സ്ക്രീനില്‍ നിന്ന് കണ്ണെടുക്കുമ്പോള്‍ കുട്ടികള്‍ കാണുന്നത്
മൊബൈൽ ഫോണിൽ ഗെയിം കളിക്കുന്നത് ശീലമായതോടെ പഠനത്തിൽ ശ്രദ്ധിക്കാൻ കഴിയാതെ വരികയും മാനസിക ആരോഗ്യം മോശമാകുകയും ചെയ്ത പന്ത്രണ്ടുവയസുകാരൻ ആരവിനെ (പേര് യാഥാർത്ഥമല്ല) കുറിച്ച് പറയുകയായിരുന്നു അവന്റെ ക്ലാസ് ടീച്ചർ. കുട്ടിക്ക് ക്ലാസ്സിൽ ശ്രദ്ധയില്ലെന്നും പഠനത്തിൽ താല്പര്യമില്ലെന്നും കണ്ടതോടെയാണ് അദ്ധ്യാപകര്‍ അതിന്‍റെ കാരണം തേടിയത്. അവന്‍ സ്ക്രീനില്‍ നിന്ന് ഇറങ്ങിയ നേരമില്ലെന്ന് വീട്ടുകാരും പറഞ്ഞപ്പോഴാണ് സംഗതിയുടെ ഗൌരവം എല്ലാവര്‍ക്കും പിടികിട്ടുന്നത്.
എറണാകുളം കാക്കനാട്, തെങ്ങോട് ഗവ. ഹൈ സ്‌കൂളിലെ ഏഴാം ക്ലാസ് വിദ്യാർത്ഥിയാണ് ആരവ്. കൗൺസിലിംഗിലൂടെ ആരവ് മാനസികാരോഗ്യം വീണ്ടെടുത്തുവെങ്കിലും ഗെയിമുകൾ ഉൾപ്പെടുന്ന സൈബർ സ്പെയ്സിനെ എങ്ങനെ ഉത്തരവാദിത്തത്തോടുകൂടി ഉപയോഗിക്കാമെന്നുമുള്ള അവബോധം ഇപ്പോഴും അവന്റെ കൂട്ടുകാരില്‍ പലര്‍ക്കുമില്ല. ആരവിനെ പോലെ തന്നെ കേരളത്തിലെ സ്‌കൂളുകളിൽ പഠിക്കുന്ന വിദ്യാർത്ഥികളിൽ ഭൂരിഭാഗവും ഇപ്പോൾ സ്മാർട്ട് ഫോണുകൾ ഉപയോഗിക്കുന്നവരും സമൂഹ മാധ്യമ അക്കൗണ്ടുകൾ കൈകാര്യം ചെയ്യുന്നവരുമാണ്. പാഠ്യ പാഠ്യേതര പ്രവർത്തനങ്ങൾക്കും ഗെയിമിങ് പോലുള്ള വിനോദങ്ങൾക്കും തുടങ്ങി പുതിയ കാലത്തെ ഒരു സ്‌കൂൾ വിദ്യാർത്ഥിയുടെ ജീവിതത്തിന്‍റെ എല്ലാ ഘട്ടത്തിലും ഇന്റർനെറ്റും സജീവ സാന്മാനിധ്യമാണ്. അതുപോലെ, ആർട്ടിഫിഷ്യൽ ഇന്റലിജൻസ് പോലുള്ള നൂതന സാങ്കേതിക വിദ്യകളും കുട്ടികൾക്ക് എളുപ്പം ഉപയോഗിക്കാവുന്നതായി.
ഈ സാഹചര്യത്തില്‍ ഡിജിറ്റൽ ലോകത്ത് എങ്ങനെ സുരക്ഷിതരായിരിക്കാമെന്ന് നമ്മുടെ കുട്ടികൾക്ക് ധാരണ കുറവാണ്. ഇതിനായുള്ള പരിശീലനമോ പാഠങ്ങളോ ഒന്നും അവര്‍ക്കില്ല. ഈയൊരു വിഷയത്തെ അഭിസംബോധന ചെയ്യുന്നതായിരുന്നു എറണാകുളം ജില്ലയിലെ തെങ്ങോട് ഗവ. ഹൈ സ്‌കൂളിൽ ഒക്ടോബർ 25 ന്, ഒബിസി സംഘടിപ്പിച്ച ഡിജിറ്റൽ സുരക്ഷാ ശില്പശാല . ഡിജിറ്റൽ ലോകത്തെ ആശാസ്യമായ പെരുമാറ്റ രീതികളെ കുറിച്ചും ഇന്‍റര്‍നെറ്റും സാമൂഹ്യമാധ്യമങ്ങളും എങ്ങനെ ഉത്തരവാദിത്തത്തോടെ ഉപയോഗിക്കാമെന്നും മനസ്സിലാക്കാനുള്ള അവസരമായി മാറി വിദ്യാര്‍ത്ഥികളെ സംബന്ധിച്ചിടത്തോളം ഈ ശില്പശാല.
കുട്ടികൾക്കും അധ്യാപകർക്കും ഒരുപോലെ പ്രയോജനപ്പെടുന്ന അടിസ്ഥാന സൈബർ അറിവുകളിലൂന്നിയാണ് ഉള്ളടക്കം രൂപകല്‍പന ചെയ്തിരുന്നത്. ഹൈ സ്‌കൂൾ വിദ്യാർത്ഥികൾക്കിടയിൽ വ്യാപകമായ ഓൺലൈൻ ഗെയിമുകളുടെ ലോകത്ത് എങ്ങനെ സുരക്ഷിതമായി പെരുമാറാമെന്ന് കുട്ടികള്‍ ആസ്വദിച്ചു തന്നെ പഠിച്ചു.
ശക്തമായ ഒരു പാസ്സ് വേഡ് എങ്ങനെ ഉണ്ടാക്കാം എന്ന് തുടങ്ങി സൈബർ ബുള്ളിയിങ്ങിനെ എങ്ങനെ നേരിടണമെന്നും സൈബർ ലോകത്തെ കുറ്റകൃത്യങ്ങളെ എങ്ങനെ തിരിച്ചറിയാമെന്നും പഠിച്ചുകൊണ്ടാണ് അവര്‍ തിരിച്ചു പോയത്. ഉപയോഗിക്കാൻ വളരെ എളുപ്പമായ ഗൂഗിൾ ലെൻസ് പോലുള്ള ഉപാധികള്‍ ഉപയോഗിച്ചുകൊണ്ട് എങ്ങനെ സാമൂഹ്യ മാധ്യമങ്ങളില്‍ പ്രചരിക്കുന്ന വ്യാജ ചിത്രങ്ങളെയും മറ്റും തിരിച്ചറിയാം എന്നതും പരിശീലനത്തിന്റെ ഭാഗമായിരുന്നു.
