സത്യത്തില്‍ അവിടെ സ്ത്രീകള്‍ ഉണ്ടായിരുന്നോ? അഫ്ഗാന്‍ വിദേശമന്ത്രിയുടെ വാര്‍ത്താസമ്മേളന വിവാദത്തില്‍ കഴമ്പുണ്ടോ?

അഫ്ഗാനിസ്ഥാൻ വിദേശകാര്യമന്ത്രി അമീർ ഖാൻ മുത്തഖിയുടെ ഇന്ത്യാസന്ദർശനത്തിനിടെ, ഡൽഹിയിൽ നടത്തിയ വാർത്താസമ്മേളനത്തിൽ വനിത മാധ്യമപ്രവർത്തകരെ ഒഴിവാക്കിയത് വിവാദമായിരുന്നു. 2025 ഒക്ടോബർ 10 ന് ഡൽഹിയിലെ അഫ്ഗാൻ എംബസിയിൽ നടന്ന വാർത്താസമ്മേളനത്തിൽ, പുരുഷ മാധ്യമപ്രവർത്തകർക്ക് മാത്രമായിരുന്നു ക്ഷണം. 

എന്നാൽ വാർത്താസമ്മേളനത്തിൽ സ്ത്രീകളും ഉണ്ടായിരുന്നുവെന്ന് അവകാശപ്പെടുന്ന ഒരു ചിത്രം തൊട്ടടുത്ത ദിവസം സമൂഹമാധ്യമങ്ങളിൽ വൈറലായിരുന്നു. സ്ത്രീകൾ ഉൾപ്പെടുന്ന സദസ്സിൽ മുത്തഖി പ്രസംഗിക്കുന്ന ചിത്രമായിരുന്നു അത്. വനിതാ മാധ്യമ പ്രവർത്തകർക്ക് വാർത്താസമ്മേളനത്തിൽ പ്രവേശനമുണ്ടായിരുന്നുവെന്നും വനിതകളെ വിലക്കിയെന്നത് മോദി വിമർശകരുടെ വ്യാജ പ്രചാരണമാണെന്നുമായിരുന്നു അത് പ്രചരിപ്പിച്ചവരുടെ   അവകാശവാദം.

വാർത്താസമ്മേളനത്തിൽ വനിതകൾ പങ്കെടുത്തിരുന്നുവെന്നും അത് പരിശോധിക്കാതെയാണ് രാഹുൽ ഗാന്ധിയും പ്രിയങ്ക ഗാന്ധിയും വിമർശിച്ചതെന്നുമുള്ള വിവരണത്തോടൊയാണ്  Squint Neon  എന്ന അക്കൌണ്ടിൽ ഒക്ടോബർ 12ന് ചിത്രം പോസ്റ്റ് ചെയ്തത്. @RohitKu57792064 , Jasaraj Godara, തുടങ്ങി നിരവധി എക്സ് അക്കൗണ്ടുകളിലും അതേ ദിവസം ചിത്രം പോസ്റ്റ് ചെയ്തിട്ടുണ്ട്. 

ഫേസ്ബുക്കിലും സമാന പോസ്റ്റുകൾ പ്രചരിക്കുന്നുണ്ട്.

വസ്തുതയെന്ത്?

പ്രചാരണത്തിൻ്റെ വസ്തുത അറിയാൻ പ്രചരിക്കുന്ന ചിത്രം ഗൂഗിൾ റിവേഴ്സ് ഇമേജ് സേര്‍ച്ചിലൂടെ പരിശോധിച്ചപ്പോൾ  വിവേകാനന്ദ ഇൻ്റർനാഷണൽ ഫൗണ്ടേഷന്റെ (വിഐഎഫ് ഇന്ത്യ) എക്സ് (മുമ്പത്തെ ട്വിറ്റർ) പേജിൽ അപ്പ്ലോഡ് ചെയ്ത ചിത്രമാണ് ലഭിച്ചത്.  

ആർഎസ്എസുമായി ബന്ധമുള്ള സ്ഥാപനമായ വിവേകാനന്ദ ഇന്റർനാഷണൽ ഫൗണ്ടേഷൻ  2025 ഒക്ടോബർ 10 നാണ് ചിത്രം അപ്പ്ലോഡ് ചെയ്തതിരിക്കുന്നത്.  “അഫ്ഗാനിസ്ഥാൻ വിദേശകാര്യ മന്ത്രി അമീർ ഖാൻ മുത്തഖിയുമായി വിഐഎഫിൽ നടന്ന സംഭാഷണത്തിൻ്റെ പ്രസക്തഭാഗങ്ങൾ – രബീന്ദ്രനാഥ ടാഗോറിന്റെ കാബൂളിവാലയെക്കുറിച്ചുള്ള അദ്ദേഹത്തിന്റെ പരാമർശം സദസ്സിനെ ആകര്‍ഷിച്ചു ” എന്ന വിവരണത്തോടെയുള്ള പോസ്റ്റ് ചെയ്തിരിക്കുന്ന ചിത്രത്തില്‍  സ്ത്രീകളേയും കാണാം.

എന്നാല്‍ അഫ്ഗാൻ എംബസിയിൽ നടന്ന മുത്തഖിയുടെ വാർത്താസമ്മേളനത്തിൽ വനിത മാധ്യമപ്രവർത്തകരെ ഒഴിവാക്കിയതാണ് വിവാദമായത്. ഇക്കാര്യം  ദ ഹിന്ദു, ബിബിസി  ഉൾപ്പെടെയുള്ള ദേശീയ, അന്തർദേശീയ മാധ്യമങ്ങളും റിപ്പോർട്ട് ചെയ്തിട്ടുണ്ട്. 

പ്രതിഷേധം ഉയർന്നതോടെ, അഫ്ഗാൻ എംബസിയിൽ ഒക്ടോബർ 12 ന് വനിതാ മാധ്യമപ്രവർത്തകരെ ഉൾപ്പെടുത്തി വീണ്ടും വാർത്താസമ്മേളനം നടത്തുകയും ചെയ്തിരുന്നു. ഒക്ടോബർ 10ന്‍റെ വാര്‍ത്താസമ്മേളനത്തിൽ നിന്ന് വനിതാ മാധ്യമപ്രവർത്തകരെ ഒഴിവാക്കിയത് മനഃപൂർവമല്ലെന്നും സാങ്കേതിക പ്രശ്‌നമാണെന്നും അഫ്ഗാൻ വിദേശകാര്യ മന്ത്രി പിന്നീട് വിശദീകരിക്കുകയും ചെയ്തിരുന്നു. 

ഇതില്‍ നിന്നും ഒക്ടോബർ 10 ന് അഫ്ഗാൻ വിദേശകാര്യമന്ത്രി നടത്തിയ വാർത്താസമ്മേളനത്തിൽ വനിത മാധ്യമപ്രവർത്തകർ പങ്കെടുത്തിരുന്നുവെന്ന  പ്രചാരണം വസ്തുതാപരമല്ലെന്ന് വ്യക്തമാവുന്നു.