പേടിക്കേണ്ട, അത് ജീവനുള്ള കടുവയല്ല!
മഹാരാഷ്ട്രയിലെ ചന്ദ്രപൂർ ജില്ലയിലെ ബ്രഹ്മപുരി വനത്തിനുള്ളിൽ, ഗാർഡിനെ കടുവ പിടിച്ചുകൊണ്ടുപോകുന്നു എന്ന പേരില്‍ ഒരു വീഡിയോ അടുത്തിടെ സാമൂഹ്യ മാധ്യമങ്ങളിൽ പ്രചരിച്ചിരുന്നു. എന്നാൽ, ബ്രഹ്മപുരി വന മേഖലയിൽ അങ്ങനെയൊരു സംഭവം നടന്നതായി, വാർത്താ മാധ്യമങ്ങളൊന്നും റിപ്പോർട്ട് ചെയ്തിട്ടില്ല. ഒബിസിയുടെ പരിശോധനയിൽ, വീഡിയോ എ.ഐ ജനറേറ്റഡ് ആണെന്ന് വ്യക്തമായി.
‘ഫോറസ്റ്റ് ഓഫീസിൽ ഒരാളെ കടുവ പിടിച്ചു കൊണ്ടുപോകുന്നതിന്‍റെ സിസിടിവി ദൃശ്യം’ എന്ന കുറിപ്പോടെ 2025 നവംബർ എട്ടിനാണ് ഒരു ഇൻസ്റ്റാഗ്രാം അക്കൗണ്ട് വഴി വീഡിയോ പ്രചരിച്ചു തുടങ്ങിയത്. ബ്രഹ്മഗിരി ഫോറസ്റ്റ് ഗസ്റ്റ് ഹൗസിൽ നടന്ന സംഭവം എന്നാണ് വീഡിയോ പറയുന്നത്. ഇതേ ഇൻസ്റ്റാഗ്രാം ഉപയോക്താവ് തന്നെ ഫേസ്ബുക്കിലും വീഡിയോ പ്രചരിപ്പിച്ചിരുന്നു. പിന്നീട് ഇതേ വീഡിയോ, സമാനമായ ഹിന്ദി കുറിപ്പോടെ ഒരു എക്സ് അക്കൗണ്ട് വഴിയും പ്രചരിച്ചു. സ്ഥലപ്പേര് ബ്രഹ്മഗിരി അല്ല, ബ്രഹ്മപുരി ആണെന്ന് ഈ പോസ്റ്റ് പറയുന്നു.
വസ്തുതയെന്ത്?
‘Brahmagiri,’ ‘Maharashtra,’ ‘Tiger attack,’ and ‘forest guest house’ എന്നീ കീ വേർഡുകൾ ഉപയോഗിച്ച് തിരഞ്ഞപ്പോള്‍ ബ്രഹ്മഗിരി ഫോറസ്റ്റ് ഗസ്റ്റ് ഹൗസിൽ ഇങ്ങനെയൊരു സംഭവം നടന്നതായി വിശ്വസനീയമായ ഒരു റിപ്പോർട്ടുകളും കണ്ടില്ല.
എ ഐ ഡിറ്റക്ഷൻ ടൂളായ Hive Moderation ഉപയോഗിച്ചുള്ള പരിശോധനയില്‍ പക്ഷെ, പ്രസ്തുത വീഡിയോ എ ഐ നിർമ്മിതമാണെന്ന് ഉറപ്പായി. പ്രചരിക്കുന്ന വീഡിയോ വ്യാജമാണെന്നും ഇങ്ങനെയൊരു സംഭവം നടന്നിട്ടില്ലെന്നും മഹാരാഷ്ട്ര വനം വകുപ്പ് അവരുടെ എക്സ് അക്കൗണ്ടിലൂടെ പിന്നീട് വ്യക്തമാക്കുകയും ചെയ്തു.
