ട്രെയിനിനുള്ളിലെ ഈ നമസ്ക്കാരം കേരളത്തിലല്ല, ഉത്തർപ്രദേശിലാണ്

എറണാകുളം – ബെംഗളൂരു വന്ദേഭാരത് ട്രെയിനിന്‍റെ ഉദ്ഘാടനച്ചടങ്ങില്‍ ആര്‍ എസ്  എസ്  ഗണഗീതം സ്കൂള്‍ കുട്ടികളെ കൊണ്ട് പാടിച്ചതിനെ തുടര്‍ന്നുണ്ടായ വിവാദത്തിനിടെ പ്രചരിച്ച ഒരു ചിത്രമാണിത്. 

ഗണഗീത വിവാദത്തില്‍ സ്കൂളിനെതിരെ നിലപാടെടുത്ത സംസ്ഥാന വിദ്യാഭ്യാസ മന്ത്രിക്കെതിരായ പരാമര്‍ശത്തോടെയാണ് ഒരു കൂട്ടം ആളുകള്‍ ട്രെയിനില്‍ ഇസ്ലാമിക രീതിയില്‍ നമസ്കരിക്കുന്ന ചിത്രം പ്രചരിപ്പിക്കുന്നത്.  ഹിന്ദു ഐക്യവേദി നേതാവ് കെ പി ശശികലയുടെ പേരിലുള്ള ഫേസ് ബുക്ക് പേജ് വഴിയും ചിത്രം പ്രചരിച്ചിരുന്നു. എന്നാല്‍ വസ്തുതാ പരിശോധനയില്‍, ഈ ചിത്രം 2022 ലേതാണെന്നും സ്ഥലം കേരളമല്ല ഉത്തര്‍പ്രദേശാണെന്നും വ്യക്തമായി.

പരമ്പരാഗത മുസ്‌ലിം വേഷത്തിലുള്ള ഏതാനും യാത്രക്കാർ ട്രെയിൻ യാത്രക്കിടെ ഒരുമിച്ചിരുന്നു നമസ്‌കരിക്കുന്ന ചിത്രം 2025 നവംബർ 9-നാണ് ഹിന്ദു ഐക്യവേദി മുഖ്യ രക്ഷാധികാരി കെ.പി. ശശികലയുടെ പേരിലുള്ള ഫേസ്ബുക്ക് പേജിലൂടെ വൈറലാവുന്നത്. “സഖാവേ, അന്വേഷണം, പ്രതികരണം, പ്രതിഷേധം – എന്തെങ്കിലും ഉണ്ടോ ആവോ?” എന്നായിരുന്നു പോസ്റ്റിന്റെ അടിക്കുറിപ്പ്. കേരളത്തിലെ ട്രെയിനിൽ നടന്ന സംഭവം എന്ന് അവകാശപ്പെടുന്ന പോസ്റ്റിന് ഇതുവരെ 1,500 ലൈക്കും 372 ഷെയറുകളും 241 കമന്റുകളും ലഭിച്ചു. മറ്റു ചില ഫേസ്ബുക്ക്, എക്സ് അക്കൗണ്ടുകൾ വഴിയും ചിത്രം പ്രചരിച്ചു.

വസ്തുതയെന്ത്?

വൈറലായ പോസ്റ്റ് റിവേഴ്‌സ് ഇമേജ് സെർച്ച് ചെയ്തപ്പോൾ, 2022 ഒക്ടോബർ 23 ന് എൻഡിടിവി പ്രസിദ്ധീകരിച്ച, ഒരു റിപ്പോർട്ടാണ് ലഭിച്ചത്. ആ റിപ്പോർട്ടിൽ, അതേ ദൃശ്യങ്ങളടങ്ങിയ ഒരു വീഡിയോ ഉണ്ടായിരുന്നു. രണ്ടു ദൃശ്യങ്ങളുടേയും കീഫ്രെയിമുകൾ താരതമ്യം ചെയ്തപ്പോൾ, വീഡിയോയിലെ ദൃശ്യങ്ങൾ വൈറൽ ചിത്രവുമായി പൊരുത്തപ്പെടുന്നുണ്ടെന്ന് സ്ഥിരീകരിച്ചു. ഉത്തർപ്രദേശിൽ നടന്ന സംഭവമാണിതെന്നാണ് എൻഡിടിവി റിപ്പോർട്ട് പറയുന്നത്. 

നമാസ്, ഉത്തർ പ്രദേശ്, ട്രെയിൻ തുടങ്ങിയ ഉചിതമായ കീവേഡുകൾ ഉപയോഗിച്ച് തിരഞ്ഞപ്പോൾ, 2022 ഒക്ടോബർ 23 ലെ ന്യൂസ് 18 റിപ്പോർട്ടും ലഭിച്ചു. അതു പ്രകാരം ഒക്ടോബർ 20 ന് ഉത്തർപ്രദേശ് ഖുഷി നഗറിലെ ഖദ്ദ റെയിൽവേ സ്റ്റേഷനിൽ 15273 എന്ന നമ്പറിലുള്ള സത്യഗ്രഹ എക്സ്പ്രസിൽ നടന്ന  സംഭവമാണിത്. നമസ്കാരത്തിന്റെ വീഡിയോ ഓൺലൈനിൽ വൈറലായതോടെ അന്ന് വലിയ പ്രതിഷേധവും ഉയര്‍ന്നിരുന്നു. ട്രെയിനിലെ ഇത്തരം സംഭവങ്ങൾ പൊതുജനശല്യമാണെന്നും ചിലർ പരാതിപ്പെട്ടു. തുടർന്ന്, യുപി പോലീസ് സംഭവത്തെക്കുറിച്ച് അന്വേഷണം നടത്തിയിരുന്നു. 

ഇപ്പോൾ കേരളത്തിലെ ട്രെയിനിൽ നടന്ന ഒരു സംഭവമെന്ന തരത്തിൽ ഫോട്ടോ പ്രചരിപ്പിക്കുന്നവരുടെ അവകാശവാദം പൂർണമായും തെറ്റാണ്.