രചരിപ്പിക്കപ്പെട്ടിരുന്നു.
വസ്തുതയെന്ത്?
വസ്തുത പരിശോധിക്കുന്നതിനായി വീഡിയോ ഗൂഗിൾ റിവേഴ്‌സ് ഇമേജ് സേർച്ച് ചെയ്തു. അപ്പോൾ ഏഷ്യൻ ന്യൂസ് ഇന്റർനാഷനലിന്റെ (ANI) 2025 ഒക്ടോബർ 31 ന് അപ്‌ലോഡ് ചെയ്ത ഒരു യൂട്യൂബ് വീഡിയോയാണ് കണ്ടത്. ഇന്ത്യൻ ആർമിയും ന്യൂഡൽഹിയിലെ സെൻ്റർ ഫോർ ലാൻഡ് വാർഫെയർ സ്റ്റഡീസും സംയുക്തമായി (CLAWS) സംഘടിപ്പിച്ച ചാണക്യ ഡിഫൻസ് ഡയലോഗ് എന്ന അന്താരാഷ്ട്ര സെമിനാറിൽ ‘വീര യുവത: ഇന്ത്യയുടെ ദേശസുരക്ഷയ്ക്കായി യുവാക്കളെ ശാക്തീകരിക്കുക’ (Veer Yuva: Empowering Youth for India’s National Security) എന്ന വിഷയത്തിൽ സംസാരിക്കുകയായിരുന്നു സോഫിയ ഖുറേഷി.
വൈറൽ വീഡിയോയിലെ ഭാഗങ്ങൾ ഒന്നും തന്നെ യഥാർത്ഥ വീഡിയയോയിൽ കണ്ടിരുന്നില്ല. പുതിയൊരു വീഡിയോ ക്ലിപ്പ് എഡിറ്റ് ചെയ്തത് ചേർത്തതാണ് എന്ന് അപ്പോൾ മനസിലായി. വീഡിയോയിലെ ശബ്ദത്തിനും പൊരുത്തക്കേടുകൾ തോന്നി. ആ വീഡിയോയുടെ ഉത്ഭവം പരിശോധിക്കാനായി അത് വിവിധ എ ഐ ഡിറ്റക്ഷൻ ടൂളുകൾ ഉപയോഗിച്ച് പരിശോധിച്ചു.
യൂണിവേഴ്സിറ്റി അറ്റ് ബഫല്ലോയിലെ (University at Buffalo – UB) മീഡിയ ഫോറൻസിക്സ് ലാബിന്റെ എ ഐ ടൂൾ ആയ DeepFake-O-Meter നെ ആശ്രയിച്ചു. വീഡിയോ എ ഐ നിർമ്മിതമായിരിക്കാനുള്ള സാധ്യത 99.9 ശതമാനമാണെന്നാണ് DeepFake-O-Meter പറയുന്നത്.
കണ്ടൻ്റ് മോഡറേഷൻ പ്ലാറ്റ്‌ഫോമായ Hive Moderation ഉപയോഗിച്ചുള്ള പരിശോധനയിലും ചിത്രം എ ഐ നിർമ്മിതമായിരിക്കാൻ 99 ശതമാനം സാധ്യതയുണ്ടെന്ന് കണ്ടെത്തി.
സോഫിയ ഖുറേഷിയുടെ പ്രഭാഷണത്തിന്റെ യഥാർത്ഥ വീഡിയോയിൽ നിന്ന് ഒരു ഭാഗമെടുത്ത് എ ഐ സഹായത്തോടെ നിർമിച്ച കൃത്രിമദൃശ്യമാണ് സോഷ്യൽ മീഡിയ വഴി തെറ്റായി പ്രചരിപ്പിച്ചിരിക്കുന്നതെന്നു ഞങ്ങൾ കണ്ടെത്തി.
