ചവറ്റുകുട്ടയ്ക്ക് സമീപം തളർന്നുകിടക്കുന്ന കുഞ്ഞു ഭക്ത; പ്രചരിക്കുന്നത് പഴയ ചിത്രം 

ശബരിമല സീസൺ തുടങ്ങിയതോടെ തീർഥാടകരുടെ ചിത്രങ്ങളും വീഡിയോകളും വിവിധ സാമൂഹ്യ മാധ്യമ അക്കൗണ്ടുകൾ വഴി, പ്രചരിക്കുന്നുണ്ട്. കഴിഞ്ഞ സീസണുകളുമായി താരതമ്യം ചെയ്യുമ്പോൾ, വലിയ തിരക്കാണ് മണ്ഡല കാലത്തിന്റെ തുടക്കത്തിൽ തന്നെ കാണുന്നതെന്നാണ് മാധ്യമ റിപ്പോർട്ടുകൾ സൂചിപ്പിക്കുന്നത്. ഈയൊരു സാഹചര്യത്തിൽ സന്നിധാനത്തു നിന്നുള്ള ചില ചിത്രങ്ങൾ തെറ്റിദ്ധരിപ്പിക്കും വിധം പ്രചരിക്കുന്നുണ്ട്. ശബരിമലയിലെ ഒരു ചവറ്റുകുട്ടയ്ക്ക് സമീപം, തളർന്നുറങ്ങുന്ന ഒരു ബാലികയുടെ ചിത്രം അതിലൊന്നാണ്.

 “ചെറിയ കുട്ടികളെകൊണ്ടൊന്നും ഇപ്പോൾ മലയ്ക്ക് പോകരുത്, മാളികപ്പുറമൊക്കെ ഇങ്ങനെ ചവറ്റുകൂനയ്ക്ക് കീഴെ കിടക്കുന്നത് കാണാൻ വയ്യാത്തത് കൊണ്ട് പറയുന്നതാണ്” എന്ന കുറിപ്പോടെ നവംബർ 19 നാണ് ചിത്രം എക്സിൽ പ്രചരിച്ചത്. ഈ വർഷത്തെ ചിത്രമെന്ന നിലയിലാണ് പോസ്റ്റ് വൈറാലാകുന്നത്. ഇതുവരെ (26/11/2025)  9,981 പേരാണ് പോസ്റ്റ് കണ്ടത്. 388 പേർ ലൈക്ക് ചെയ്ത ചിത്രം, 111 പേരാണ് റീപോസ്റ്റ് ചെയ്തത്.

ഗൂഗിൾ റിവേഴ്‌സ് ഇമേജ് സെർച്ച് ചെയ്തപ്പോൾ, മറ്റു ചില സാമൂഹ്യ മാധ്യമ പേജുകളിലും ഇതേ ചിത്രം കാണാനിടയായി. 2787 ഫോളോവേഴ്സ് ഉള്ള ഹിന്ദു വണ്ണിയർ ലീഗൽ ഡിഫൻസ് കൗൺസിൽ എന്ന ഒരു തമിഴ് എക്സ് അക്കൗണ്ടും ഈ ചിത്രം റീ പോസ്റ്റ് ചെയ്തിട്ടുണ്ട്.

ശബരിമലയില്‍ നിന്നുള്ള ഹൃദയമുരുകുന്ന കാഴ്ച എന്ന കുറിപ്പോടുകൂടി 4100 അംഗങ്ങൾ ഉള്ള ഒരു തമിഴ് ഫേസ്ബുക്ക് ഗ്രൂപ്പിലൂടെയും ചിത്രം പ്രചരിക്കുന്നു. 

എന്നാൽ, ഒബിസി നടത്തിയ വസ്തുതാ പരിശോധനയിൽ,  ഈ പോസ്റ്റുകളിലുള്ളത് 2018 ലെ ഫോട്ടോയാണ് എന്ന് കണ്ടെത്തി. 

വസ്തുതയെന്ത്?

 ഗൂഗിൾ റിവേഴ്‌സ് ഇമേജ് സേർച്ച് ചെയ്തപ്പോൾ, ഏഴു വർഷം മുൻപുള്ള സാമൂഹ്യ മാധ്യമ പോസ്റ്റുകളിലും ഈ ബാലികയുടെ ഇതേ ചിത്രം കാണാന്‍ കഴിഞ്ഞു. ആ പോസ്റ്റുകളും മണ്ഡലകാലത്തെ  ഭക്തജന ദുരിതത്തെ പറ്റിയുള്ള പ്രതികരണങ്ങൾ തന്നെയായിരുന്നു. വിശ്വ സംവാദ് കേന്ദ്ര എന്ന ഫേസ്‍ബുക്ക് പേജ് വഴി 2018 നവംബർ പതിനെട്ടിന് ചിത്രം പ്രചരിച്ചിരുന്നു. രണ്ടു ലക്ഷത്തിനടുത്ത് ഫോളോവര്‍മാരുള്ള ഒരു ഗ്രൂപ്പാണിത്.

“കഠിനമായ ശബരിമല കയറ്റം പൂർത്തിയാക്കി, മാലിന്യം നിറഞ്ഞ ചവറ്റുകുട്ടയുടെ അരികിൽ, വിശ്രമിക്കുന്ന ബാലികയുടെ ചിത്രം ഏതൊരു ഭക്തന്റെയും ഹൃദയം തകർക്കുന്നതാണ്. ശബരിമല തീർത്ഥാടകരോടുള്ള പിണറായി വിജയൻ സർക്കാരിന്റെ നിസ്സംഗതയുടെ കഥയാണ് ഈ ചിത്രം പറയുന്നത്.” എന്ന് തുടങ്ങുന്നു പോസ്റ്റിന്റെ വിവരണം. 

മാലിന്യത്തിനു നടുവിൽ കിടക്കുന്ന ബാലികയുടെ ചിത്രവും ഭക്ത ജനങ്ങൾക്കിടയിൽ നിൽക്കുന്ന കാട്ടുപന്നിയുടെ ചിത്രവും പോസ്റ്റ് ചെയ്ത്, ശബരിമലയിലെ സൗകര്യങ്ങള്‍ തീരെ മോശമാണ് എന്ന വിവരണത്തോടെ മറ്റൊരു എക്സ് അക്കൗണ്ട് വഴിയും ഇതേ ചിത്രം മുൻപ് പ്രചരിച്ചിട്ടുണ്ട്.   മറ്റേതെങ്കിലും രാജ്യത്തായിരുന്നെങ്കില്‍ പിണറായി വിജയന്‍ ആ മുഖ്യമന്ത്രി സ്ഥാനത്ത് കാണില്ലായിരുന്നു എന്നാണ് പോസ്റ്റ് പറയുന്നത്.

2018 നവംബർ 17 ന്, ജെ നന്ദകുമാര്‍ എന്ന പേരിലുള്ള എക്സ് അക്കൗണ്ടിലൂടെയും ചിത്രം പ്രചരിച്ചിരുന്നുവെന്നു കാണാം. പ്രൊട്ടക്റ്റ് ശബരിമല എന്ന ഹാഷ്ടാഗോടു കൂടിയായിരുന്നു അത്.

2018 ലെ മണ്ഡല കാലത്ത് വൈറൽ ആയ ചിത്രവും ഇപ്പോൾ പ്രചരിക്കുന്ന ചിത്രവും ഒന്നാണെന്ന് പരിശോധനയിൽ ഒബിസിക്ക് മനസിലായി. 2018 മുതലേ ചിത്രം, സാമൂഹ്യ മാധ്യമ പേജുകളിൽ പ്രചരിക്കുന്നുണ്ട് എങ്കിലും ചിത്രത്തിന്റെ പ്രാഥമിക സ്രോതസ്സ് ഏതാണെന്ന് വ്യക്തമല്ല.