കേരളത്തിലെ സര്‍ക്കാര്‍ സ്കൂളില്‍ ഇസ്ലാമിക പ്രാർത്ഥന അടിച്ചേൽപ്പിക്കുന്നുണ്ടോ? 

കേരളത്തിലെ ഒരു സർക്കാർ സ്‌കൂളിൽ, കുട്ടികളെ നിർബന്ധിച്ച് ഇസ്‌ലാമിക പ്രാർത്ഥന ചൊല്ലിക്കുന്നു എന്ന അരോപണവുമായി, ചില സാമൂഹ്യ മാധ്യമ അക്കൗണ്ടുകൾ ഒരു വീഡിയോ ഇപ്പോൾ പ്രചരിപ്പിക്കുന്നുണ്ട്. എറണാകുളം – ബെംഗളൂരു വന്ദേ ഭാരത് ട്രെയിനിന്റെ ഉദ്ഘാടന വേളയിൽ, കുട്ടികളെക്കൊണ്ട് ഗണഗീതം പാടിച്ച വിഷയത്തിൽ, വിദ്യാഭ്യാസ മന്ത്രി നടപടി സ്വീകരിച്ചതിനു  പിറകേയാണ് ഈ വീഡിയോ പ്രചരിച്ചു തുടങ്ങിയത്. 

പക്ഷെ, പഴയ വീഡിയോയാണ് ഇപ്പോൾ തെറ്റിദ്ധരിപ്പിക്കുന്ന തലക്കെട്ടോടെ ഏതാനും പേര്‍ പ്രചരിപ്പിക്കുന്നതെന്ന് പരിശോധനയിൽ മനസിലായി.     

പരിവാർ കൂട്ടായ്മ തൃശ്ശൂർ എന്ന വലതുപക്ഷ ഗ്രൂപ്പാണ് 2025 നവംബർ ഒൻപതിന് വീഡിയോ ദൃശ്യം ആദ്യം പങ്കുവച്ചത്. “ട്രെയിനിൽ കുട്ടികൾ പാടിയ ഗണഗീതം നിങ്ങൾക്ക് പ്രശ്നമെങ്കിൽ സർക്കാർ വിദ്യാലയത്തിൽ കുട്ടികളെ നിർബന്ധിച്ചു മത പ്രാർത്ഥന ചൊല്ലിക്കുന്നത് അതിനേക്കാൾ കുറ്റമല്ലേ ബഹു. അമ്പൊട്ടൻ വിദ്യാഭ്യാസ മന്ത്രി “എന്നായിരുന്നു വീഡിയോയുടെ തലക്കെട്ട്. 1500 ലൈക്കുകൾ ലഭിച്ച വീഡിയോ നവംബർ 15 വരെ 1000 പേർ ഷെയർ ചെയ്യുകയും 176 പേർ കമൻ്റ് ചെയ്യുകയും ചെയ്തു.

നവംബർ പത്താം തീയതി മറ്റൊരു ഫേസ്ബുക്ക് അക്കൗണ്ട് വഴിയും ഇതേ വീഡിയോ പ്രചരിച്ചിരുന്നു. സർക്കാർ സ്കൂളുകളിലെ ഇത്തരം പ്രവർത്തനങ്ങൾ, തിരഞ്ഞെടുപ്പിൽ, മുസ്‌ലിം വോട്ടുകൾ നേടാനുള്ള തന്ത്രമാണെന്നാണ് ഈ പോസ്റ്റ് പറയുന്നത്. സമാന അടിക്കുറിപ്പോടുകൂടി എക്സിലും വീഡിയോ പോസ്റ്റ് ചെയ്യപ്പെട്ടു.

വസ്തുതയെന്ത്?

ഗൂഗിൾ റിവേഴ്സ് ഇമേജ് സെർച്ച് ചെയ്തപ്പോൾ, 2024 ലും 2022 ലും ഈ വീഡിയോ വൈറൽ ആയിരുന്നുവെന്ന് കണ്ടെത്തി. അടുത്തിടെ നടന്ന ഒരു സംഭവല്ല വീഡിയോയിലുള്ളത് എന്ന് അതോടെ ഉറപ്പായി. “ഹസ്ബി റബ്ബി ജല്ലല്ലാഹ്” എന്ന അറബിക് താരാട്ടുപാട്ടാണ് കുട്ടികൾ പാടുന്നതെന്നും ഓഡിയോ പരിശോധനയിൽ മനസിലായി.

 വൈറൽ വീഡിയോയുടെ കീ ഫ്രയിമുകൾ പരിശോധിച്ചപ്പോൾ, പാലക്കാട്ടെ അഹല്യ പബ്ലിക്ക് സ്‌കൂളിന്റെ വെബ്സൈറ്റിലേക്ക് നയിച്ചു. വൈറൽ വീഡിയോയിലെ ചിത്രവും   വെബ്‍സൈറ്റിലെ ചിത്രവും താരതമ്യം ചെയ്തപ്പോൾ, രണ്ടും ഒന്നുതന്നെയാണ് എന്ന് മനസിലായി. പ്രചരിക്കുന്ന വീഡിയോ പാലക്കാടുള്ള അഹല്യ പബ്ലിക്ക് സ്‌കൂളിലേതാണെന്നും ഉറപ്പായി.
ആ സ്വകാര്യ സ്‌കൂളിൽ, ശ്രീകൃഷ്ണ ജയന്തി, ക്രിസ്‌മസ്‌ പോലുള്ള മറ്റ്‌ ആഘോഷങ്ങളും നടന്നിട്ടുണ്ടെന്ന് വെബ്‌സൈറ്റിലെ മറ്റു ചിത്രങ്ങൾ പരിശോധിച്ചപ്പോൾ മനസിലായി.

അതായത്, കേരളത്തിലെ സർക്കാർ സ്‌കൂളിൽ നിർബന്ധിച്ച് ഇസ്ലാമിക മത പ്രാർത്ഥന നടത്തുന്നുവെന്ന ആരോപണത്തോടെ പ്രചരിക്കുന്ന വീഡിയോ വസ്തുതാവിരുദ്ധമാണ്. 

(കൂടുതൽ വിവരങ്ങള്‍ തേടി ഞങ്ങൾ സ്‌കൂൾ അധികൃതരെ ബന്ധപ്പെട്ടിരുന്നുവെങ്കിലും മറുപടി ലഭിച്ചിട്ടില്ല. അവരുടെ പ്രതികരണം ലഭിക്കുന്നതിനനുസരിച്ച് ലേഖനത്തിൽ ഉൾപ്പെടുത്തുന്നതായിരിക്കും)