കെണിയിൽപ്പെട്ട ‘കടക്കെണി’

കേരളം കടക്കെണിയിലാണോ? 2024–25 കംട്രോളർ ആന്റ് ഓഡിറ്റർ ജനറലിന്റെ (CAG) പ്രാഥമിക കണക്കുകളും ഒക്ടോബറിൽ പുറത്തിറങ്ങിയ പുതിയ ദശാബ്ദ അവലോകന റിപ്പോർട്ടും അടിസ്ഥാനമാക്കി സ്വതന്ത്ര ഗവേഷകനായ ഗോപകുമാർ മുകുന്ദൻ വിശകലനം ചെയ്യുന്നു.

കേരളം കടക്കെണിയിൽ പെട്ട് തകരാൻ പോകുന്നു എന്ന ആഖ്യാനം പ്രബലമാണ്. കേരളത്തിൽ ഒരുസ്വതന്ത്ര പരമാധികാര രാജ്യമായ ശ്രീലങ്കയുമായി താരതമ്യം ചെയ്താണ് ഈ ആഖ്യാനങ്ങൾ കളം പിടിക്കുന്നത്. അന്താരാഷ്ട്ര വിപണിയിൽ നിന്നും ബഹുരാഷ്ട്ര ഏജൻസികളിൽ നിന്നും എടുത്ത വായ്പയുടെ തിരിച്ചടവിൽ വീഴ്ച വരുത്തിയതാണ് (sovereign default) ശ്രീലങ്കയുടെ പ്രതിസന്ധിക്ക് കാരണം. അടിസ്ഥാനപരമായി വിദേശ നാണയ പ്രതിസന്ധിയായിരുന്നു (Balance of payment Crisis) ശ്രീലങ്കയുടേത്. വർദ്ധിച്ച വ്യാപാരക്കമ്മി മൂലം (Trade deficit) വായ്പാ തിരിച്ചടവിനും അവശ്യ വസ്തുക്കളുടെ ഇറക്കുമതിക്കും വേണ്ട വിദേശ നാണയം ഇല്ലാതെ ശ്രീലങ്ക ഞെരുങ്ങി. ആവശ്യമുള്ളത്ര മരുന്നും രാസവളങ്ങളും എണ്ണ ഉൽപ്പന്നങ്ങളും ഇറക്കുമതി ചെയ്യാനാകാത്തതു മൂലം ഇവയുടെ വിതരണത്തിലും ഉപയോഗത്തിനും എല്ലാം സർക്കാർ നിയന്ത്രണം ഏർപ്പെടുത്തി. കുപ്രസിദ്ധമായ ജൈവക്കൃഷി നയം ഇറക്കുമതി രാസ വളങ്ങളുടെ മേൽ നിയന്ത്രണം കൊണ്ടു വരുന്നതിനുള്ള കുറുക്ക് വഴിയായിരുന്നു എന്ന് അനുമാനിക്കപ്പെടുന്നു. ഇത് ശ്രീലങ്കൻ തേയില ഉൽപ്പാദനത്തിലും കയറ്റുമതിയിലും ഇടിവുണ്ടാക്കി. അതു ശ്രീലങ്കയുടെ വ്യാപാരക്കമ്മിയും വിദേശ നാണയ പ്രതിസന്ധിയും വീണ്ടും വഷളാക്കി. അവിടെ വലിയ ജനകീയ കലാപം പൊട്ടിപ്പുറപ്പെടുകയും തിരഞ്ഞെടുപ്പിൽ ഭരണകക്ഷി തൂത്തെറിയപ്പെടുകയും ചെയ്തു. ജനകീയ കലാപത്തിനു നേതൃത്വം കൊടുത്തവരെ ജനങ്ങൾ അധികാരത്തിൽ അവരോധിച്ചു.

സാമാന്യം വിശദമായി ഈ കഥ പറഞ്ഞത് കേരളത്തെ ശ്രീലങ്കയുമായി താരതമ്യപ്പെടുത്തുന്ന ആഖ്യാനങ്ങളുടെ അസംബന്ധ സ്വഭാവം വ്യക്തമാക്കാനാണ്. കേരളം ഒരു പരമാധികാര രാജ്യമല്ല. വിദേശ നാണയമോ വിദേശ വായ്പയോ ഒന്നും കേരളത്തിന്റെ അധികാര പരിധിയിലുമല്ല. വിദേശ വായ്പ എടുക്കാൻ കേരളത്തിനു തനിയെ അധികാരവുമില്ല. കേരളം എങ്ങനെയാണ് വിദേശനാണയ പ്രതിസന്ധിയിൽപ്പെടുന്നത്? ഇപ്പോഴത്തെ നടപടിക്രമം അനുസരിച്ച് യൂണിയൻ സർക്കാരിന്റെ അനുമതിയോടെ, അനുവദിക്കുന്ന പരിധിയിൽ നിന്നു മാത്രമേ ആഭ്യന്തര വായ്പ പോലും എടുക്കാൻ കഴിയൂ. പിന്നെങ്ങനെയാണ് കേരളം ശ്രീലങ്ക പോലെയാകുന്നത്? ഇതാണ് കടം സംബന്ധിച്ച് കേരളത്തിൽ നടക്കുന്ന ആഖ്യാനങ്ങളുടെ സ്വഭാവം. കേരളം കടക്കെണിയിലാണ് എന്നും കടമെടുപ്പിലൂടെയാണ് കേരളം നിത്യച്ചെലവുകൾ ചെയ്യുന്നതെന്നുമുള്ള പ്രചാരണം കേരളം മുന്നോട്ട് വെയ്ക്കുന്ന ബദലുകളെ അദൃശ്യമാക്കുന്നു. ‘ഇരട്ട എഞ്ചിൻ’ സർക്കാർ അല്ലാതെ വഴിയില്ല എന്ന പൊതു ബോധം സൃഷ്ടിക്കുകയാണ് ഇതിലൂടെ സാധിക്കുന്നത്.

കേരളത്തിന്റെ പ്രധാന വരുമാനം കടമെടുപ്പിലൂടെയാണോ? ഈ കടം എന്നു പൊതുവിൽ പറയുന്നത് ഒരൊറ്റ സംഗതിയാണോ? ഇന്ത്യയിൽ ഏറ്റവും കൂടുതൽ കടമുള്ള സംസ്ഥാനമാണോ കേരളം? 2024-2025 വർഷത്തെ CAG യുടെ പ്രാഥമിക കണക്കുകൾ വെച്ചു നമുക്ക് കേരളത്തിന്റെ വരവുകൾ എന്തൊക്കെ എന്നു നോക്കാം. കടം വരുമാനം എത്ര എന്നും ആകെ കട ബാധ്യത എത്ര എന്നും നോക്കാം. ഇവയിലെല്ലാം രാജ്യത്ത് കേരളത്തിന്റെ സ്ഥിതി എന്താണ് എന്നതും ലഘുവായി പരിശോധിക്കാം. CAG ആദ്യമായി സംസ്ഥാനങ്ങളുടെ ധന സ്ഥിതി സംബന്ധിച്ച ഒരു ദശാബ്ദ അവലോകന റിപ്പോർട്ട് 2025 ഒക്ടോബറിൽ പ്രസിദ്ധീകരിച്ചിട്ടുണ്ട്. അവയിലെ കണക്കുകളാണ് ഇവിടെ താരതമ്യത്തിന് ഉപയോഗിക്കുന്നത്.

വായ്പയാണോ വരുമാനം? അതോ യൂണിയൻ ട്രാൻസ്ഫറോ?

സ്ത്രീകൾക്കുള്ള പുതിയ സാമൂഹ്യ ക്ഷേമ പദ്ധതിയും യുവജനങ്ങൾക്കുള്ള സ്കില്ലിങ് സ്കോളർഷിപ്പും സാമൂഹ്യ സുരക്ഷാ പെൻഷൻ വർദ്ധനവും പ്രഖ്യാപിച്ചപ്പോഴും ഉയർന്ന ചോദ്യമുണ്ട്. കടം വാങ്ങി ഇതെത്രനാൾ കൊടുക്കും? സാമൂഹ്യ സുരക്ഷാ പെൻഷൻ കടം വാങ്ങിയാണ് കൊടുക്കുന്നത് എന്ന വിവരം തന്നെ ഞെട്ടിച്ചു എന്നു പറഞ്ഞത് പ്രശസ്തനായ ഒരു ധന ശാസ്ത്ര പണ്ഡിതനാണ്. പ്രൈം ടൈം ടി.വി ചർച്ചകളിൽ പലപ്പോഴും നിറഞ്ഞു നിൽക്കുന്ന ഒന്നാണ് കേരളം കടം വാങ്ങി നിത്യച്ചെലവു ചെയ്യുന്നു എന്ന ആഖ്യാനം. കേരളത്തിന്റെ വരുമാനം എന്തൊക്കെയാണ്? വായ്പയാണോ മുഖ്യ വരുമാനം?
ഇവിടെ ഒരു പട്ടിക കൊടുത്തിട്ടുണ്ട്. കഴിഞ്ഞ സാമ്പത്തിക വർഷത്തെ (2024-2025) കേരളത്തിന്റെ വരമാനമാണ് ഇതിലുള്ളത്. CAG യുടെ പ്രാഥമിക കണക്കുകളാണ് ആധാരം.

കേരളത്തിന്റെ 2024-2025 ലെ ആകെ റവന്യൂ വരവ് 1,24,760 കോടി രൂപയാണ്. കേരളം പിരിക്കുന്ന തനതു നികുതി, നികുതിയേതര വരവുകളും യൂണിയൻ സർക്കാർ കൈമാറിത്തരുന്ന നികുതി വിഹിതവും ഗ്രാന്റുകളും ചേരുന്നതാണ് ആകെ റവന്യൂ വരുമാനം എന്നു പറയുന്നത്. വായ്പയും അഡ്വാൻസുകളുടെ തിരിച്ചടവും ഒഴികെയുള്ള വരുമാനം എന്നു മനസിലാക്കിയാൽ മതി. ഇതിൽ കേരളത്തിന്റെ തനതു റവന്യൂ 1,00,457 കോടി രൂപയായിരുന്നു. അതായത് ആകെ റവന്യൂ വരുമാനത്തിന്റെ 80.5 ശതമാനവും കേരളത്തിന്റെ തനതു വരുമാനമായിരുന്നു എന്നു സാരം. യൂണിയൻ കൈമാറ്റമായി കിട്ടിയത് 2,42,13 കോടി രൂപയായിരുന്നു. ആകെ റവന്യൂ വരുമാനത്തിന്റെ 19.5 ശതമാനം മാത്രമായിരുന്നു ഇത്. വായ്പയാണോ നമ്മുടെ പ്രധാന വരുമാനം? അതുമല്ലെങ്കിൽ യൂണിയൻ ട്രാൻസ്ഫർ ആണോ?

യൂണിയൻ ട്രാൻസ്ഫർ ആയി 2024-2025 ൽ കിട്ടിയ പണം 19.5 ശതമാനം ആണെന്ന് കണ്ടല്ലോ? എല്ലാ സംസ്ഥാനങ്ങളുടെയും ശരാശരി സ്ഥിതി എന്താണ്? 2013-2023 കാലത്ത് 28 സംസ്ഥാനങ്ങളുടെ കൂട്ടായ റവന്യൂ വരുമാനത്തിൽ (Combined Revenue Receipts ) 44 ശതമാനം യൂണിയൻ ട്രാൻസ്ഫർ ആയിരുന്നു. തനതു പിരിവ് 56 ശതമാനവും. ഇതേ കാലത്ത് കേരളത്തിന്റെ ആകെ റവന്യൂ വരുമാനം (2013-2023 കാലത്തേത്) 8,64,853 കോടി രൂപയായിരുന്നു. അതിൽ 2,93,029 കോടി രൂപയാണ് യൂണിയൻ വിഹിതം (കേന്ദ്രാവിഷ്കൃത പദ്ധതി ഗ്രാന്റുകൾ, മറ്റു ഗ്രാന്റുകൾ എന്നിവയായി കൈമാറ്റം ചെയ്യപ്പെട്ടു കിട്ടിയ പണം). മൊത്തം വരുമാനത്തിന്റെ എത്ര ശതമാനം വരുമിത്? ആകെ റവന്യൂ വരുമാനത്തിന്റെ 33.88 ശതമാനം. അതാണ് ഇപ്പോൾ 20 ശതമാനത്തിൽ എത്തി നിൽക്കുന്നത്. അതായത് കഴിഞ്ഞ ഒരു ദശാബ്ദത്തിലേറെയായി കേരളത്തിന് ലഭിക്കുന്ന യൂണിയൻ ട്രാൻസ്ഫർ ദേശീയ ശരാശരിയിലും 10 ശതമാനം കുറവാണ്.

2022-2023 ലെ ആകെ യൂണിയൻ കൈമാറ്റത്തിന്റെ 73 ശതമാനം പത്തു സംസ്ഥാനങ്ങൾക്കാണ് ലഭിച്ചത് എന്നാണ് CAGയുടെ ദശാബ്ദ അവലോകന റിപ്പോർട്ട് വ്യക്തമാക്കിയത്. ഉത്തർ പ്രദേശ് (17.89%), ബീഹാർ(10.07%), മദ്ധ്യ പ്രദേശ് (7.86%), പശ്ചിമബംഗാൾ (7.53%), മഹാരാഷ്ട്ര (6.33%), രാജസ്ഥാൻ(6.03%), ഒഡീഷ (4.53%), തമിഴ്നാട്(4.08%), ആന്ധ്ര പ്രദേശ് (4.02%) കർണാടക (3.65%). എന്നിവയാണ് ഈ സംസ്ഥാനങ്ങൾ. 2013 മുതൽ 2023 വരെയുള്ള കണക്കുകൾ നോക്കിയാലും ഈ സംസ്ഥാനങ്ങൾക്ക് ആകെ യൂണിയൻ കൈമാറ്റത്തിന്റെ 73 ശതമാനം ലഭിച്ചു എന്നതാണ് റിപ്പോർട്ട് പറയുന്നത്. അതേ സമയം കേരളത്തിന് ഇക്കാലയളവിൽ ലഭിച്ചത് ആകെ യൂണിയൻ കൈമാറ്റത്തിന്റെ 1.93 ശതമാനമാണ്. നമുക്ക് ഇപ്പോഴത്തേതിനേക്കാൾ ഉയർന്ന നികുതി വിഹിതം ഉണ്ടായിരുന്നപ്പോഴും ആകെ യൂണിയൻ കൈമാറ്റത്തിൽ കേരളം നേരിട്ട വിവേചനത്തിന്റെ ചിത്രം വ്യക്തമാക്കുന്നതാണ് ഈ കണക്കുകൾ.

കേരളത്തിൽ നിറഞ്ഞാടുന്ന മറ്റൊരു ആഖ്യാനം കേരളം നികുതി പിരിക്കാത്ത സംസ്ഥാനമാണ്, എല്ലാം ‘കേന്ദ്രം’ തരുന്നതാണ്, അങ്ങോട്ടു കൈനീട്ടി ഇരിപ്പാണ് എന്നതാണല്ലോ. 2013-2014 മുതൽ 2022-2023 വരെയുള്ള കാലത്ത് കേരളത്തിന്റെ തനത് റവന്യൂ വളർച്ചയുടെ കണക്ക് പരിശോധിക്കാം. 2013-2014 ൽ 3,75,70 കോടി രൂപയായിരുന്ന തനതു റവന്യൂ വരുമാനം 2024-2025 ൽ 1,00,457 കോടി രൂപയായി ഗണ്യമായി ഉയർന്നു. ഇത് അഖിലേന്ത്യ പ്രവണതകളേക്കാൾ മെച്ചപ്പെട്ട സ്ഥിതിയാണ്. സർക്കാരിന്റെ വാർഷിക വായ്പയുടെ തോത് മനസിലാക്കുന്നത് ധനക്കമ്മി (Fiscal Deficit) എത്രയാണ് എന്നു നോക്കിയാണല്ലോ? 2015-2016 ലെ കണക്കുകൾ പ്രകാരം ധനക്കമ്മി ആഭ്യന്തര വരുമാനത്തിന്റെ (GSDP) 3.5 ശതമാനമാണ്. യൂണിയൻ സർക്കാർ അനുവദിച്ച ധനക്കമ്മി പരിധിയുടെ ഉള്ളിലാണ് കേരളത്തിന്റെ വായ്പ എന്നത് കാണണം. 2023-2024 ൽ അനുവദനീയമായ 3.5 ശതമാനം വായ്പ എടുക്കാൻ കേരളത്തെ അനുവദിച്ചില്ല. ആ വർഷത്തെ അവസാന കണക്കുകൾ അനുസരിച്ചുള്ള ധനക്കമ്മി 2.99 ശതമാനമാണ്. ഇങ്ങനെ 2023-2024 ൽ കേരളത്തിനു നിഷേധിക്കപ്പെട്ട വായ്പ ഏതാണ്ട് 6000 കോടി രൂപയാണ്. നടപ്പു സാമ്പത്തിക വർഷത്തെ ബജറ്റ് അനുമാനങ്ങൾ അനുസരിച്ചുള്ള ധനക്കമ്മി 3.16 ശതമാനം മാത്രമാണ്. യൂണിയൻ ബജറ്റ് നിർദ്ദേശങ്ങൾ തന്നെ 3.5 ശതമാനം ധനക്കമ്മി അനുവദിക്കുന്നുണ്ട് എന്നു മനസിലാക്കണം. യൂണിയൻ സർക്കാരിന്റെ ധനക്കമ്മി 2024-2025 ൽ 4.8 ശതമാനമാണ്. 2023-2024 ൽ ധനക്കമ്മി 5.6 ശതമാനമായിരുന്നു. അനുവദനീയമായ വായ്പ പോലും എടുക്കാൻ കേരളത്തെ സമ്മതിക്കാത്ത യൂണിയൻ സർക്കാർ നിയമ പരിധി വിട്ടു കടം വാങ്ങുന്ന ചിത്രമാണ് ബജറ്റ് കണക്കുകൾ പറയുന്നത്.

കേരളത്തിന്റെ പ്രധാന വരുമാനം കടമെടുപ്പിൽ നിന്നല്ല യൂണിയൻ വിഹിതവുമല്ല. സംസ്ഥാനത്തിന്റെ തനതു വരുമാനം തന്നെയാണ്. കേരളത്തിനു ലഭിക്കുന്ന യൂണിയൻ ട്രാൻസ്ഫർ കഴിഞ്ഞ ഒരു ദശാബ്ദത്തെ കണക്കെടുത്താൽ തന്നെ ദേശീയ ശരാശരിയേക്കാൾ 10 ശതമാനം കുറഞ്ഞ വിഹിതമാണ്. നികുതി വിഹിതത്തിൽ മാത്രമല്ല വിവേചനം, കേന്ദ്രാവിഷ്കൃത പദ്ധതികൾ അടക്കം വിവിധ ഗ്രാന്റുകളിലും കടുത്ത വിവേചനമാണ് കേരളം നേരിടുന്നത്.

സഞ്ചിത ബാധ്യത (Total Outstanding liability)

കേരളം കടം കൊണ്ട് മുങ്ങിത്താഴുന്നു എന്ന പ്രചണ്ഡമായ പ്രൊപ്പഗണ്ടയുടെ പൊള്ളത്തരം CAG റിപ്പോർട്ട് വെളിവാക്കിയിട്ടുണ്ട്. 2013-2014 മുതൽ 2022-2023 വരെയുള്ള ഒരു ദശകത്തിലെ പ്രവണതകൾ CAG ഈ റിപ്പോർട്ടിൽ വിശകലനം ചെയ്തു. എന്താണ് സംസ്ഥാനങ്ങളുടെ ധന സ്ഥിതിയിലെ ദീർഘകാല പ്രവണത എന്നു CAG നോക്കി എന്നു സാരം. CAG റിപ്പോർട്ടിൽ കേരളം കടം കൊണ്ട് മുടിഞ്ഞ ഒരു സംസ്ഥാനമല്ല (debt strained) എന്നാണ് പറയുന്നത്. അങ്ങനെ ചുമ്മാ പറയുകയല്ല ഈ റിപ്പോർട്ട് (State Finances 2022-23 : Comptroller and Auditor General of India) ചെയ്യുന്നത്. 28 സംസ്ഥാനങ്ങളിൽ എട്ടെണ്ണത്തിനു മുപ്പതു ശതമാനത്തിൽ അധികം പൊതുക്കടം (Public Debt) ഉള്ളവയാണ്. പതിന്നാലു സംസ്ഥാനങ്ങളുടെ പൊതുക്കടം 20 നും 30 നും ഇടയിലാണ്. ഇതിലാണ് കേരളം വരുന്നത്. കേരളത്തിന്റെ പൊതുക്കടം കൃത്യമായി പറഞ്ഞാൽ 24.71 ശതമാനമാണ്. ആ ബ്രാക്കറ്റിൽ തന്നെ കേരളം ഏഴാമതാണ്. ഈ പൊതുക്കടം 2023-2024 ൽ 23.38 ശതമാനമായും 24-25 ൽ 23.33 ശതമാനമായും കുറഞ്ഞു എന്നതും ബജറ്റ് രേഖകൾ നോക്കിയാൽ മനസിലാകും.

എന്തുകൊണ്ടാണ് പൊതുക്കടം ഇവിടെ പറയുന്നത്? കടഭാരം അളക്കാൻ അനുയോജ്യമായത് Public Debt ആണ് എന്നത് CAG തന്നെ അംഗീകരിക്കുകയാണ്. ബജറ്റിൽ നിന്നും പലിശയടക്കം തിരിച്ചടവ് നടത്തുന്ന കടം ഈ പൊതുക്കടമാണ്. ട്രഷറിയിൽ ആളുകൾ നിക്ഷേപിക്കുന്ന പണം (Public Account) സംസ്ഥാനത്തിന്റെ കട ബാധ്യതയാണ് എന്ന അനുമാനം അബദ്ധമാണ്. ഏതൊരു നിക്ഷേപവും പോലെ സ്വയം മാനേജ് ചെയ്യപ്പെടുന്നതാണ് Public Account എന്നതു കാണണം. ഇതിലാണ് പ്രോവിഡന്റ് ഫണ്ട്, ചെറുകിട സമ്പാദ്യ നിക്ഷേപങ്ങൾ വരുന്നത്. പൊതു മേഖലാ സ്ഥാപനങ്ങളുടെ വായ്പ (കിഫ്ബി പോലെ) സംസ്ഥാന സർക്കാരിന്റെ പ്രിൻസിപ്പൽ ലയബിലിറ്റിയല്ല എന്നാണ് കേരളത്തിന്റെ വാദം. അവിടെയും തിരിച്ചടവ് ബജറ്റ് ബാധ്യതയല്ല. എന്നാൽ യൂണിയൻ സർക്കാരിന്റെ കുതന്ത്രങ്ങളുടെ വഴി പിടിച്ച് ഇതടക്കമുള്ള total outstanding liability യുടെ കണക്ക് എടുത്ത് കേരളം തകർന്നു എന്ന കഥ പ്രചരിപ്പിക്കുകയാണ് ഇവിടത്തെ രീതി. ഇതെല്ലാം ചേരുന്ന കേരളത്തിന്റെ ആകെ കട ബാധ്യതയും കുറയുകയാണ്. കടം ആഭ്യന്തര വരുമാനത്തിന്റെ ശതമാനമായി പറയുന്നതാണ് ശരി. എന്നാൽ കടം തുകയിൽ പറയുക, തുകയിലുള്ള വർദ്ധനവ് പറഞ്ഞു പേടിപ്പിക്കുക എന്നതാണ് ഇവിടെ സ്വീകരിക്കുന്ന സമീപനം. കേരളത്തിന്റെ ആകെ കട ബാധ്യത അഞ്ചു കൊല്ലം കൂടുമ്പോൾ ഇരട്ടിച്ചു കൊണ്ടിരിക്കുന്നു എന്ന കണക്ക് ഈ കടപ്പേടി ജനിപ്പിക്കാൻ വേണ്ടിയാണ്. എല്ലാം കടമാണ് എന്നു വരുത്താനുള്ള ഒരു പ്രൊപ്പഗണ്ടയാണ്.

CAG യുടെ ദശാബ്ദ അവലോകന റിപ്പോർട്ടിൽ കേരളത്തിന്റെ 2022-2023 ലെ ആകെ കട ബാധ്യതയായി പറഞ്ഞിരിക്കുന്നത് 3,85,030 കോടി രൂപയാണ്. ഇതിൽ വിപണി വായ്പയും ധന കാര്യ സ്ഥാപനങ്ങളിൽ നിന്നുള്ള വായ്പ്പയും ചേരുന്ന ആഭ്യന്തര കടം (internal debt) 2,27,137 കോടി രൂപയാണ്. യൂണിയൻ സർക്കാരിൽ നിന്നുള്ള വായ്പയും അഡ്വാൻസുകളും (ഉദാഹരണത്തിന് മുണ്ടക്കൈ-ചൂരൽമല പശ്ചാത്തല നിർമ്മിതിയ്ക്ക് വായ്പയായി നൽകിയ 529.5 കോടി രൂപ പോലുള്ളവ) 25369 കോടി രൂപയും. ഇത് രണ്ടും ചേരുന്ന 2,52,506 കോടി രൂപയാണ് 2022-2023 ലെ പൊതുക്കടം (public Debt) എന്നു പറയുന്നത്. ട്രഷറി നിക്ഷേപം ( Public Account ) ബാധ്യത 1,32,524 കോടി രൂപയാണ്. ഇത് നമ്മുടെ ആകെ കട ബാധ്യതയുടെ 34.5 ശതമാനമാണ്. ഇത് ബജറ്റിൽ നിന്നും തിരിച്ചടവ് നടത്തുന്ന പണമല്ല എന്നത് മനസിലാക്കേണ്ടതുണ്ട്. അതേ സമയം എല്ലാ സംസ്ഥാനങ്ങളുടെയും ശരാശരി Public Account ബാധ്യത ആകെ കട ബാധ്യതയുടെ 18 ശതമാനമേയുള്ളൂ. മറ്റൊരു തരത്തിൽ പറഞ്ഞാൽ ശരാശരി ആകെ കട ബാധ്യതയുടെ 82 ശതമാനവും ബജറ്റിൽ നിന്നും തിരിച്ചടവ് വരുന്നവയാണെങ്കിൽ കേരളത്തിൽ ഇത് 65.5 ശതമാനമാണ്. കേരളത്തിൽ വലിയ തോതിൽ ജനങ്ങൾ നിക്ഷേപം നടത്തുന്ന സംവിധാനമാണ് ട്രഷറി എന്നത് കൊണ്ടാണ് ഇങ്ങനെ സംഭവിക്കുന്നത്. ഇതും ചേർത്ത് തുകക്കണക്കിൽ കടം പറഞ്ഞു പേടിപ്പിക്കുന്നതാണ് നമ്മുടെ രീതി.

കടം ഇരട്ടിക്കുന്നതിന്റെ കഥ എന്താണ്? 2006-2011 കാലത്തെ വർദ്ധനവ് 71.32 ശതമാനമായിരുന്നു. 2011- 2016 കാലത്ത് വർദ്ധനവ് 100 ശതമാനമായി. 2016-2021 കാലത്തെ വർദ്ധനവ് 88.6 ശതമാനമായിരുന്നു. 2021-2026 കാലത്ത് ബജറ്റ് കണക്കുകൾ പ്രകാരം ഈ വർദ്ധനവ് 62.34 ശതമാനം മാത്രമായിരിക്കും. 2026 മാർച്ചിൽ എല്ലാം ചേരുന്ന സംസ്ഥാനത്തിന്റെ ആകെ കട ബാധ്യത 4.82 ലക്ഷം കോടി രൂപയായിരിക്കും എന്നാണ് അനുമാനം. കടം- ജിഡിപി അനുപാതവും ഇത് പോലെ കുറയുകയാണ്. 2000 മുതൽ 2025 വരെയുള്ള സഞ്ചിത കടം GSDPയുടെ ശതമാനമായി നോക്കിയാൽ ഏറ്റവും ഉയർന്ന കടം/GSDP അനുപാതം 2004-2005 ലായിരുന്നു. 41.65 ശതമാനം. തൊട്ടു തലേക്കൊല്ലം 41.53 ശതമാനം. ഈ സഞ്ചിത കടം എന്നതിൽ ഇപ്പോഴത്തെ പോലെ ട്രഷറി നിക്ഷേപം ഒന്നും അന്ന് കണക്കിലെടുത്തിട്ടില്ല. അതു കൂടി ചേർന്നാൽ ഈ അനുപാതം 45 ശതമാനത്തിനും മുകളിലാകണം. അതുകൊണ്ട് കേരളം മുടിഞ്ഞു പോയി എന്ന നിലപാടില്ല. അതു ക്രമേണ താഴുകയാണ് ചെയ്തത്. 2010- 2011ൽ കടം GSDP അനുപാതം 28.4 ശതമാനമായിരുന്നു. 2020-21 ൽ കോവിഡിന്റെ പശ്ചാത്തലത്തിൽ പോലും വന്ന കടം GSDP അനുപാതം 38.51 ശതമാനമാണ്. സമ്പദ്ഘടന വീണ്ടെടുപ്പ് കൈവരിക്കുന്നതോടെ അതു സാധാരണ നിലയിലെത്തും എന്നതാണ് പറഞ്ഞത്. 2003-2005 ലെ 41- 42 ശതമാനത്തേക്കാൾ മുടിപ്പിക്കുന്ന കടമാണ് കോവിഡ് കാലത്തേത് എന്ന വാദമായിരുന്നല്ലോ നടത്തിയത്. ഇപ്പോൾ എത്രയായി 33.7 ശതമാനമായി കുറഞ്ഞു. എന്നാൽ ഇന്ത്യാ സർക്കാരിന്റെ കടം ആഭ്യന്തര വരുമാന അനുപാതം 60 ശതമാനമാണ്. യൂണിയൻ സർക്കാർ കടം കൊണ്ട് മുടിഞ്ഞു എന്നു പറയുന്നുണ്ടോ? എന്തായാലും കേരളം debt strained സംസ്ഥാനമാണ് എന്ന ആഖ്യാനം CAG റിപ്പോർട്ട് പൊളിച്ചിട്ടുണ്ട്.
ഇതൊക്കെയാണെങ്കിലും പുതിയ അവതാരരൂപം ആർജ്ജിച്ച് കടപ്പേടി വീണ്ടും കളം പിടിക്കും. ജാഗ്രത.