അതിദാരിദ്ര്യമുക്ത കേരളം: പ്രഖ്യാപനത്തിനെതിരെ പാര്‍ട്ടി കാര്‍ഡ് കത്തിച്ച് പ്രതിഷേധമോ?
കേരളത്തിലെ സിപിഐ അംഗങ്ങള്‍ തന്നെ ആ പാര്‍ട്ടിയെ തള്ളിപ്പറയുകയും അംഗത്വ കാർഡുകൾ കത്തിക്കുകയും ചെയ്യുന്നതായി അവകാശപ്പെടുന്ന ഒരു വീഡിയോ ഓൺലൈനിൽ ഈയിടെ പ്രചരിപ്പിക്കപ്പെട്ടിരുന്നു. ഈ വീഡിയോവിലെ ദൃശ്യങ്ങള്‍ അതിദാരിദ്ര്യമുക്ത സംസ്ഥാനമായി കേരളം മാറിയെന്ന പ്രഖ്യാപനത്തിനു പുറകെയാണ് ഉണ്ടായതെന്നാണ് സോഷ്യൽ മീഡിയയിലെ സൂചന. എന്നാൽ പഴയ ഒരു വീഡിയോയാണ് യഥാർത്ഥത്തിൽ തെറ്റിദ്ധരിപ്പിക്കുന്ന അടിക്കുറിപ്പോടുകൂടി പ്രചരിക്കുന്നതെന്ന് ഒ ബി സി നടത്തിയ അന്വേഷണത്തിൽ മനസിലായി.
‘ഇങ്ക്വിലാബ് ചിന്താബാദ്, അതി ദാരിദ്ര്യ മുക്ത കേരളത്തിൽ അംഗത്വ കാർഡുകൾ കത്തുന്നു. പാലക്കാടിലെയും വയനാട്ടിലെയും ആദിവാസികളെ പോയി കാണൂ. എവിടെയാണ് ദാരിദ്ര്യ മുക്തം എന്ന് അപ്പോൾ മനസ്സിലാകും, സമ്പൂർണ്ണ സാക്ഷരത പോലെ ഇതും ഒരു തട്ടിപ്പാണ് ’
എന്ന കുറിപ്പോടെ 2025 നവംബർ മൂന്നിനാണ് എക്സ് അക്കൗണ്ട് വഴി വീഡിയോ പ്രചരിച്ചത്. കേരളം അതിദാരിദ്ര്യം തുടച്ചുനീക്കിയെന്ന അവകാശവാദത്തെ ചോദ്യം ചെയ്യുന്ന പോസ്റ്റ് അത് വഞ്ചനാപരമാണെന്ന് ആരോപിക്കുന്നുമുണ്ട്. ഏകദേശം 10000 ആളുകൾ കണ്ട ഈ വീഡിയോ 399 പേർ ലൈക്ക് ചെയ്യുകയും 110 പേർ റീപോസ്റ്റ് ചെയ്യുകയും ചെയ്തു.
വസ്തുതയെന്ത്?
ഉചിതമായ കീ വേർഡ് ഉപയോഗിച്ച് ഫേസ്ബുക്കിൽ നടത്തിയ സെർച്ചിൽ, 2024 ജൂൺ മുപ്പതിന് സമാന വീഡിയോ പോസ്റ്റ് ചെയ്യപ്പെട്ടിട്ടുള്ളതായി കണ്ടു. അതിൽ നിന്ന് തന്നെ വീഡിയോ പുതിയതല്ല എന്ന് വ്യക്തമായി.
വീഡിയോയുടെ കീ ഫ്രെയിമുകള്‍ സെർച്ച് ചെയ്തപ്പോൾ, ഫേസ്ബുക്കിൽ ഏഷ്യാനെറ്റിൻ്റെ ഒരു വീഡിയോ റിപ്പോർട്ട് കണ്ടെത്താനായി. അത് 2024 ജൂലൈ രണ്ടിന് പോസ്റ്റ് ചെയ്തതായിരുന്നു. വീഡിയോ പുതിയതല്ല എന്നുള്ളതിൻ്റെ രണ്ടാമത്തെ തെളിവാണിത്.
സംസ്ഥാന സർക്കാർ നടപ്പിലാക്കിയ ‘വഞ്ചനാപരമായ ചില നയങ്ങളില്‍’ പ്രതിഷേധിച്ച്, മലപ്പുറം ജില്ലയിലെ പൂക്കോട്ടൂരിലെ സിപിഐ ലോക്കൽ കമ്മിറ്റി മുൻ അംഗം അവരുടെ അംഗത്വ കാർഡ് കത്തിച്ചുവെന്നാണ് റിപ്പോർട്ട് പറയുന്നത്. കൂടാതെ, സിപിഐ പ്രാദേശിക ഘടകത്തിലെ ഭിന്നതയും ഈ സംഭവത്തിന് കാരണമായതായി റിപ്പോർട്ട് സൂചിപ്പിക്കുന്നു. ഏഷ്യാനെറ്റ് ന്യൂസ് യൂട്യൂബിലും ഇൻസ്റ്റാഗ്രാമിലും റിപ്പോർട്ട് പോസ്റ്റ് ചെയ്തിട്ടുണ്ട്.
മലപ്പുറത്തെ സിപിഐ ലോക്കൽ കമ്മിറ്റിയിലെ ഒരു തർക്കവുമായി ബന്ധപ്പെട്ട 2024 ജൂണിലെ വീഡിയോ ആണ് ഇപ്പോൾ അതിദാരിദ്ര്യമുക്ത കേരളം എന്ന പ്രഖ്യാപനത്തിനിടെ, ചിലര്‍ വീണ്ടും പ്രചരിപ്പിക്കുന്നത്. അതുകൊണ്ടുതന്നെ ഓൺലൈനിൽ പ്രചരിക്കുന്ന അവകാശവാദം തെറ്റാണ്.
