നഗരം ഗ്രാമത്തെ വളയുന്നു; ലോകജനസംഖ്യയുടെ 45 ശതമാനവും നഗരങ്ങളിൽ

ലോകത്ത് നഗരപ്രദേശങ്ങള്‍ ക്രമാതീതമായി വളരുകയാണ്. ഐക്യരാഷ്ട്ര സഭയുടെ പോപ്പുലേഷൻ ഡിവിഷൻ പുറത്തിറക്കിയ ‘World Urbanization Prospects 2025: Summary of Results’ എന്ന പഠന റിപ്പോർട്ടിലാണ് ലോക ജനസംഖ്യയുടെ 45 ശതമാനവും നഗരപ്രദേശങ്ങളിലാണ് എന്ന കണ്ടെത്തൽ. റിപ്പോർട്ടനുസരിച്ച്, ലോകത്തിലെ ഏറ്റവും ജനസംഖ്യയുള്ള 10 നഗരങ്ങളിൽ ഒമ്പതെണ്ണവും ഏഷ്യയിലാണ്. 

ലോകത്ത് നഗരപ്രദേശങ്ങള്‍ ക്രമാതീതമായി വളരുകയാണെന്ന് ഐക്യരാഷ്ട്ര സഭയുടെ പഠനറിപ്പോർട്ട്. ഐക്യരാഷ്ട്ര സഭയുടെ പോപ്പുലേഷൻ ഡിവിഷൻ നവംബർ 18 ന് പുറത്തിറക്കിയ ‘World Urbanization Prospects 2025: Summary of Results’ എന്ന പഠന റിപ്പോർട്ടിലാണ് ലോക ജനസംഖ്യയുടെ 45 ശതമാനവും നഗരപ്രദേശങ്ങളിലാണ് എന്ന കണ്ടെത്തലുള്ളത്. 

മുൻകാലങ്ങളെ അപേക്ഷിച്ച് നഗരപ്രദേശങ്ങളുടെ എണ്ണം കൂടിവരികയാണ് എന്നും ഗ്രാമപ്രദേശങ്ങളിൽ ജനസംഖ്യ കുറയുകയാണെന്നും റിപ്പോർട്ട് നിരീക്ഷിക്കുന്നു. ബ്രസീലിലെ ബെലെമിൽ അവസാനിച്ച മുപ്പതാമത്, അന്താരാഷ്ട്ര കാലാവസ്ഥാ സമ്മേളനം (Conference of Parties – COP 30) ലോകരാജ്യങ്ങളുടെ പരസ്പര സഹകരണത്തോടെ കാലാവസ്ഥാ വ്യതിയാനത്തെ പ്രതിരോധിക്കാനുതകും വിധമുള്ള നഗരവികസനം ആസൂത്രണം ചെയ്യണമെന്ന് തീരുമാനിച്ചിരുന്നു.

ലോക ജനസംഖ്യയിലുണ്ടാകുന്ന മാറ്റങ്ങളെ വിശകലനം ചെയ്യുകയും, ജനസംഖ്യാ ഗവേഷണത്തിലൂടെ വിവരങ്ങൾ നൽകുകയും ചെയ്യുന്ന  പോപ്പുലേഷൻ ഡിവിഷനായ എക്കണോമിക് ആൻഡ് സോഷ്യൽ അഫയേഴ്‌സ് – United Nations Department of Economic and social affairs (DESA) ആണ് ഈ വിഷയത്തിൽ പഠനം നടത്തിയത്. ജനന – മരണനിരക്ക് കുടിയേറ്റം എന്നീ വിഷയങ്ങളിൽ തുടർച്ചയായി പഠനങ്ങൾ നടത്തിവരുന്ന വിഭാഗമാണ് 1946ൽ സ്ഥാപിതമായ പോപ്പുലേഷൻ ഡിവിഷൻ. 

ഗ്രാമപ്രദേശങ്ങൾ കുറയുന്നു 

1950കളിൽ, ലോകജനസംഖ്യയുടെ 20% മാത്രമായിരുന്നു നഗരപ്രദേശങ്ങളിൽ താമസിച്ചിരുന്നത്. അതായത്, 250 കോടി ആളുകളിൽ വെറും 50 കോടി പേർ. ബാക്കി 80% ആളുകൾ പട്ടണങ്ങളിലും ഗ്രാമപ്രദേശങ്ങളിലുമാണ് താമസിച്ചിരുന്നത്. എന്നാൽ ഇന്ന്, അതിന്റെ ഇരട്ടിയിലധികം ആളുകളാണ് നഗരപ്രദേശത്ത് താമസിക്കുന്നത്. ഇന്ന് ലോകത്തുള്ള 820 കോടി ജനങ്ങളിൽ, 45 ശതമാനം പേരും നഗരങ്ങളിലാണുള്ളത്. 

1950 ന് ശേഷമാണ് നഗര വളർച്ചയിൽ വലിയ വർധനവുണ്ടായതെന്നാണ് പഠനത്തില്‍ വെളിപ്പെട്ടത്. 1970 കളുടെ മധ്യത്തിൽ നഗരവത്കരണം ക്രമാതീതമായി ഉയരുകയാണുണ്ടായത്. പിന്നീട് ഇരുപത് വർഷങ്ങൾക്ക് ശേഷം, അതായത്, 1996 ലാണ് നഗര പ്രദേശങ്ങളിലെ ജനസംഖ്യ, പട്ടണങ്ങളിലെ (Town) ജനസംഖ്യയെ മറികടക്കുന്നത്. ഇപ്പോൾ മൊത്തം ജനസംഖ്യയുടെ 45 ശതമാനം നഗരവാസികൾ ആണെങ്കിൽ, 36 ശതമാനം പേർ പട്ടണങ്ങളിലും, ശേഷിക്കുന്ന 19 ശതമാനം ഗ്രാമപ്രദേശങ്ങളിലും താമസിക്കുന്നു, റിപ്പോർട്ട് പറയുന്നു. ഭാവിയിൽ, ആഗോള ജനസംഖ്യാ വർദ്ധനവിന്റെ മൂന്നിൽ രണ്ട് ഭാഗവും നഗരങ്ങളിലും ശേഷിക്കുന്ന ഒരു ഭാഗം പട്ടണങ്ങളിലുമായിരിക്കുമെന്നും പഠനം പ്രവചിക്കുന്നുണ്ട്. 1950-ൽ ടൗണുകളിലുള്ള ആഗോള ജനസംഖ്യാ വിഹിതം 40% ആയിരുന്നുവെങ്കിൽ, 2025 ആയതോടെ അത് 36% ആയി കുറയുകയാണ് ചെയ്തത്. 

(സ്രോതസ്സ്: World Urbanization Prospects 2025)

മെഗാസിറ്റികൾ കൂടുന്നു 

10 ദശലക്ഷത്തിലധികം ജനസംഖ്യയുള്ള നഗരങ്ങളായ മെഗാസിറ്റികളുടെ എണ്ണത്തിലുണ്ടായ വർധനവിനെയും റിപ്പോർട്ട് പഠനവിധേയമാക്കിയിട്ടുണ്ട്. 1975-ൽ ലോകത്താകെ എട്ട് മെഗാസിറ്റികൾ ആണ് ഉണ്ടായിരുന്നതെങ്കിൽ, 2025-ൽ അതിന്റെ എണ്ണം നാലിരട്ടിയായി വർദ്ധിച്ച് 33 ആയി എന്നാണ് കണക്കുകൾ കാണിക്കുന്നത്. സമീപ വർഷങ്ങളിൽ, 10 ദശലക്ഷം ജനസംഖ്യയിലെത്തിയ നഗരങ്ങളിൽ ഭൂരിഭാഗവും ഏഷ്യയിലും ആഫ്രിക്കയിലുമാണ് സ്ഥിതി ചെയ്യുന്നതെന്ന് പ്രമുഖ ആഗോള സാമ്പത്തിക ഉപദേശക സ്ഥാപനമായ ഓക്സ്ഫെഡ് എക്കണോമിക്ക്സ് പറയുന്നു. ഇപ്പോഴുള്ള 33 മെഗാസിറ്റികളിൽ 19 എണ്ണവും ഏഷ്യയിലാണ് എന്നാണ് പോപ്പുലേഷൻ ഡിവിഷന്റെ പഠനം പറയുന്നത്. 

 2050-ഓടെ ആഗോളതലത്തിൽ മെഗാ സിറ്റികളുടെ എണ്ണം 37 ആയി ഉയരുമെന്നു പഠനം പറയുന്നുണ്ട്. പുതിയ മെഗാ സിറ്റികളുടെ പ്രവചന പട്ടികയിൽ, അഡിസ് അബാബ (എത്യോപ്യ),  ദാര്‍ എസ് സലാം (യുണൈറ്റഡ് റിപ്പബ്ലിക് ഓഫ് ടാൻസാനിയ), ഹാജിപൂർ (ഇന്ത്യ), ക്വാലാലംപൂർ (മലേഷ്യ) എന്നീ നഗരങ്ങളാണുള്ളത്. 

ഇന്ത്യയിലെ ആദ്യത്തെ മെഗാസിറ്റിയായി കണക്കാക്കുന്നത് കൊൽക്കത്തയെയാണ്. 1901 ലാണ് കൊൽക്കത്തക്ക് ഈ പദവി ലഭിക്കുന്നത്. 2011-ലെ സെൻസസ് പ്രകാരം ഡൽഹിയും മുംബൈയും മെഗാസിറ്റികളായി. ന്യൂയോർക്ക് നഗരവും ടോക്യോയും ആയിരുന്നു ലോകത്തിലെ ആദ്യത്തെ രണ്ടു മെഗാസിറ്റികൾ. 2050 ഓടെ, ഏകദേശം 47 ദശലക്ഷം ജനസംഖ്യ തികച്ചുകൊണ്ട്, ലോകത്തിലെ തന്നെ ഏറ്റവും വലിയ മെഗാസിറ്റിയായി ഡൽഹി നഗരം മാറുമെന്ന് ഓക്സ്ഫെഡ് എക്കണോമിക്ക്സ് നിരീക്ഷിക്കുന്നു.

 ജക്കാര്‍ത്തയിലെ ജനസംഖ്യ 

റിപ്പോർട്ടനുസരിച്ച്, ലോകത്തിലെ ഏറ്റവും ജനസംഖ്യയുള്ള 10 നഗരങ്ങളിൽ ഒമ്പതെണ്ണവും ഏഷ്യയിലാണ്. ഏറ്റവും കൂടുതൽ ജനസംഖ്യയുള്ള നഗരം, ഇന്തോനേഷ്യയിലെ ജക്കാർത്ത. ഏകദേശം 42 ദശലക്ഷം ആളുകളാണ് ഇവിടെയുള്ളത്. ബംഗ്ലാദേശിലെ ധാക്കയാണ് രണ്ടാം സ്ഥാനത്തുള്ളത്, ഇവിടെ ഏകദേശം 37 ദശലക്ഷം ആളുകളുണ്ട്. 33 ദശലക്ഷം ജനസംഖ്യയുള്ള ജപ്പാനിലെ ടോക്യോ ആണ് പട്ടികയിൽ മൂന്നാമത്. ഐക്യരാഷ്ട്രസഭയുടെ മുൻപത്തെ റിപ്പോർട്ടിൽ (2018) 37 ദശലക്ഷം ജനസംഖ്യയുണ്ടായിരുന്ന ടോക്യോ ആയിരുന്നു പട്ടികയിൽ ഒന്നാമത്. ന്യൂഡൽഹി, ഷാങ്ഹായ്, ഗ്വാങ്‌ഷോ, മനില, കൊൽക്കത്ത, സിയോൾ തുടങ്ങിയ നഗരങ്ങൾ പുതിയ പട്ടികയിൽ ആദ്യ പത്തിലുണ്ട്. ഈജിപ്തിലെ കെയ്‌റോ മാത്രമാണ് ആദ്യ പത്തിലുള്ള ഏഷ്യയ്ക്ക് പുറത്തെ ഒരേയൊരു നഗരം. 32 ദശലക്ഷം ആണ് കെയ്‌റോയിലെ ജനസംഖ്യ. 

2030-ഓടെ, പാകിസ്താനിലെ കറാച്ചി ആദ്യ പത്തിൽ ഇടം നേടുമെന്നും 2050-ഓടെ അഞ്ചാം സ്ഥാനത്ത് എത്തുമെന്നും പഠനം പറയുന്നു. രണ്ടായിരത്തി അമ്പതോടെ ലോകത്തിലെ ഏറ്റവും വലിയ നഗരമായി ധാക്ക മാറുമെന്ന് പഠനം പ്രവചിക്കുന്നു. കാലാവസ്ഥാ വ്യതിയാനം സൃഷ്ടിച്ച വെള്ളപ്പൊക്കവും സമുദ്രനിരപ്പിലെ  ഉയർച്ചയും ധാക്കയിലെ ജനങ്ങൾ കഴിഞ്ഞ കുറച്ചുവർഷങ്ങളായി നേരിടുന്ന പ്രശ്നങ്ങളാണ്. ജക്കാർത്തയിലും സമുദ്ര നിരപ്പുയർച്ച പോലുള്ള പ്രശ്നങ്ങൾ ഉണ്ടാകുന്നുണ്ട്. 

എന്നാൽ, ലോകത്തിലുള്ള ഏകദേശം 12,000 നഗരങ്ങളിൽ, 96 ശതമാനത്തിലും ഒരു ദശലക്ഷത്തിൽ താഴെയാണ് ജനസംഖ്യ. അതായത്, നഗര ജനസംഖ്യയുടെ ഭൂരിഭാഗവും, ചെറിയ ഇടത്തരം നഗരങ്ങളിലാണ് താമസിക്കുന്നത്. സുസ്ഥിരമായ നഗരവികസനത്തിൽ ലോകത്തിലെ ചെറിയ നഗരങ്ങൾ വലിയ പങ്കുവഹിക്കുന്നുവെന്നാണ് ഇത് സൂചിപ്പിക്കുന്നത്. കുടിയേറ്റം, ഉയർന്ന ജനനനിരക്ക്, നഗരാതിർത്തികളുടെ വികാസം എന്നിവയാണ് നഗരവൽക്കരണത്തിന്റെ പ്രധാനകാരണങ്ങൾ. 

യൂറോപ്പിൽ നിന്നും വടക്കേ അമേരിക്കയിൽ നിന്നുമാണ് തുടക്കത്തിൽ കൂടുതൽ നഗരകുടിയേറ്റം ഉണ്ടായിരുന്നതെങ്കിൽ, ഭാവിയിൽ നഗര വളർച്ചയുടെ 90 ശതമാനവും ഏഷ്യയിലും ആഫ്രിക്കയിലുമാകുമെന്ന് വേൾഡ് പോപ്പുലേഷൻ ഹിസ്റ്ററി നിരീക്ഷിക്കുന്നു. ലോക ജനസംഖ്യയിലെ മാറ്റങ്ങൾ പഠിക്കുന്ന സംവേദനാത്മക വെബ്‌സൈറ്റാണ് വേൾഡ് പോപ്പുലേഷൻ ഹിസ്റ്ററി. 2050 ആകുമ്പോഴേക്കും ലോക ജനസംഖ്യയിലെ, മൂന്നിൽ രണ്ട് ഭാഗം ആളുകളും നഗരവാസികളായി മാറുമെന്ന് പോപ്പുലേഷൻ ഹിസ്റ്ററി പറയുന്നു.  തൊഴിലവസരങ്ങളുടെ  വര്‍ദ്ധന, കേന്ദ്രീകൃത വിപണി, മെച്ചപ്പെട്ട വേതനം, ഉയർന്ന ജീവിതനിലവാരം എന്നീ ഘടകങ്ങളാണ് ആളുകളെ നഗരങ്ങളിലേക്ക് ആകർഷിക്കുന്നത് എന്നാണ് പോപ്പുലേഷൻ ഹിസ്റ്ററിയുടെ വിലയിരുത്തൽ.  

ഇന്ത്യ, നൈജീരിയ, പാകിസ്താൻ, ഡെമോക്രാറ്റിക് റിപ്പബ്ലിക് ഓഫ് കോംഗോ, ഈജിപ്ത്, ബംഗ്ലാദേശ്, എത്യോപ്യ എന്നീ രാജ്യങ്ങൾ 2025നും 2050നും ഇടയിൽ പുതിയതായി 500 ദശലക്ഷത്തിലധികം നഗരവാസികളെ സൃഷ്ടിക്കും. ഈ കാലയളവിനുള്ളിൽ, ആഗോളതലത്തിൽ നഗരവാസികളുടെ എണ്ണത്തിൽ ഉണ്ടാകുന്ന വർധനവിന്റെ പകുതിയിലധികവും ഈ ഏഴ് രാജ്യങ്ങളിൽ നിന്നായിരിക്കുമെന്നും  ഐക്യരാഷ്ട്ര സഭയുടെ പഠനസംഘം പറയുന്നു. അടുത്ത 25 വർഷത്തിനുള്ളിൽ കൂടുതൽ നഗരവാസികളെ സൃഷ്ടിക്കുന്ന ഏഴ് നഗരങ്ങളുടെ പട്ടികയിൽ ഒരു ഇന്ത്യൻ നഗരവുമുണ്ട്. നഗരവളർച്ചയെ സുസ്ഥിരമായി നിലനിർത്തുകയെന്ന വലിയ ഉത്തരവാദിത്തമാണ് ഈ നഗരങ്ങൾക്കുള്ളത്. ആഗോള വികസനത്തെ ഭാവിയിൽ നിർണ്ണയിക്കുന്നതും ഈ നഗരങ്ങളായിരിക്കും.