‘അയ്യപ്പമാല’യിട്ട കുട്ടികള്‍ കേരളത്തിലെ സ്കൂളുകളില്‍ വിവേചനം നേരിടുന്നുണ്ടോ?വ്യാജ വാര്‍ത്ത ഇങ്ങനേയും
കേരളത്തിലെ ഒരു സ്‌കൂളി’ൽ, അയ്യപ്പമാല ധരിച്ചെത്തിയ വിദ്യാർത്ഥിയെ പുറത്താക്കിയെന്ന് ആരോപിക്കുന്ന ഒരു വീഡിയോ സമൂഹ മാധ്യമങ്ങളിൽ വൈറലായിരുന്നു. ഒരു ഹിന്ദു വിദ്യാർത്ഥി സ്‌കൂളിൽ നേരിട്ട വിവേചനം എന്ന നിലയിലാണ് കേരളത്തെക്കുറിച്ച് തികച്ചും തെറ്റായ ആരോപണം ഉന്നയിക്കുന്ന വീഡിയോ പ്രചരിക്കുന്നത്. എന്നാൽ, ഒബിസിയുടെ പരിശോധനയിൽ, വീഡിയോ കേരളത്തിൽ നിന്നുള്ളതേയല്ല എന്ന് വ്യക്തമായി.
‘ഞെട്ടിക്കുന്ന വാർത്ത: കേരളത്തിലെ ഒരു സ്‌കൂളിൽ അയ്യപ്പമാല ധരിച്ചെത്തിയ ഒരു ഹിന്ദു വിദ്യാർത്ഥി സ്‌കൂളിൽ നിന്നും പുറത്താക്കപ്പെട്ടിരിക്കുന്നു. പ്രാദേശിക ഹിന്ദു സംഘടനാപ്രവർത്തകർ അധ്യാപികയെ ചോദ്യം ചെയ്തു, പോലീസ് ഇതുവരെ പ്രശ്നത്തിൽ പ്രതികരിച്ചിട്ടില്ല’ എന്ന കുറിപ്പോടുകൂടി 2025 നവംബർ അഞ്ചിനാണ് വീഡിയോ ഒരു എക്സ് അക്കൗണ്ട് വഴി പ്രചരിച്ചത്. 9,599 പേർ കണ്ട വീഡിയോ 1500 ലൈക്ക് ചെയ്യുകയും 632 പേർ റീപോസ്റ്റ് ചെയ്യുകയും ചെയ്തു. ഹിന്ദിയിലെഴുതിയ സമാനമായ കുറിപ്പോടുകൂടി ഒരു ഫേസ്ബുക്ക് അക്കൗണ്ട് വഴിയും ഇതേ വീഡിയോ പ്രചരിച്ചു.
വസ്തുതയെന്ത്?
വീഡിയോ പരിശോധിച്ചപ്പോൾ, അതിൽ കാണുന്ന ആളുകൾ സംസാരിക്കുന്ന ഭാഷ തെലുങ്ക് ആണെന്ന് മനസിലായി. അതില്‍ നിന്നുതന്നെ വീഡിയോ കേരളത്തിൽ നിന്നുള്ളതല്ല എന്ന് വ്യക്തമാണ്. ഇത് ഉറപ്പുവരുത്താനായി, ഞങ്ങള്‍ വീഡിയോയിലെ കീ ഫ്രയിമുകൾ പരിശോധിച്ചു. അതില്‍ ഓഫീസ് മുറിയിലെ ലോക്കറിൽ ‘P.R.T.U.T.S ‘ എന്ന ഒരു ചുരുക്കെഴുത്ത് കണാം. Progressive Recognized Teachers Union, Telangana എന്നതാണ് അതിന്‍റെ പൂർണ്ണരൂപമെന്ന് പിന്നീടുള്ള അന്വേഷണത്തില്‍ കണ്ടെത്താന്‍ കഴിഞ്ഞു. വീഡിയോ കേരളത്തിലേതല്ല, മറിച്ചു തെലങ്കാനയിലേതാണ് എന്ന് ഉറപ്പിക്കാന്‍ ഇത് സഹായകമായി. പ്രചരിക്കുന്ന വീഡിയോയിലെ സംഭവത്തിന് സമാനമായ വാർത്തകളൊന്നും കേരളത്തില്‍ റിപ്പോര്‍ട്ട് ചെയ്യപ്പെട്ടിട്ടുമില്ല. അതേസമയം തെലങ്കാനയിലും ആന്ധ്ര പ്രദേശിലും സമാനസംഭവങ്ങൾ നടന്നതായുള്ള വാർത്തകൾ ശ്രദ്ധയില്‍ പെട്ടു.
വൈറലായ വീഡിയോയുടെ സമഗ്രമായ പരിശോധനയിൽ അത് തെലങ്കാനയിൽ നിന്നുള്ളതാണെന്നു വ്യക്തമായി. അതായത് തെലങ്കാനയിൽ നിന്നുള്ള ഒരു സംഭവം കേരളത്തിലേതാണ് എന്ന് തെറ്റിദ്ധരിപ്പിക്കും വിധം ചിലര്‍ പ്രചരിപ്പിക്കുകയായിരുന്നു.
