വെറുപ്പിന്‍റെ ഹാഷ്ടാഗുകള്‍ – സൊഹ്റാന്‍ മംദാനി അതിജീവിച്ച സൈബറാക്രമണങ്ങള്‍

ന്യൂയോര്‍ക്ക് മേയര്‍ സ്ഥാനത്തേക്കുള്ള സൊഹ്റാന്‍ ക്വാമി മംദാനിയുടെ വിജയം ലോകശ്രദ്ധ നേടിയപ്പോള്‍ ഏറ്റവുമധികം ചര്‍ച്ച ചെയ്യപ്പെട്ടത് അമേരിക്കയുടെ ചരിത്രത്തിലിന്നേവരെ ഉണ്ടായിട്ടില്ലാത്തത്രയും വലിയ സാമുദായിക ധ്രുവീകരണശ്രമമാണ്.  ഏതു തലത്തിലുള്ള രാഷ്ട്രീയ പോരാട്ടത്തിനും ആശയ പ്രചാരണത്തിനും ഇന്ന് ഏറ്റവും വലിയ വേദിയാകുന്നത് സാമൂഹ്യമാധ്യമങ്ങളാണ്. വിദ്വേഷത്തിന്റേയും വെറുപ്പിന്‍റേയും വിളനിലങ്ങളാകുന്ന സാമൂഹ്യമാധ്യമങ്ങൾ, കലാപങ്ങൾക്ക് വരെ തിരി കൊളുത്താൻ ശേഷിയുള്ള സാമൂഹ്യ ശക്തികളായി പരിണമിച്ചിരിക്കുകയാണ്. പല സ്വതന്ത്ര ഗവേഷണസ്ഥാപനങ്ങളും ഇതിനോടകം തന്നെ മംദാനിയ്ക്ക് നേരെ ഉയര്‍ന്ന / ഉയരുന്ന മുസ്ലിംവിരുദ്ധ വിദ്വേഷത്തെ കുറിച്ച് പഠനങ്ങള്‍ നടത്തിയിട്ടുണ്ട്. 

ഇത്തരം വിദ്വേഷഭരിതമായ ചർച്ചകളിലേറെയും സൊഹ്റാന്‍ മംദാനിയുടെ രാഷ്ട്രീയത്തെ ലക്ഷ്യം വച്ചുള്ളതാണെന്ന്, അമേരിക്ക കേന്ദ്രീകരിച്ചു പ്രവർത്തിക്കുന്ന ‘സെന്റർ ഫോർ സ്റ്റഡി ഓഫ് ഓർഗനൈസ്ട് ഹേറ്റ്’ (CSOH) നടത്തിയ ഏറ്റവും പുതിയ പഠനം വ്യക്തമാക്കുന്നു . കമ്മ്യൂണിസ്റ്റ്, മുസ്ലിം തുടങ്ങിയ വിശേഷണങ്ങളിലൂടെ ഒരു ‘നുഴഞ്ഞു കയറ്റക്കാരനെന്ന’ നിലയിൽ അദ്ദേഹത്തെ പൈശാചികവൽക്കരിക്കാൻ സംഘടിത ശ്രമങ്ങളുണ്ടായി എന്നാണ് പഠനത്തിലെ കാതലായ കണ്ടെത്തൽ.

‘വെറുപ്പി’ന്‍റെ കണക്കുകൾ 

മുസ്ലിം വിരുദ്ധവും, അപര വിദ്വേഷം ജനിപ്പിക്കുന്നതും, ഒറ്റപ്പെടുത്തുന്നതുമായ ഭാഷയുപയോഗിക്കുന്ന 35,522 പോസ്റ്റുകളാണ് പഠനത്തിന്റെ ഭാഗമായി എക്സിൽ മാത്രം കണ്ടെത്തിയത്. ഇതിൽ 6868 (39%) അക്കൗണ്ടുകളും വെരിഫൈഡ് അക്കൗണ്ടുകളാണ്. 16,039 പോസ്റ്റുകളിൽ നിന്നായി മുസ്ലിം വിരുദ്ധ ഉള്ളടക്കത്തിന്‍റെ 45 ശതമാനവും ഈ അക്കൗണ്ടുകളിൽ നിന്നാണ് വന്നിട്ടുള്ളത്.

മുസ്ലിം വിരുദ്ധ വികാരം ന്യൂയോർക്ക് മേയർ തെരഞ്ഞെടുപ്പിലെ ഏറ്റവും പ്രധാനപ്പെട്ട ഘടകമായി  മാറിയെന്നാണ് റിപ്പോർട്ടിൽ സൂചിപ്പിക്കുന്നത്. തീവ്രമായ ഈ വെറുപ്പിനെ നിയന്ത്രിക്കാൻ ഒക്ടോബർ 24ന് മംദാനിക്ക് ഒരു  വാര്‍ത്താസമ്മേളനം വിളിക്കേണ്ടതായി വരെ വന്നു. ജൂൺ 24നും ഒക്ടോബർ 31നും ഇടയിലായി CSOH കണ്ടെത്തിയ ഇത്തരം പോസ്റ്റുകളുടെ ആകെ റീച്ച് ഏകദേശം 150 കോടിയായിരുന്നു. 73.7 ലക്ഷം ലൈക്കുകളും 20 ലക്ഷം റീപോസ്റ്റുകളും ഇവയ്ക്ക് ലഭിച്ചിട്ടുണ്ട്.

പോസ്റ്റുകളിൽ ഭൂരിഭാഗത്തിലും “തീവ്രവാദി”, “ജിഹാദി” “ഭീകരവാദി”, “റാഡിക്കൽ മുസ്ലിം” എന്നീ വാക്കുകളാണ് മംദാനിയെ വിശേഷിപ്പിക്കാൻ ഉപയോഗിച്ചിട്ടുള്ളത്. മുസ്ലിം സ്വത്വത്തെ ഭീകരവാദവുമായി മാത്രം ചേർത്തു വായിക്കുന്ന പൊതു ബോധമാണ് ഇതിൽ പ്രതിഫലിക്കുന്നത്.

വേള്‍ഡ് ട്രേഡ് സെന്‍റര്‍ ആക്രമണം കഴിഞ്ഞ് രണ്ട് പതിറ്റാണ്ടിലേറെയായിട്ടും, മുസ്ലിംകളുടെ രാഷ്ട്രീയ ഇടപെടൽ ദേശീയ സുരക്ഷയ്ക്ക് ഭീഷണിയായി തന്നെയാണ് അമേരിക്കയിൽ വീക്ഷിക്കപ്പെടുന്നത് എന്ന വസ്തുതയും ഇത് വെളിവാക്കുന്നു. ഈ വിഭാഗത്തിൽ 25,514 പോസ്റ്റുകളാണ് പഠനത്തിൽ കണ്ടെത്തിയത്. ആകെ മുസ്ലിം വിരുദ്ധ ഉള്ളടക്കത്തിന്‍റെ 72% ആണിത്.

പഠനത്തിൽ ‘ഇസ്ലാമികവൽക്കരണ’വുമായി ബന്ധപ്പെട്ട ഗൂഢാലോചനാ സിദ്ധാന്തങ്ങളെ കുറിച്ച് സംസാരിക്കുന്ന പോസ്റ്റുകളും ധാരാളമായി ഉൾപ്പെടുന്നു. മുസ്ലിം മേയറായി തെരെഞ്ഞെടുക്കപ്പെട്ടാല്‍ ന്യൂയോർക്കിൽ ‘ശരീഅത്ത് നിയമം’ നടപ്പിലാക്കപ്പെടുമെന്നാണ് അവകാശവാദം.

മറ്റു പോസ്റ്റുകളിൽ മംദാനിയെ നാട് കടത്തണമെന്ന ആവശ്യവും, അദ്ദേഹത്തിന്റെ ദേശ സ്നേഹത്തെയും കൂറിനെയും ചോദ്യം ചെയ്യുന്ന തരത്തിലുള്ള പരാമർശങ്ങളും വ്യാപകമാണ്. അമേരിക്കൻ മൂല്യങ്ങളെയാകെ നശിപ്പിക്കാൻ കഴിയുന്ന ‘അപരനാ’യാണ് (outsider) മംദാനിയെ ചിത്രീകരിക്കുന്നത്. “ന്യൂയോർക് നഗരം വീണുകഴിഞ്ഞു. (“New York has fallen”) എന്ന പ്രയോഗം ഒരുപാട് പോസ്റ്റുകളിൽ ആവർത്തിക്കുന്നതായി കാണാം.  ‘തെരഞ്ഞെടുക്കപ്പെട്ട ഒരു മുസ്ലിം ജനപ്രതിനിധിയെ രാജ്യത്ത് നിന്ന് പുറത്താക്കണമെന്നും, അയാളുടെ പൗരത്വം റദ്ദാക്കണമെന്നുമുള്ള വാദങ്ങൾ, രാഷ്ട്രീയം ചില പ്രത്യേക മത-സാമൂഹിക വിഭാഗങ്ങളുടേത് മാത്രമായി നിജപ്പെടുത്തുക എന്ന ലക്ഷ്യത്തിന്‍റെ ഭാഗമായി ഉണ്ടാകുന്നതാണ്’- റിപ്പോർട്ട് പറയുന്നു. “അമേരിക്ക വിരുദ്ധൻ”, “രാജ്യദ്രോഹി”, “ആന്തരിക ശത്രു” തുടങ്ങിയ വാക്കുകളാണ് മംദാനിയെ വിശേഷിപ്പിക്കാൻ ഉപയോഗിച്ചിരിക്കുന്നത്.

പഠനം നടത്തിയ നാലു മാസ കാലയളവിൽ, മുസ്ലിം വിരുദ്ധ പോസ്റ്റുകളുടെ എണ്ണം ക്രമാനുഗതമായി വർദ്ധിച്ചു വരികയായിരുന്നു. ഒക്ടോബറിൽ ഇത്തരം പോസ്റ്റുകൾ 15,123 (ആകെ ഡാറ്റയുടെ 43%) എന്ന ഭീമമായ സംഖ്യയിലേക്ക് ഉയർന്നു. സെപ്റ്റംബറിൽ നിന്ന് 450 ശതമാന വർദ്ധനയാണിത്. തെരെഞ്ഞെടുപ്പിന്റെ അവസാന ഘട്ടത്തിലേക്ക് അടുത്തപ്പോൾ, മുസ്ലിം വിരുദ്ധ ആഖ്യാനങ്ങൾ ശക്തിപ്പെടുത്താനുള്ള സംഘടിത ശ്രമങ്ങളുടെ ഭാഗമായിട്ടാകാം ഈ വർദ്ധന ഉണ്ടായതെന്ന് റിപ്പോർട്ട്‌ നിരീക്ഷിക്കുന്നു. 

സമീപഭാവിയിലേക്കുള്ള ചൂണ്ടുപലക

“ന്യൂയോര്‍ക്കിലെ മുസ്ലിമിനെ സംബന്ധിച്ചിടത്തോളം ആത്മാഭിമാനമില്ലാത്ത ജീവിതം സ്വാഭിവകതയായി കഴിഞ്ഞിട്ടുണ്ട്. ഇക്കാര്യത്തില്‍ ഞങ്ങള്‍ ഒറ്റക്കല്ലെന്നതാണ് യാഥാര്‍ത്ഥ്യം, ഞങ്ങളെ പോലെ പലരുമുണ്ട്. എന്നാല്‍ സമുദായത്തിന്, അഭിമാനക്ഷതത്തോടുണ്ടായിരിക്കുന്ന സഹിഷ്മുതയാണ് ഞങ്ങളുടെ പ്രശ്നം”

തെരെഞ്ഞെടുപ്പിന് ദിവസങ്ങൾ ബാക്കി നിൽക്കെ, ന്യൂയോർക്കിലെ ബ്രോങ്ക്സ്സിൽ ഒരു മുസ്ലിം പള്ളിക്ക് മുന്നിൽ നിന്നു കൊണ്ട് മംദാനി പ്രസംഗിച്ചു. ‘മറ്റൊരു സെപ്റ്റംബർ 11 ആവർത്തിച്ചാൽ മംദാനി സന്തോഷവാനായിരിക്കും’ എന്ന് ഒരു റേഡിയോ അവതാരകൻ നടത്തിയ പരാമര്‍ശത്തെ മേയർ തെരഞ്ഞെടുപ്പിലെ പ്രധാന എതിരാളിയായിരുന്ന ആൻഡ്രൂ ക്യൂമോ ചിരിച്ചുകൊണ്ട് സ്വീകരിച്ചതിന്‍റെ അടുത്ത ദിവസമായിരുന്നു മംദാനി ഈ പ്രസംഗം നടത്തിയത്.

തന്‍റെ മുസ്ലിം സ്വത്വത്തെ പല ഘട്ടങ്ങളിലും മംദാനി  ഉയര്‍ത്തിപ്പിടിച്ചിട്ടുണ്ട്. ഇന്ത്യയിൽ മുസ്ലിംകൾ നേരിടുന്ന അരക്ഷിതാവസ്ഥയെയും ഭീതിയെയും പറ്റി പലപ്പോഴായി പരാമർശിച്ചിട്ടുമുണ്ട്. പ്രധാനമന്ത്രി നരേന്ദ്ര മോദിയെ പരസ്യമായി വിമർശിച്ചിട്ടുള്ള മംദാനി, 2002ൽ ഗുജറാത്തിൽ മുസ്ലിംകളെ കൂട്ടക്കുരുതി ചെയ്ത യുദ്ധക്കുറ്റവാളി എന്ന് മോദിയെ വിശേഷിപ്പിക്കാനും മടിച്ചിട്ടില്ല. 

‘ഡിജിറ്റൽ ലോകത്ത് പരക്കുന്ന വിദ്വേഷത്തിന് യഥാർത്ഥ ലോകത്ത് അക്രമങ്ങൾ സൃഷ്ടിക്കാൻ കെൽപ്പുണ്ട്. ഭീഷണികളായും പീഡനങ്ങളായും ഇതിന്റെ അനന്തര ഫലങ്ങൾ അമേരിക്കൻ മുസ്ലിംകള്‍ നേരിടേണ്ടതായി വന്നേക്കാം.’ റിപ്പോർട്ടിലെ ഒരു വാചകമാണിത്. ഇത്തരം അക്രമത്തെ പ്രതിരോധിക്കാനാവശ്യമായ നടപടികൾ കൈകൊള്ളേണ്ടത് അത്യാവശ്യമാണെന്ന് മംദാനിയുടെ വിജയത്തെ തുടർന്നുണ്ടായ സംഭവങ്ങൾ സൂചിപ്പിക്കുന്നു. അല്ലാത്ത പക്ഷം ഉണ്ടായേക്കാവുന്ന അനന്തര ഫലങ്ങൾ ഒരു സമൂഹത്തിന്റെയാകെ നിലനിൽപ്പിനു തന്നെ ഭീഷണിയാകാൻ തക്കവണ്ണം ഭീകരമായിരിക്കുമെന്നതിൽ സംശയമില്ല.