തെരഞ്ഞെടുപ്പുകാലത്തെ വ്യാജവാര്‍ത്തകള്‍
തെരഞ്ഞെടുപ്പ് കാലത്ത് അനിയന്ത്രിതമായി പ്രചരിപ്പിക്കപ്പെടുന്ന വ്യാജവാർത്തകളെ എങ്ങനെയാണ് നിയന്ത്രിക്കാൻ കഴിയുക? തൃശ്ശൂർ ജില്ലയിലെ വിവിധ കോളേജുകളിൽ നിന്നുള്ള ഒരു കൂട്ടം വിദ്യാർഥികൾ ഉന്നയിച്ച ചോദ്യമായിരുന്നു ഇത്. സമൂഹ മാധ്യമങ്ങൾ വഴിയാണല്ലോ കൂടുതലായും വ്യാജ വാർത്തകൾ പ്രചരിപ്പിക്കപ്പെടുന്നത്, എങ്ങനെയാണ് അതിനെ ഫലപ്രദമായി പ്രതിരോധിക്കാനാവുക? വിദ്യാർത്ഥികളുടെ ചോദ്യം പ്രസക്തമായിരുന്നു. കേരളം രണ്ടു തെരഞ്ഞെടുപ്പുകളെ അഭിമുഖീകരിക്കാനുള്ള തയ്യാറെടുപ്പിലാണ്.
പാർട്ടി ഓഫീസുകള്‍ മുതല്‍ സോഷ്യൽ മീഡിയ വരെ ലഭ്യമായ എല്ലാ പൊതുവേദികളിലും തെരഞ്ഞെടുപ്പ് പ്രചാരണം നടക്കുന്ന സമയമാണിത്. ഇതേ സമയത്തു തന്നെയാണ് വ്യാജവാർത്തകൾ ഏറ്റവും കൂടുതൽ പ്രചരിക്കുന്നതും. സമൂഹ മാധ്യമങ്ങളിലൂടെ തന്നെയാണ് ഏറ്റവും കൂടുതൽ വാർത്തകൾ ഉണ്ടാകുന്നതും.
തുടർച്ചയായ മോണിറ്ററിങ് കൊണ്ടുമാത്രമേ സോഷ്യൽ മീഡിയ വഴിയുള്ള വ്യാജ പ്രചാരണങ്ങളെ നേരിടാനാവൂ എന്നാണ് ഏകദിന ഫാക്ട് ചെക്കിങ് ശില്പശാലയിലൂടെ ഒബിസി വിദ്യാർത്ഥികളോട് പറയാന്‍ ശ്രമിച്ചത്. ഗൂഗിൾ ലെൻസ്, ഗൂഗിൾ റിവേഴ്‌സ് ഇമേജ് സെർച്ച്, ആർട്ടിഫിഷ്യൽ ഇന്റലിജൻസ് തുടങ്ങിയ പുതിയ കാലത്തെ വിവിധ ഉപാധികള്‍ ഉപയോഗിച്ച് എങ്ങനെയാണ് വ്യാജ വാർത്തകളും അപകീർത്തിപരമായ ഉള്ളടക്കവും തിരിച്ചറിയേണ്ടതെന്നും ശില്പശാല ചർച്ച ചെയ്തു. സാമൂഹ്യമാധ്യമങ്ങൾ വഴി അടുത്തിടെ പ്രചരിച്ച ചില വ്യാജ വാർത്തകളെ ഉദാഹരിച്ചുകൊണ്ട് എങ്ങനെയാണ് ഒരു വാർത്തയുടെ ഉള്ളടക്കം വളച്ചൊടിക്കപ്പെടുന്നത് എന്നും വിദ്യാർത്ഥികൾക്ക് മുന്നിൽ അവതരിപ്പിക്കാനായി.
നമുക്കിടയില്‍ പ്രചരിക്കുന്ന വാർത്തകൾ വസ്തുതയോ വ്യാജമോ എന്ന് മനസിലാക്കാനുള്ള സ്വാഭാവികമായ ശ്രമം എല്ലാവരും നടത്തണമെന്നും ഓരോ വ്യക്തിയും ഫാക്ട് ചെക്കർ ആവേണ്ട കാലമാണിതെന്നും ശില്പശാല ഓര്‍മ്മിപ്പിച്ചു.
